[go: up one dir, main page]
Lompat ke isi

Taleh

Wikipedia Minangkabau - Lubuak aka tapian ilimu
Talas
Klasifikasi ilmiah
Kingdom: Plantae
Division: Magnoliophyta
Class: Liliopsida
Order: Alismatales
Family: Araceae
Genus: Colocasia
Species: C. esculenta
Namo binomial
Colocasia esculenta
(L.) Schott[1]
Sinonim
  • Arum esculentum L., 1753[2] (basionym)
  • Colocasia antiquorum Schott


sinonim lain, lihat pada The Plant List[3]

Taleh, kaladi, atau seratah (Colocasia esculenta L.) adolah tumbuahan nan mahasilkan umbi-umbian nan cukuik pantiang. Tanaman iko barasa dari suku taleh-talehan atau Araceae. Dipakiroan Taleh barasa dari Asia Tenggara atau Asia Tengah bagian selatan, taleh juo alah dibudidayakan manusia sajak jaman purba, bahkan di jaman sabalun padi ditanam urang.[4] Kini taleh iko alah manyebar ka babagai balahan dunia, tamasuak India, Tiongkok, Afrika Barat, dan Utara sarato Hindia Barat.[4] Taleh marupokan makanan pokok, salain sukun, di babarapo kepulauan di Oseania. Di Indonesia, talas populer ditanam di hampia di sado daerah, tamasuak daerah Sumatera.

Banyak namo dalam bahaso-bahaso daerahnya nan marujuak ka umbi iko, misalnyo talé, kĕladi, sukat, suhat, seuhat, suwat (Bat.); taro (Nias); taléh, kaladi, kuladi (Min.); talos, kĕladi (Lamp.); talĕs, kĕladi, kujang, luèh (Day.); taleus, bolang (Sd.); tales, janawari (Jw.); tales, kaladi (Md.); talĕs, kladi (Bl.); talé, koladi, kolai, kolei, korei, kore (aneka dialek di Sulut); aladi, suli, kosi, paco (Sulsel); lole, ufi lole (Timor); inane, inano, inan, ina wuu, ronan, kětu, etu, hakar, wakal, gwal (berbagai pulau di Maluku); bètè, ota, dilago, komo (Maluku Utara); nomo, uma, warimu, hèkérè, sèkéré, ifen, yéfam (Papua).[5] Samantaro taleh dalam bahasa Inggris disabuik taro, old cocoyam, dasheen, dan eddoe.[4]

Pangenalan

[suntiang | suntiang sumber]
Pelat botani

Herba, jo samacam umbi nan disabuik bonggol (Ingg.: corm, umbi bonggol) nan tumbuah di bawah tanah; tingginyo 0,4-1,5 m.Daun-daun 2-5 halai; warna tangkainyo hijau, bargaris-garis hijau tuo atau kaunguan, 23-150 cm, pangkanyo bantuak palapah; halaian daun 6,60 × 7,53 cm, bulek talua, jorong, atau lonjong, jo ujuang nan marunciang, kadang-kadang barwarna kaunguan di sakitar tatanamnyo tangkai, sisi bawahnyo balilin, taju pangkanyo bulek.[6]

Perbungaan tarjadi di dalam tongkol di katiak, batangkai 15–60 cm. Seludang bungo 10–30 cm, nan tabagi jadi duo bagian, nan ateh labiah panjang, kuniang oranye dan rontok. Tongkol bawarna sarupo mentega di bagian jantannyo. Buah buni bawarna hijau, lk. 0,5 cm. Biji babantuak gelendong, alurnyo mambujur.[6]

Manfaat

[suntiang | suntiang sumber]
Talas tangkai hijau (bukan ungu) daun agak bulek bukan sagitigo delta. Cipratan aia bisa 'terapuang' di daunnyo. Taleh jenis iko daun, umbi jo batang mudonya dapek dibuek sayua lompong, sayua asam tetelan atau sayua lodeh.

Tales iko ditanam untuak maambiak umbinyo, nan marupokan sumber karbohidrat nan cukuik pantiang. tapi umbi iko manganduang gatah nan mambuek gata-gata, jo babeda katajaman gatanyo manuruik jenisnyo, sahinggo harus dimasak dulu sabalun dimakan. Taleh juo ndak buliah dimakan sacaro balabiahan karano dapek mambuek gata-gata. Talalu banyak mamakan taleh juo mambuek paruik begah jo ganggua pencernaan.[7] Umbi taleh bisa diolah jo caro dikukus, dirabuih, dipanggang, digoreng, atau diolah manjadi tapaung, bubua, dan kue-kue.

Di babarapo daerah di Indonesia tampek padi indak bisa tumbuah, antaro lain di Kapulauan Mentawai dan Papua, taleh dimakan untuak makanan pokok, jo caro dipanggang, dikukus atau dimasak dalam rueh batuang. di Hawaii dan babarapo bagian Kepulauan Polinesia, umbi taleh dikukus jo ditumbuak untuak dibuek pasta, salanjuiknyo difermentasi untuak manghasilkan puding.[4] Di Jawa jo tampek lainnyo di Indonesia, umbi taleh dikukus atau digoreng untuak dimakan sarupo camilan.

Umbi taleh bogor

Salain umbi, daun jo tangkai daun taleh nan mudo dapek dibuek untuak sayua. Sayua lompong dari Jawa Barat adolah sajenis gulai nan manggunokan bagian pucuak jo tangkai daun taleh nan mudo,[5] bisa juo dimasak jo santan kelapa. Daun-daunnyo nan mudo terkenal sebagai pambungkuih buntil nan disukoi.[4]

Daun taleh, tuo atau mudo, juo digunoan untuak makanan lauak gurame. Daun, tangkai daun, jo umbinyo digunokan untuak campuran makanan taranak, tarutamo taranak babi.[4]

Daun talas babantuak perisai nan gadang. Daun iko juo acok digunokan untuak manutuik kapalo katiko hujan. Permukaan daunyo ditumbuahi bulu-bulu haluih nan mambueknyo kedap aia, artinyo aia nan jatuah ka daun akan langsuang mailia jatuah ndak maninggaan bakeh atau ndak mambasahi daun. Karano lebanyo, daun talej juo acok digunoan untuak mambungkuih, misalnyo mambungkuih lauak basah di pasa tradisional.

Raso taleh itu manih j padeh, sifatnyo netral. Umbinyo saketek baracun, baguno untuk anti radang, jo manggurangi bangkak. daun jo tangkainyo basifat astringen. Umbi jo tangkai daunnyo manganduang tapuang, villose, polifenol, dan saponin. Daunnyo menganduang polifenol. Untuak pemakaian dilua, cuci daun jo tangkainyo, salanjuiknyo giliang sampai haluih. Tempelkannyo ka borok, bisul, atau bagian nan kanai aia angek.[7]

Sayua lompong
Kue dari umbi taleh, Tiongkok

Pananaman & macam-macamnyo

[suntiang | suntiang sumber]

Diketahui ada 4 macam talas:[8]

  • Taleh pandan: baunyo ibaraik pandan nan harus sasudah dirabuih. Ciri-cirinyo, bawarna agak ungu, dan pangka palapahnyo bawarna agak merah.
  • Taleh katan: agak bagatah (lengket) sarupo katan siap dirabuih. Warnanyo hijau mudo, dan acok membuek anakan nan banyak. Taleh katan nan dikenal jo namo taleh bogor atau taleh lambao adolah hasia seleksi Balai Penelitian Pertanian di Bogor, nan dulu dikenal jo namo Algemene Proefstation de Landbouw.
  • Taleh banteng: umbinyo gadang, tapi rasonyo ndak lamak. Warna tangkainyo ungu.
  • Taleh lahun anak: taleh iko punyo banyak anakan tapi ketek-ketek.

Taleh nan acok dijua di pasa adolah taleh pandan jo katan. Mananan taleh rancanyo diawal-awal musim hujan sajo. Untuak mananam piliah tanah nan banyak kanai cahayo matoari. Buek lubang sadalam 50 × 50 cm, jo jarak lubang 80 cm. Salanjuiknyo isi lubang jo pupuak kandang atau sarok dapua, siap tu langsuang timbun tanah itu. Salanjuiknyo tancapkan bibit taleh dengan perbandingan 2/3 bagian badanyo tatanam.[8] Kalau tanaman alah baumua sabulan, siangi sado rumpuik nan ado di sakaliliangnyo. Kalau tanaman alah baumua 2-3 bulan, iris dulu tapian batangnyo. Salanjuiknyo, timbun baliak jo tanah. Pastikan, jangan sampai terlalu banyak anakan nan tumbuah. Kalau anakan cuma ciek-ciek, masih bisa untuak persediaan bibit nantinyo. Di umua 7-8 bulan, taleh baru bisa dipanen. Tanaman dibongka sadonyo, dan umbinyo dipotong dari batangnyo.[8]

Referensi

[suntiang | suntiang sumber]
  1. ↑ Schott, H. & S. Endlicher. 1832. Meletemata Botanica: 18. Vindobonae :Typis C. Gerold.
  2. ↑ Linné, C. von & L. Salvius. 1753. Species plantarum :exhibentes plantas rite cognitas, ad genera relatas, cum differentiis specificis, nominibus... Tomus II: 965. Holmiae :Impensis Laurentii Salvii.
  3. ↑ The Plant List: Colocasia esculenta (L.) Schott
  4. ↑ a b c d e f Flach, M. & F. Rumawas (Eds.) Plant Resources of South-East Asia (PROSEA) 9 - Plants yielding non-seed carbohydrates: 69-72 (Colocasia esculenta (L.) Schott Archived 2014-05-19 di Wayback Machine.)
  5. ↑ a b Heyne, K. 1987. Tumbuhan Berguna Indonesia I: 497-9. Badan Litbang Kehutanan, Departemen Kehutanan. Jakarta. (versi berbahasa Belanda -1913- I: 156, sebagai Colocasia antiquorum Schott)
  6. ↑ a b Steenis, CGGJ van. 1981. Flora, untuk sekolah di Indonesia. PT Pradnya Paramita, Jakarta. Hal. 143-4
  7. ↑ a b Dalimartha, Setiawan (2007). Atlas Tumbuhan Obat Indonesia. 4:93 – 95. Jakarta:Puspa Swara. ISBN 979-1133-14-X.
  8. ↑ a b c Soeseno, Slamet (1985). Sayur-Mayur untuk Karang Gizi. hal.105 – 107. Jakarta:Penebar Swadaya.

Pranala luar

[suntiang | suntiang sumber]
Ikon portal Portal Pertanian
Search Wikimedia Commons Ado kategori tantang Taleh di Wikimedia Commons
Diambiak dari "https://min.wikipedia.org/w/index.php?title=Taleh&oldid=2896964"