Salvaterra de Miño

Salvaterra de Miño

Epónimo	río Miño
Localización
42°04′59″N 8°29′53″O / 42.083055555556, -8.4980555555556
Estado	España
Comunidade autónoma	Galicia
Provincia	Provincia de Pontevedra
Capital de	Condado de Salvaterra
Capital	O Castelo
Poboación
Poboación	10.274 (2023) (165,71 hab./km²)
Xeografía
Parte de	Mancomunidade da Área Intermunicipal de Vigo
Superficie	62 km²
Altitude	150 m
Comparte fronteira con	Tui A Cañiza Mondariz Monção As Neves Salceda de Caselas Ponteareas Valença
Organización política
• Alcaldesa	Marta Valcárcel Gómez (2019–)
Eleccións municipais en Salvaterra de Miño
Identificador descritivo
Código postal	36450
Fuso horario	UTC+01:00
Código INE	36050
Páxina web	concellodesalvaterra.org

Salvaterra de Miño^[1] é un concello da provincia de Pontevedra, pertencente á comarca do Condado. Segundo o IGE en 2014 tiña 10.048 habitantes. O seu xentilicio (véxase no Galizionario) é «salvaterrense».

O concello, de 62,5 km², está situado ao sur da provincia de Pontevedra, na confluencia dos vales do río Tea e o Miño. Limita ao norte con Mondariz e Ponteareas, ao sur con Monção (na beira portuguesa do Miño), ao leste coas Neves (a través dos montes da Paradanta) e ao oeste con Salceda de Caselas e a parroquia tudense de Caldelas de Tui.

Evolución histórica da poboación

Censo total de habitantes	10048
Menores de 15 anos	1397
Entre 15 e 64 anos	6361
Maiores de 65 anos	2290

O 24 de maio de 991 o rei Vermudo II doou á Arquidiocese de Santiago de Compostela o señorío e val de Salvaterra, herdado do seu pai Ordoño III. A fundación da vila de Salvaterra foi promovida en 1218 polo rei Afonso IX. O obxectivo era facilitar a viláns e pecheiros os medios de burlar os excesos dos señores feudais. Tralas guerras entre Tareixa de Portugal e Urraca de Castela a comezos do século XIII, Salvaterra pertenceu a Portugal. En 1643 foi ocupada por tropas castelás no marco da Guerra de restauración portuguesa. O nome de Salvaterra aparece no século XIV, cando se substituíu o topónimo da vila de Lazoiro.^[2]

Segundo relata Vasco da Ponte, logo da Gran Guerra Irmandiña, cando Pedro Madruga pasou a Portugal fuxindo do arcebispo de Compostela e do conde de Monterrei, asaltou a gornición de Salvaterra.

En 1568 o señor de Salvaterra, Diego Sarmiento, acudiu con 500 homes á defensa de Pontevedra contra as incursións do pirata Francis Drake, que xa desembarcara en Vigo.

Até 1916 recibía simplemente o nome de Salvaterra, pero ese ano pasou a ser Salvaterra de Miño para distinguilo doutros concellos de España, como Salvatierra-Agurain en Araba ou Salvatierra de Esca en Zaragoza^[3].

• Castelo de Salvaterra (Pazo de Dona Urraca)
• Covas de Dona Urraca
• Murallas do século XVII
• Capela da Oliveira
• Igrexa de San Lourenzo de Salvaterra
• Pazo de Lira
• Pazo-torre de Petán
• Portalón da Inquisición
• Pazo de Barreiras
• Pazo da Fillaboa
• Ponte de Fillaboa
• Pazo de Santo Amaro
• Pazo do Piñeiro
• Pazo de Souto

O castelo de Salvaterra ou castelo de Dona Urraca é unha fortaleza medieval ao pé do río Miño. As súas orixes remóntanse aos séculos X e XI. Ocupa unha superficie de 9 700 m² conformados polo recinto amurallado coas súas garitas, a Casa do Conde, o Pazo de Dona Urraca e a Capela da Virxe da Oliva. Do século XII consérvanse as chamadas Covas de Dona Urraca, coa súa escaleira de caracol.

O castelo de Salvaterra e a súa contorna histórica foron declarados en 1949 Bens de Interese Cultural.

• Festa do viño do Condado.
• Festival da Poesía no Condado.^[4]

• Vilanova é do rei,/ Salvaterra da raíña;/ se eu fora filla do rei/ Vilanova érache miña ^[5].

Salvaterra ten características de cidade satélite de Vigo, da cal dependen economicamente a meirande parte dos seus habitantes. Preto do núcleo principal da vila atópase un pequeno polígono industrial. A partir de 2001 comezou a proxectarse a Plataforma Loxística Salvaterra-As Neves (PLISAN), proxectada no leste do concello co obxectivo de aliviar a falta de solo industrial na Área Metropolitana de Vigo. Despois de vinte anos de litixios e construción^[6] promovida polo Consorcio da Zona Franca de Vigo, a Xunta de Galiza e o Porto de Vigo, espérase que se efectúe a construción de numerosas naves industriais de distintas firmas^[7][8] nos vindeiros anos.

Alén disto, destacan tamén a produción de viño, a extracción de áridos no río Mendo, o turismo e a pesca da lamprea.

Vexa o artigo principal en: Galería de imaxes de Salvaterra de Miño

• 
  Castelo de Salvaterra, Pazo de Dona Urraca
• 
  Igrexa de San Lourenzo
• 
  Murallas de Salvaterra
• 
  Ponte de Fillaboa

Galicia | Provincia de Pontevedra | Parroquias de Salvaterra de Miño
Alxén (San Paio) | Arantei (San Pedro) | Cabreira (San Miguel) | Corzáns (San Miguel) | Fiolledo (San Paio) | Fornelos (San Xoán) | Leirado (San Salvador) | Lira (San Simón) | Lourido (Santo André) | Meder (Santo Adrián) | Oleiros (Santa María) | Pesqueiras (Santa Mariña) | Porto (San Paulo) | Salvaterra (San Lourenzo) | Soutolobre (Santa Comba) | Uma (Santo André) | Vilacova (San Xoán)

Para unha lista completa de todos os lugares do concello de Salvaterra de Miño vexa: Lugares de Salvaterra de Miño.

Wikimedia Commons ten máis contidos multimedia na categoría:  Salvaterra de Miño

• Oya Pérez, Elisa. Informe Económico año 2004 Antena Salvaterra de Miño (en castelán).