Little Red Rooster

«Little Red Rooster» er ein bluessong skriven av Willie Dixon og først gjeve ut av Howlin’ Wolf som singel i 1962. Han var òg på det andre albumet hans, Howlin’ Wolf. Rock and Roll Hall of Fame har plassert songen på lista over dei 500 songane som forma rock and roll.^[1]

Singelen vart spelt inn i juni 1961 i Chicago med Howlin’ Wolf (vokal, gitar), Johnny Jones (piano), Hubert Sumlin (gitar), Willie Dixon (bass) og Sam Lay (trommer).

Songen vart spelt inn av The Rolling Stones og dei klarte å nå førsteplassen på den britiske singellista med songen den 3. desember 1964. Til i dag er songen den einaste bluessongen som har toppa den britiske singellista. Brian Jones spelte slidegitar på songen, som vart den siste bluessongen bandet gav ut på singel. I Noreg nådde songen sjetteplass på VG-lista.

I USA vart «Little Red Rooster» boikotta eller bannlyst av radiostasjonar på grunn av den seksuelt ladde teksten, og bandet måtte i staden gje ut «Heart of Stone» som singel her. Songen vart først gjeve ut i USA på albumet The Rolling Stones, Now! frå 1965. The Rolling Stones spelte songen fleire gonger på amerikanske TV-show i midten av 1960-åra.

Songen har òg vorte spelt av mange andre artistar, mellom andre Tom Petty and the Heartbreakers, Luther Allison, James Blood Ulmer, Canned Heat, The Persuasions, Sam Cooke, The Yardbirds, The Grateful Dead, The Doors, The Roosters, Otis Rush og The Jesus and Mary Chain.