Finlandia

A Finlàndia (Suomi in finlandéize, prononçiòu [ˈsuo̯mi]^[1]), conosciûa ofiçialménte cómme Repùbrica de Finlàndia (Suomen tasavalta in finlandéize^[2]), a l'é 'n pàize de l'Eoröpa do nòrd.

A Finlàndia a confìnn-a co-a Svéçia a ponénte, co-a Rùscia a levànte e co-a Norvéggia a nòrd. A naçión a l'é afaciâ in sciô Mâ Bàltico e, in particolâ, in sciô Górfo de Bòtnia a ponénte e in sciô Górfo de Finlàndia vèrso sùd, o quæ a sepâra da l'Estònia. O sò clìmma o càngia in sciâ bâze da latitùdine, pasàndo da-o clìmma continentâle ùmido da pàrte ciù a sùd a quéllo boreâle ciù a nòrd. A naçión, ch'a l'à 'n'àrea de 338.455 km² e 'na popolaçión de 5,5 milioìn de persónn-e, a l'é covèrta sorviatùtto da-a coscì dîta taiga e a l'à ciù de 180.000 lâghi^[3].

A capitâle da Finlàndia, e çitæ ciù grànde do pàize ascì, a l'é Helsinki; e âtre çitæ ciù inportànti són Tampere, Turku e Oulu. A naçión a l'é ofiçialménte bilìngoe in quànto ségge o finlandéize che o svedéize són riconosciûe cómme ofiçiæ^[4].

E prìmme popolaçioìn són arivæ inte l'àrea ciù ò mêno into sécolo X prìmma de Crìsto^[5], depoî a fìn de l'ùrtimo perîodo glaciâle, portàndo a-o sucesîvo svilùppo de vàrie coltûe e stîli de ceràmiche into córso de l'Etæ da Prîa. Inte l'Etæ do Brónzo e quélla do Færo gh'é a testimoniànsa di inportànti scàngi co-e âtre coltûe da Fennoscàndia e da región bàltica^[6]. A partî da-o sécolo XIII a Finlàndia a l'é stæta progrescivaménte òcupâ da-a Svéçia into córso de croxæ nòrdiche, naçión ch'a l'à controlòu l'àrea pe vàrri sécoli. Inte l'ànno 1809, aprêuvo a-a vitöia rùscia inta goæra finlandéize a zöna a l'é diventâ pàrte de l'inpêro zarìsta cómme Granducâto de Finlàndia, dotòu de 'na sò pròpia outonomîa. Inte 'sto perîodo chi a coltûa finlandéize a l'à incomensòu a svilupâse, fæto ch'o l'à portòu fîto a-e prìmme idêe indipendentìste. Into 1906, a Finlàndia a l'é stæta a prìmma naçión eoropêa a garantî a tùtti i sò çitadìn o dirìtto de vôto e a poscibilitæ d'òtegnî de càreghe pùbliche^[7].

O Nicòlla II, l'ùrtimo zar da Rùscia, o l'à tentòu de ruscificâ l'àrea, levàndo a sò outonomîa ascì, ma aprêuvo a-a rivoluçión rùscia do 1917 a Finlànda a l'é ariescîa a diciarâ a sò indipendénsa, goagnâ depoî 'na goæra civîle. Inta Segónda Goæra Mondiâle a Finlàndia a l'à dovûo conbàtte cóntra l'Unión Soviética, co-e coscì dîte goære d'invèrno e de continoaçión, e cóntra a Germanîa nazìsta inta goæra lapóne. Scibén ch'a l'à perdûo pàrte do sò teritöio a favô di rùsci, inclûza a çitæ asæ inportànte da-o pónto de vìsta stòrico e colturâle de Vyborg^[8], a naçión a l'é ariescîa a mantegnî a sò indipendénsa scìnn'a-a giornâ d'ancheu.

A Finlàndia, stâto prinçipalménte agrìcolo scìnn-a-i ànni '50, depoî a Segónda Goæra Mondiâle a s'é fîto svilupâ inte 'n'economîa avansâ, méntre o vegnîva inplementòu 'n estéizo stâto sociâle bazòu in sciô coscì dîto modéllo nòrdico, portàndo dónca a 'n fortìscimo aoménto da richéssa e do rédito pro capite^[9]. A naçión a l'à 'n livéllo asæ âto de svilùppo segóndo vàrri ìndichi, da l'educaçión, a-e libertæ civîli, a-a conpetitivitæ econòmica, a-a qualitæ de vìtta e a-o svilùppo umâno in generâle^{[10][11][12][13]}. Inte l'ànno 2015 a l'é stæta a prìmma naçión pe libertæ de stànpa e pe capitâle umâno^[14] méntre, into perîodo 2011-2016, a l'êa quélla ciù stàbile pe-o Fragile States Index^[15]. Into mæximo perîodo a l'é stæta a segónda naçión ciù avansâ pe-o Global Gender Gap Report^[16] e, da-o 2018 a-a giornâ d'ancheu, a l'é consciderâ a naçión ciù felîçe a-o móndo segóndo o World Happiness Report.

A Finlàndia, intrâ inte Naçioìn Unîe inte l'ànno 1955, a l'àiva ofiçialménte adotòu 'na polìtica de neotralitæ, p'intrâ però inta NATO, do 2023, pe caxón de l'invaxón rùscia de l'Ucraìnn-a^[17]. A l'é un di ménbri de l'OECD da-o 1969, da PfP da-o 1994^[18], de l'Unión Eoropêa da-o 1995, de l'EAPC da-o 1997^[18] e de l'Eorozöna scìn da-a sò creaçión into 1999^[19][20][21].

• (EN) Matti Klinge, Let Us be Finns: Essays on History, 2ª ed., Otava Publishing Company, 1990, ISBN 95-11-11180-9.
• (EN) Max Jakobson e George Kennan, Finland in the New Europe, ABC-CLIO, 1998, ISBN 0-275-96371-3.
• (EN) Eino Jutikkala e Kauko Pirinen, A History of Finland, Dorset Press, 1998, ISBN 0-880-29260-1.
• (EN) Fred Singleton e Anthony F. Upton, A Short History of Finland, Cambridge University Press, 1998, ISBN 0-521-64701-0.
• (EN) Jason Edward Lavery, The History of Finland, Greenwood Press, 2006, ISBN 0-313-32837-4.
• (EN) Richard D. Lewis, Finland: Cultural Lone Wolf, Hachette UK, 2011, ISBN 1-931-93049-X.
• (EN) Deborah Swallow, Culture Shock! Finland: A Guide to Customs and Etiquette, Marshall Cavendish, 2011, ISBN 98-14-38299-X.
• (FI) Georg Haggren, Petri Halinen, Mika Lavento, Sami Raninen, Anna Wessman, Muinaisuutemme jäljet, Helsinki, Gaudeamus, 2015, ISBN 95-24-95363-3.
• (EN) Mara Vorhees, Catherine Le Nevez e Virginia Maxwell, Lonely Planet Finland, Lonely Planet, 2018, ISBN 1-787-01889-X.
• (EN) Insight Guides, Insight Guides Finland, 7ª ed., Apa Publications, 2019, ISBN 1-839-05206-6.

• Wikimedia Commons a contêgne di files in sce Finlàndia

• (FI, SV, EN) Scîto ofiçiâ do govèrno, in sce valtioneuvosto.fi. URL consultòu l'11 arvî 2022.
• (FI, SV, EN) Scîto ofiçiâ do prescidénte, in sce presidentti.fi. URL consultòu l'11 arvî 2022.
• (FI, SV, EN) Scîto ofiçiâ do parlaménto, in sce eduskunta.fi. URL consultòu l'11 arvî 2022.
• (ET, SV, DE, FR, ES, IT, ZH, KO, JA, RU) Scîto turìstico ofiçiâ, in sce new.visitfinland.com. URL consultòu l'11 arvî 2022.

V · D · M Stâti de l'Eoröpa
Albanîa ·  Andòra ·  Àostria‎ ·  Azerbaijan[1] ·  Bèlgio ·  Bielorùscia ·  Bòsnia-Erçegòvina ·  Bulgarîa ·  Çitæ do Vaticàn ·  Croàçia ·  Danimàrca ·  Estònia ·  Finlàndia ·  Frànsa ·  Giörgia[1] ·  Germània ·  Grêcia ·  Irlànda ·  Islànda ·  Itàlia ·  Kazakistan[1] ·  Letònia ·  Liechtenstein ·  Litoània ·  Lusenbùrgo ·  Maçedònia do Nòrd ·  Mâta ·  Moldàvia ·  Mónego ·  Montenéigro ·  Norvéggia ·  Pàixi Bàsci ·  Polònia ·  Portogàllo ·  Régno Unîo ·  Repùbrica Cêca ·  Romanîa ·  Rùscia[2] ·  Sàn Marìn ·  Sèrbia ·  Slovàchia ·  Slovénia ·  Spàgna ·  Svéçia ·  Svìsera ·  Turchia[2] ·  Ucraìnn-a ·  Ungherîa
Riconosciménto limitòu	Abkhazia[1] ·  Kosovo ·  Oséçia do Sùd[1]
De facto indipendénti	Transnistria
Dipendénse	Danimàrca ( Fær Øer) ·  Régno Unîo ( Gibiltæra ·  Guernsey ·  Jersey ·  Izoa de Man)
↑ 1,0 1,1 1,2 1,3 1,4 Stâto parçialménte eoropêo a segónda da convençión giögràfica adotâ ↑ 2,0 2,1 Parçialménte in Àzia