Familiennaam

De Familiennaam oder Tonaam is de twete Naam, de blangen den Vörnaam den Naam vun ene Person utmaakt. Welke Kulturen hebbt ok noch extra Middelnaams oder Vaddernaams. Mehrsttiets steiht de Familiennaam achter den Vörnaam, aver vele Kulturen maakt dat ok annersrüm. Dorto höört Dialektrebeden in Süüddüütschland (Georg Hackl is denn de Hackl Schorsch), de Ungarn, de Chinesen, Koreaners un annere, aver ok dat mönsterlandsche Plattdüütsch. Ieslänners hebbt gor kene fasten Familiennaams, as de olen Germanen. Se bruukt blots Vaddernaams (hüüt ok Muddernaams), as de Oostfresen bet in dat 19. Johrhunnert. In Iesland bedüüdt dat, dat en Söhn vun en Mann, de Svein heten doot, Sveinsson mit tweten Naam heet. De Naams in’t Telefonbook un annerwegens sünd denn ok nich na de Tonaams sorteert, man na de Vörnaams. In Oostfreesland hebbt de Franschen unner Napoleon, un denn gliek noch eenmool de Hannoveraners, de „Unsitt“ van de Vaddernaams verbaden un de Ostfreesen hebben siek niege Tonaams utdenken müsst.

Dat is al lange Tiet begäng wesen, dat de Lüüd Tonaams harrn. Vun welke Vörnaams geev dat al in lütte Dörper faken vele Lüüd, de so heten. Disse Tonaams weren in de eerste Tiet nich för de ganze Familie fastleggt. De Lüüd hebbt Tonaams utsöcht, bi de jedereen glieks wüss, ’keen dormit meent weer. Wenn dat in den Oort fief Johans geev un blots een weer Smitt, denn heet de Johan Smidt. De anner kunn nich good snacken un de heet denn villicht Stamerjohan. Ok Fro un Kinner hebbt denn mitünner den Tonaam kregen, as so’ne Oort Kortform för ‚Klaas, wat Stamerjohan sien Söhn is‘ oder ‚Klaas ut Stamerjohan sien Familie‘ heet de Jung denn ‚Klaas Stamerjohan‘. Irgendwann weer dat denn sowiet, dat se de Tonaams gor nich an de Person anpasst hebbt. Ok wenn den Smitt sien Söhn un Grootsöhn nu Möller lehrt hebbt, heten se wieder Smidt. Aver noch bet in dat fröhe 19. Johrhunnert weren de Familiennaams nich so fast as hüüt. En Wessel vun den Naam weer licht to.

Kiek ok: All 3 Artikels to de Naams in verschedene Kulturen un bi de List vun plattdüütsche Tonaams

• Söök na Familiennaams in Düütschland (hoochdüütsch)
• Söök na Familiennaams in de Nedderlannen (nedderlandsch)
• Söök na Familiennaams in Belgien (nedderlandsch)
• Söök na Familiennaams in de USA (engelsch)
• Söök na Familiennaams in England un Wales (engelsch)
• Söök na Familiennaams in Grootbritannien (engelsch)
• Söök na Familiennaams in Frankriek (franzöösch)
• Söök na Familiennaams in Italien (italieensch)
• Söök na Familiennaams in Polen (engelsch, poolsch)
• Söök na Familiennaams in Spanien (engelsch, spaansch)
• Söök na Familiennaams in de Swiez (hoochdüütsch)
• Söök na Familiennaams in Däänmark (engelsch)
• Söök na Familiennaams in Eestland (engelsch)
• Söök na Familiennaams in Norwegen (engelsch)
• Söök na Familiennaams in Sweden (engelsch)