A Cabezonada

A Cabezonada ye o nuclio mas oriental de l'antigo municipio de o Toledo d'a Nata, y se troba a'l costau d'a carretera nacional N-260^[2] conforme ista principia a enfilar-se cara ta o puerto d'a Foradada. Ye, por tanto, o primer nuclio que administrativament faiga parte de a Fueva y de Sobrarbe que omne se troba cuan atraviesa o collau dende a vecina Ribagorza.

Cheograficament, se troba en a espuenda baixa d'un modesto cantimplano, a on que se puede trobar as fincas de caultivo d'a localidat y a ermita de Santa Barbara (santa patrona d'o lugar). A Cabezonada ye en as garras d'a sierra Ferrera y tiene un de os dos camins que puyan ta a Valle d'a Espunya por Cuello Liestro y o collau d'o Ueso Santo (l'altro ye o camino de Sant Chuan, por o sarrato en a cuentra d'a Nata).

O nuclio d'a Cabezonada se composa de cualques casas deseparadas en o solano, con bella cosa de costera, por debaixo d'as fincas agricolas y d'entre ixas y a carretera. Dista 1 km d'a capital d'o desapareixido municipio de Toledo d'a Nata, Sant Per.

O nombre d'a Cabezonada dimana con probabilidat d'o río d'a Nata,^[2] en alusión a cómo d'amanada ye a localidat con o naixedero de o río,^[2][3] a traviés d'una hipotetica evolución que pareixese Cabeza la Nata > Cabeza'nata > Cabezanada > Cabezonada.

• 15 d'agosto, Fiesta Mayor de Toledo d'a Nata,^[4] fendo-le honras a Santa María de l'Asumpción, que se celebra de conchunta con os vecins de Sant Per, con Sant Chuan, Fuent de Campo y Fosau.
• 4 d'aviento, Fiesta Mayor, fendo-le honras a Santa Barbara.^[4]