Mägr

? Mägr
Evropalaine mägr
Tedoklassifikacii
Valdkund: Živatad Tip: Sel'gjäntkeižed (Chordata) Klass: Imetaiživatad (Mammalia) Heimkund: Lihansöjad (Carnivora) Sugukund: Nädanvuiččed (Mustelidae) Heim: Mägrad (Meles) Erik: Mägr
Latinankel'ne nimi
Meles meles (Linnaeus, 1758)
Areal
evropalaižen mägran leviganduz
Sistematik Vikierikoiš Kuvad Vikiaitas ITIS 621922 NCBI 9662

Mägr (latin.: Meles meles), Järgeline mägr vai Evropalaine mägr, om mecživat. Mülüb Nädanvuiččed-sugukundha.

Živat eläb Evropas Skandinavijan pohjoižes päiči i Päivlaskmaižes Azijas. Seičeme alaerikod regionha kacten.

Mägr om levitadud segoitadud mecoiš i taigas. Eläb harvemba mägimecoiš, voib putta vastha stepiš. Pidase kuivid, dreniruidud hüvin tarhid, no ei edahamb mi ühtes kilometras vezištospäi vai sokhas alangospäi niiden elokahanke sötmižbazanke. Tegeb i elänzoitab süvid uruid letekukhiden i mecvanoiden pautkidme. Ned uruiden erased tahod kaičesoiš tuhižesai vozid, živatad ottas kävutamižhe pol'vespäi pol'vhe.

Täuz'kaznu hibj om 60..90 sm pitte, händan piduz — 20..24 sm, järgeline veduz om 24 kilogrammhasai, sügüzel sase 34 kilogrammhasai vedutte edel tal'vuned. Karv om kauged alakarvanke.

Ižačud oma järedamb vähän mi emäčud, ižačun pä om levedamb. Sugudimorfizm lujeneb arealan järgeližetomiš tahondoiš (oz., mägiden pautkil).

Mägr lankteb unhe tal'veks. Ujub hüvin, no ei navedi tulda vezištho muite. Vedab ölišt elonmahtust päpaloin. Ku pahidoitta živatad, ka voib purda ristitud i löda nenal. Söb nühtajid, löcoid, čunžid, gavedid, linduid da heiden munid, senid, marjoid, pähkmid i heinid. Ei sö kolijoid hibjoid näl'ges eskai.

• Nece ristit om kuti must mägr. (käredanhimoičii)

Mägr Vikiaitas