Sumo

Sumo
(相撲)
	Un combate de sumo (tori-kumi)
Enfoque	Llucha a base de mañes y emburriones
Contautu/durez	Contautu plenu, ensin puñaes
País d'orixe	Xapón
Deporte olímpicu	Non
Sitiu oficial	http://www.sumo.or.jp/eng/

Sumo (相撲, sumō), consideráu por munchos el deporte nacional de Xapón, tien los guaños allá una vezona. Los primeros rexistros escritos de Xapón, dataos nel sieglu VIII d.C., conseñen el primer tornéu de sumo nel 23 d.C., per aciu concretamente del pidimientu del emperador, y el combate continuaba hasta qu'un home taba demasiao mancáu pa siguir. Nel 728 d.C., l'emperador Shōmu Tennō (聖武天皇, 701-756) entamó a celebrar torneos oficiales de sumo nos festivales anuales de la collecha. Esta tradición de facer torneos delantre l'emperador continuó, pero espardióse pasu ente pasu, con torneos que tamién se celebraben nos festivales Shinto, y l'entrenamientu de sumo foi col tiempu amestándose al entrenamientu militar. Pal sieglu XVII, el sumo yera un deporte profesional organizáu, abiertu al públicu, del que gociaben tanto la clas alta como’l común.

Güei’l sumo retién munchos de los sos rebilicoques tradicionales, incluyendo un árbitru vistíu de sacerdote Shinto, y un ritual onde los competidores palmotien, apatayen, y avienten dél sal nel ronchu enantes de cada combate. Pa ganar un combate los competidores empleguen téuniques de proyeición y agarre pa llevar al otru al suelu; pierde’l primeru en cincar en suelu con una parte del cuerpu que nun seyan los pies, o en tocar fuera’l ronchu con cualesquier parte del cuerpu. En Xapón fáense al añu seis grandes torneos, y los nomes y graos relativos de cada lluchador profesional espublícense dempués de cada tornéu nuna llista official llamada banzuke, que siguen relixosamente los acérrimes del sumo.

Bibliografía

Paz, Eduardo de. Sumo, la lucha de los Dioses. Shinden Ediciones, 2006. Archiváu 2010-01-05 en Wayback Machine ISBN 84-933469-5-0
Tablero, Fco. Javier (2002). Parentesco y organización del sumo en Japón. Madrid: Universidad Complutense de Madrid. ISBN 84-8466-257-8.

Referencies

Enllaces esternos