Bremen

Bremen é unha cidade no noroeste de Alemaña, atravesada polo río Weser a uns 60 km de distancia do Mar do Norte. A cidade atópase a uns 50 km ao leste de Oldenburg, 110 km ao suroeste de Hamburgo, 120 km ao noroeste de Hanover e 105 km ao nordés de Osnabrück.

Bremen posúe un clima oceánico moderado debido a súa proximidade á costa do Mar do Norte.

En 2015, Bremen contaba cunha poboación de 557.464 habitantes, dos cales 89.713 (16%), aproximadamente, tiñan unha nacionalidade estranxeira.^[3] A área urbá chega a case 900 000 habitantes e a área metropolitana Bremen-Oldenburg inclúe uns 2,3 millóns de habitantes.

Bremen semella ser un antigo asentamento alemán. Unha acta proclama a súa fundación no ano 788 aínda que recentemente recoñeceuse coma falsa polo que a data de fundación segue a ser descoñecida. Durante o século VIII as tropas de Carlomagno chegaron ao río Weser coa finalidade de cristianizar as tribos asentadas a carón do río, polo que Bremen converterse nunha cidade obispal de certa importancia mercantil.

No século XII , o poder da cregaxe vese igualado polo de Henrique o León. O nobre saíu vitorioso e converteuse no soberano da cidade, o que conduciu a un goberno civil e a unha perda do poder clerical, desta forma Bremen converteuse nunha cidade comercial cuxos barcos dominaban a parte sur do Mar do Norte. Esta dominación rematou cando a Liga Hanseática, que era orixinalmente unha alianza do Mar Báltico soamente, tomou unha posición no Mar do Norte. A comezos do século XIV os barcos de Bremen artimañando coma piratas abordaron as naves hanseáticas. En 1358^[4] co fin de evitar unha guerra aberta, os conselleiros municipais de Bremen acoden ao consello da Liga Hanseática en Lübeck e aceptan formar parte dela.

En 1404 foi erixida a estatua de pedra de Roland na Marktplatz^[5], para substituír unha anterior de madeira que fora destruída.

Bremen continuou sendo un membro reticente da Liga Hanseática, esixindo apoio para as súas guerras contra os líderes dos clans frisóns que reinaban ao redor da desembocadura do río Weser, mais en poucas ocasións chegaron ao ámbito do Mar Báltico. En 1425, o conflito acadou un novo nivel cando os cidadáns queimaron documentos hanseáticos na praza do mercado (Bremer Markplatz). Entón Bremen é expulsado da liga en 1427, o que non deixa de ter repercusións: a repentina perda de poder leva a reclamacións territoriais dos estados veciños e perdas territoriais significativas. Máis tarde Bremen volverá a ser parte da Liga ata ser expulsada novamente no 1563 por terceira vez.

En 1623 é construído o primeiro porto artificial alemán en Bremen-Vegesack e no ano 1646 trala Guerra dos Trinta Anos contra os suecos convértese nunha cidade reino independente. A cidade foi ocupada polas tropas napoleónicas no ano 1811 integrándose ao sistema administrativo francés como capital do departamento de Bouches-du-Weser ata o fin da ocupación francesa tres anos despois para finalmente ser recoñecido como Estado soberano, da Confederación Alemá (1871) no Congreso de Viena de 1815. O Estado de Bremen absorberá 1827 ao porto de Bremerhaven conformando así o estado actual.

Despois da Segunda Guerra Mundial, durante a cal a cidade foi bombardeada dende xuño de 1942 a marzo de 1945, Bremen foi ocupada polas forzas británicas que non tardaron en ceder a cidade aos estadounidense que querían ter un porto preto do Mar do Norte. Esta situación permitiu que a cidade non fose absorbida polo estado e Baixa Saxonia que estaba baixo ocupación británica.