Konstantin XI.

Konstantin XI.
Kaiser vom Byzantinische Riich
Regierigsziit	6. Januar 1449 – 29. Mai 1453
Chrönig	6. Januar 1449
Uf d Wält cho	8. Februar 1404
Geburtsort	Konstantinopel
Gstorbe	29. Mai 1453 (im Alter vo 49)
Dodesort	Konstantinopel
Vorgänger	Johannes VIII. Palaiologos
Nochfolger	käi Byzantinische Kaiser me noch em Undergang vom Riich
Verhürotet mit	Theodora Tocco Caterina Gattilusio

Dr Konstantinos XI. Palaiologos (Konstantínos Dragásis Paleológos Κωνσταντῖνος Δραγάσης Παλαιολόγος, * 9. Februar 1404 z Konstantinopel; † 29. Mai 1453 z Konstantinopel) isch vo 1448 bis 1453 dr letscht byzantinisch Kaiser gsi. Dr Zuenaame Dragases, won er sälber bevorzugt het, isch vom bulgarisch-serbische Aadelsgschlächt Dragaš vo sinere Mueter Helena Dragaš abgläitet. Dr Konstantinos isch dr Noochfolger vo sim Brueder Johannes VIII. Palaiologos gsi.

Dr Konstantinos isch s achte vo zää Chinder vo sim Vater Manuel II. Palaiologos und sinere Mueter Helena Dragaš gsi und isch z Konstantinopel ufgwaggse. Vo 1437 bis 1439 isch er Regänt z Konstantinopel gsi für si Brueder, Kaiser Johannes VIII. Palaiologos, wo denn furt gsi isch. Bevor er Kaiser worden isch, isch dr Konstantinos dr Despot vo dr byzantinische Browinz Morea uf dr Halbinsle Peloponnes gsi, und er het dört die letschte Überräst vo dr fränkische Fremdherrschaft abgschafft. Noch em Dood vo sim Brueder im Oktober 1448 isch er Kaiser worde und mä het en am 6. Jänner 1449 no in dr Hauptstadt vom Despotat Mistra kröönt, so dass d Osmane nüt häi chönne sääge drgeege. Aber zu däm Zitpunkt isch dr Undergang vom Riich so guet wie sicher gsi.

Die osmanische Türke häi under em Sultan Mehmed II. scho fast ganz Chläiasie bsetzt ghaa. Nume e chliins Gebiet um Konstantinopel und e schmaale Küstesträife dr östlige Schwarzmeer-Küste nooch häi no zum byzantinische Riich ghöört. Dr Sultan het em Kaiser d Herrschaft über d Morea aabote, dä het das aber abgleent. Im Joor 1452 het die osmanischi Armee d Belaagerig afo vorberäite. Am 2. April 1453 het si denn aagfange. Am 29. Mai 1453 het sich dr Kaiser, die oströmische Soldaate und fümfhundert Genuese, wo uf Schiff aachoo si und vo de Byzantiner begäistert ufgnoo worde si, uf e letscht Kampf vorberäitet und häi non e letschts Mol in dr Hagia Sophia bätet, bevor d Osmane aagriffe häi. Es isch e herte Kampf mit vile Doote gsi, aber d Osmane häi Minöör ghaa und e Kanone mit eme enorme Kaliber (75 cm), wo erst churz vorhär erst vom ene ungarische Kanonegiesser erfunde worde isch. Es git Historiker wo dänke, ass si vil zweenig Munizioon ghaa häi für sä und ass d Brobleem mit em Rückstoss so grooss gsi si, ass si nid vil für e Siig do het. D Aagriffer häi e chlis Nääbedoor (d Kerkaporta in dr Nööchi vo Blachernae) gfunde, wo d Vertäidiger überluegt häi und wo nid abschlosse gsi isch, und si därt in d Stadt iine choo. Mä het dr Kaiser Konstantinos XI. no gsee wien er heldehaft bi de Door vo dr Hauptstadt kämpft het, aber si Liiche het mä nie gfunde. Es het Legände und Müthe gee um en – äi Saag verzelt, ass dr Erooberer Mehmed II. alli Liiche het lo wäsche und lo undersueche, bis män en aagääblig gfunde häig. Wil er vor em Kampf alli Amtsabzäiche abglegt het, het män en nume an de purpurfarbige Schue chönne kenne, won er vergässe het. Dr römisch-katholischi Babst het au hüte no purpurfarbigi Schue aa zur Erinnerig draa.

Dr Dood vom Konstantinos und d Iinaam vo Konstantinopel het dr Undergang vom byzantinische Riich bedütet, wo s letschte christlige Bollwärk gege s osmanische Groossriich gsi isch. Am Schwarze Meer in Chläiasie het s no s chliine Kaiserriich Trapezunt gee, wo christlig und byzantinisch brägt gsi isch. 1461 isch au das vo de Osmane erooberet worde.

In dr griechische Hauptstadt Athen stoot uf em Mitropoleos-Blatz e Dänkmool für dä byzantinisch Kaiser. En anders Dänkmool für en stoot z Mystras.

• U. Mattejiet: Konstantin XI. Palaiologos. In: Lexikon des Mittelalters 5, Sp. 1378f.

Dä Artikel basiert uff ere fräie Übersetzig vum Artikel „Konstantin_XI.“ vu de dütsche Wikipedia. E Liste vu de Autore un Versione isch do z finde.