Pwezon d' tchamosseure

On pwezon d' tchamosseure ou tchamopwezon ou micotocsene^[1], c' est on prodût do metabolisse di sacwants tchamosseures. Foiravant les cenes ki crexhnut so les grins. Adon, les pwezons s' ritrovèt dins l' amagnî des biesses d' aclevaedje, aprume ezès poytreyes.

Å djoû d' ouy, on cnoxhe dipus di 1000 micotocsenes diferinnes.^[2]

Li grande pårt des pwezons d' tchamosseure sont ddja la dins les tchamps. Come ene todi pus grande poart do produjhaedjes di dinrêyes d' awousse si fwait dins les tchôds et crous payis, cisse rujhe la eva crexhant, leye eto.

Gn a co sacwants ki provnèt d' on wårdaedje å crou des grins.

• les aflatocsenes ki sûnèt des Aspergillus : corantes dins les climats tropicås, aprume a cåze d' on mwais wårdaedje des grins.
• les ocratocsenes provnèt des Aspergillus et des Penicillinium ki sont eto des tchamousseures di silo å grins. C' est des pwezons po li rno.
• les tricocenes sont prodûtes pa des Fusarium; c' est des tchamosseures des tchamps. Gn a ene mî cnoxhowe, li rvômitocsene (dezocsinivalenol)
• li zeralone (zeyaralenone), ki vént bråmint so les poes d' Trouk; tchamosseure d' ås tchamps; disbrôle li produjhaedje d' ormones secsuweles; adon, les polets d' poytreye ni plèt må, mins bén les poyes ponresses.
• les fumonizenes : tchamosseure d' ås tchamps, elle ont des efets disfinse-rastrindants (sistinmes di disfinse ås celules).

1. ↑ Mot eternåcionå må atuzlé, ca ci n' est k' des pwezons des tchamosseures, et nén des ôtes tchampions, come li boket "myco-" el pôreut fé acroere
2. ↑ Fernando Lima, prezintaedje diya, 14 di decimbe 2013