Jens Christian Hauge

Jens Christian Hauge
Jens Christian Hauge som forsvarsminister i 1947. Foto: Ørnelund, Leif / Oslo Museum
Statsborgarskap	Noreg
Fødd	15. mai 1915 Ljan
Død	30. oktober 2006 (91 år) Oslo
Yrke	politikar, advokat, motstandskjempar
Språk	norsk
Politisk parti	Arbeidarpartiet
Medlem av	Heimefronten, Norsk Kvinnesaksforening
Ektefelle	Liv Grannes
Jens Christian Hauge på Commons

Jens Christian Hauge (15. mai 1915–30. oktober 2006) var ein norsk jurist og politikar. Han er mest kjend som heimefrontmann, politikar for Arbeidarpartiet, og for å ha hatt ymse verv i tilknyting til industri. Jens Christian Hauge er ofte omtalt som «Jens Chr. Hauge». I tillegg opererte han med ymse dekknamn i si tid som leiar for Milorg. Milorg var ein del av heimefronten i Noreg under andre verdskrig.

Hauge vart fødd i tidlegare Aker kommune. Kommunen vart seinare ein del av Oslo. Hauge vart utdanna jurist i 1937. Han vart domarfullmektig i 1938, og var prispolitifullmektig frå 1940 til 1941. I 1942 vart han distriktsinspektør for Milorg på Austlandet. Deretter avanserte han til å verta den øvste leiaren for Milorg i tida frå 1943 til 1945. Han var Milorg sin representant i leiinga for heimefronten frå hausten 1944.

Etter krigen var Hauge sekretær for statsminister Einar Gerhardsen frå juni 1945. Han var forsvarsminister i Einar Gerhardsen si andre regjering frå 5. november 1945 til 6. januar 1952. Frå 1954 var han høgsterettsadvokat. Han var justisminister i Einar Gerhardsen si tredje regjering frå 22. januar 1955 til 1. november 1955.

Som forsvarsminister var Hauge sentral som pådrivar for at Noreg skulle verta med i NATO. Han var òg sentral i oppbygginga av forsvarsindustri og i opprettinga av Forsvarets forskningsinstitutt hausten 1945. Han var òg sentral i høve til Institutt for Atomenergi, oppretta i 1948.

Som advokat hadde Hauge mange viktige styreverv. Av verv kan nemnast styreverv i Raufoss Ammunisjonsfabrikker, Kongsberg Våpenfabrikk, Marinens Hovedverft, Tandbergs Radiofabrikk, Det Norske Luftfartselskap, SAS, Statoil, Norges Hjemmefrontmuseum og Nathionaltheatret. Hauge var Regjeringa Nordli sin hovudforhandlar med AB Volvo om eit svensk-norsk AB Volvo i 1978. Hauge vart skilsdomar ved International Center for Settlement of International Disputes i 1975.

I 1995 vart Hauge påskjønna med Noregs høgste sivile utmerking, Medaljen for borgardåd.

• Forsvaret av Norge i 1940 Foredrag av Jens Chr. Hauge
• Advokat for samfunnskollektivet kronikk av Rune Slagstad på http://www.aftenposten.no
• Jens Christian Hauge er død på http://www.aftenposten.no
• «Jens Christian Hauge». Stortinget.no.