A Lueza (Charo)

A Lueza se troba en un cantimplano en a parte baixa de o solano que sinyorea Ranyín, adintro de a subcomarca natural d'a Fueva, rodeyau 360º por fincas agricolas que han gosau estar a base economica tradicional de a localidat,^[2] y comunicau con un caminet de bel ciento de metros con a pista asfaltada que en baixando por o Lumo de Ranyín comunica Ranyín con a carretera local HU-V-6442 aman de Charo.

Se troba en a cuentra de o tozal de Charo con o barranco d'a Usía, anque mas alto que no lo paso de o dito corso d'augua, y se concara aproximadament a 1 kilometro linial de Charo (bella cosa mas en contando os desnivels que cal salvar ta ir-ie), que enantes yera accesible dende a fondonada de a Usía chusto por debant de a Lueza. Por debaixo d'a Lueza, o solano de Ranyín prencipia a perder altaria poquet-a-poquet dica Tierrantona (que ye en a fondonada d'a Usía), que dista bels 2 km linials y 2,5 si se i va por a carretera.

As casas de a Lueza s'estructuran arredol d'una sola carrera, en a que se i presenta la primer construcción una torraza defensiva ta guardar a dentrada ta l'aldeya, que en l'actualidat tiene bel altro uso. Una d'as tres casas ye Casa Lueza, un casal fortificau que omne data d'oríchens arquitectonicas romanicas,^[2] y que s'ha quiesto considerar o primordio de a población. Como pasa tamién con belaltras casas fuertes por tot a Fueva, se puede logar a casa Lueza como vivienda de turismo rural.

D'alcuerdo con o investigador Manuel Benito Moliner, o toponimo «a Lueza», como tamién pasaría con os altros lugars que en Aragón contienen o nombre «lueza», dimanaría de a parola latina <*LOSA^[3] por trobar-se toz en cantimplanos. Ixe termin se conoix que yera una parola exclusiva d'o latín parlau en Hispania, amprada posiblement de bella luenga celtica charrada por os nativos.

• 1 de mayo, fiesta menor,^[4] fendo-le honras a Sant Salvador, que se celebra de conchunta con os vecins de Charo y d'o Pocino.
• 11 de noviembre, Fiesta Mayor, fendo-le honras a Sant Martín.^[4]