Krasnogorsk

Eländpunktan aluz om pandud vl 1932 Rusked Mägut-žilon (ven.: Красная Горка), Ban'ki-žilon da Pavšino-külän ühtištusel. Krasnogorsk panihe radnikžiloks šingotamha optiktegimištod, mugažo letihe raudbetonkonstrukcijoiden tegint sauvomha Moskvan metropolitenad i kanalad. Vl 1940 radnikžilo sai lidnan statusad. Lühüdaks aigaks (vozil 1960−1961) Krasnogorsk oli alištunu Moskv-lidnan Ezitajiden Nevondkundale.

Krasnogorskan ižandusen päsarakod oma:

• optikan da optiž-elektronine ladimensauvomine (tegihe tutabid «Zenit»-fotoapparatoid enččel);
• sauvondmaterialoiden tegimišt (gipstegesed, kuivad sauvondsegoitused, erazmujuine asfal'tbeton);
• mašiništon pästand cementan, himijan da metallurgijan sarakoiden täht;
• sömtegimišt;
• mugažo poligrafijan edheotandad oma olmas.

Lidn sijadase Moskvanjogen hural randal, läbitase sen hural Ban'k-ližajogel, seižub 190..220 m korktusil valdmeren pindan päl (Smolenskan da Moskvan ülüden sarakod). Krasnogorsk röunatab Moskvan Mitino- i Strogino-rajonidenke. Matkad Moskvan keskushesai om 22 kilometrad suvipäivnouzmha.

Klimat om ven kontinentaline. Voden keskmäine lämuz om +4,5 C°, kezakun-elokun +17..+19 C°, tal'vkun-uhokun −8..−9 C°.

Lidnan pind — 25,65 nellikkilometrad, lidnümbrikon pind (edel 2017. vot Krasnogorskan rajon) — 223,39 km². Lidnanvuitte Nahabino-žilo (41 983 rist. vl 2017) i 35 žilod da küläd mülüdas lidnümbrikho Krasnogorskan ližaks.

Ende äi käpid oli nügüdläižen lidnan territorijas.

Oficialitomašti Krasnogorsk jagase 15 lidnanlaptaks.

Vn 2010 Venäman rahvahanlugemižen mödhe lidnan eläjiden lugu oli 116 896 ristitud, rajonan (nüg. lidnümbrik) — 179 872 ristitud. Vl 2017 kaik 153 393 eläjad oli lidnas i 231 673 eläjad kaikes lidnümbrikos. Kaikiš suremb lidnan da lidnümbrikon ristitišt om nügüd'. Ristitišt ližadub heredas Moskvan lähembusen tagut. Krasnogorskan lidnümbrikon ristitišton kaks' koumandest eläb Krasnogorskas.

Ortodoksižen hristanuskondan kuz' pühäpertid^[1] om avaitud lidnas: ph. Mikulai-čudonsädajan päjumalanpert' (saudihe vll 2013−2020) Pavšinon luhtal, nell' jumalanpertid i časoun'.

Kaik nell' specialižen keskopendusen aluzkundad ratas lidnas: politehnine tehnikum, ekonomikan da oiktusen tehnikum^[2], Krasnogorskan kolledž^[3] (edel 2007. vot optiž-elektronine), medicinine škol. Baumanan nimel nimitadud MVTU:n filial om üläopendusen aluzkundaks lidnas.

Edeližed lidnümbrikon pämehed oma El'mira Haimurzina (tal'vku 2018 — keväz'ku 2021) i Radii Habirov (viluku 2017 — reduku 2018).

Avtobusad da maršruttaksid oma kundaližeks transportaks lidnan südäimes. Moskv—Rig-raudte jagab lidnad kahteks palaks: pohjoižeks i suvižeks, i vaiše üks' avtote ühtenzoitab niid.

Äiluguižed kiruhted i kaks' raudted ühtenzoittas lidnad Moskvanke. Vspäi 2010 Moskvan metropolitenan Mäkinino-metrostancii sijadase lidnas.

•  
  Moskvan agjan Ohjastusen (keskuses) i Duman (huralpäi) sauvused vl 2020
•  
  Ph. Mikulai-čudonsädajan päjumalanpert', vn 2020 nägu
•  
  «Knauf»-kompanijan gipstegesiden da sauvondsegoitusiden tegim vl 2013
•  
  Ph. Lukan pühäpert' i klinik Višnevskijan nimed, vn 2007 nägu
•  
  «Podmoskovje»-kul'turkeskuz vl 2013 («Moskvanaluine», edel rekonstrukcijad)
•  
  Valdkundaližen kinoarhivan päkorpus (2018)
•  
  «Ijun'»-torguimižbobuštuzkeskuz («Kezaku», 2013)
•  
  Pavšino-päraudtestancii vl 2020
•  
  «Mäkinino»-metrostancijan tulend vl 2009

1. ↑ Krasnogorskan pühäpertid sobory.ru-saital. (ven.)
2. ↑ Krasnogorskan ekonomikan da oiktusen tehnikuman sait (pravo-econom.ru). (ven.)
3. ↑ Krasnogorskan kolledžan sait (krstc.ru). (ven.)

• Lidnümbrikon Ezitajiden Nevondkundan oficialine sait (krasnogorsk-sovet.ru). (ven.)
• Lidnümbrikon administracijan oficialine sait (krasnogorsk-adm.ru). (ven.)
• Lidnan informacine sait (krasnogorsk.info). (ven.)