Froubrunne

Fraubrunnen
	Wappe vo Fraubrunnen
Basisdate
Staat:	Schwiiz
Kanton:	Bärn (BE)
Verwautigschreis:	Bärn-Mittuland
BFS-Nr.:	0538
Poschtleitzahl:	3312
Koordinate:	606707 / 214892Koordinate: 47° 5′ 6″ N, 7° 31′ 37″ O; CH1903: 606707 / 214892
Höchi:	495 m ü. M.
Flächi:	31,95 km²
Iiwohner:	5399 (31. Dezämber 2022)
Website:	www.fraubrunnen.ch
Charte
	Charte vo Fraubrunnen

Froubrunne isch e politischi Gmeind u ehemolege Houptort vom Amt Froubrunne im Kanton Bärn i dr Schwyz.

Geografii

Froubrunne lit 8 km westnördwestlich vo Burdlef und 16 km nordnordöstlich vo Bärn. Z Dorf isch ire breite Mulde am östliche Rand vom Rapperswiler Plateau und am Westrand vor Schwämmäbeni vor Ämme.

Zu Froubrunne ghöre d Wiler Binnu, Ungerbärg ufem Rapperswiler Plateau u dr Bischof südlech vo Schalune. Sit em 1. Jänner 2014 ghöre ou di ehemalige Gmeinde Büüre, Etzukofe, Graferied, Limpech, Möuchi, Schalune u Zouggeried aus Dörfer zur Gmeind Froubrunne.

Nachbergmeinde

Froubrunne gränzt a Messe, Ungeramsere u Buechegg im Kanton Soledurn, a Bätterchinge, Aeflige, Rüedtlige-Aucheflüeh, Lyssach, Chärneried, Jegischtoorf, Ifwiu u Schüne im Kanton Bärn.

Ywohner

Quäuue: Bundesamt für Statistik 2005^[2] Mit 1'835 Iwohner (Stand vor de Fusion) het Froubrunne zu de mittugrosse Gmeinde im Kanton ghört. Vo 1970 bis 2013 het sich d Ywohner meh aus verdopplet. Sit dr Fusion sis öpe 4850 Mönsche, wo z Froubrunne wohne.

Vercher

D Gmeind lit ar alte Houptstrass vo Bärn uf Solethurn. Dr nächscht Outobahnaschluss ad A1 befindet sich 5 km entfärnt z Chiupberg. Froubrunne lit ar Schmauspurbahn RBS vo Bärn nach Solethurn. Vo Froubrunne us füehrt e Buslinie über Lyssach (IKEA) nach Burdlef.

Gschicht

Z Gmeindgebiet vo Froubrunne isch scho sehr früech bewohnt gsi. Me het Funde us dr Latène-Zit gmacht. O us dr Römerzit het me Überräschte vo Hüser, Strasse u Münze gfunge.

D Gschicht vo Froubrunne hanget starch mit dere vom Zisterzienserinnechloster zäme, wo vo de Grafe vo Kyburg bi dr Sidlig Mülinen gstiftet worde isch. Urkundlech wird Froubrunne z erste mau 1267 aus Frouwenbrunnen erwähnt. Dr Name het sich de über Vrouwenbrunnen, Frowenbrunnen zu Froubrunne veränderet. Dr Ursprung vom Name lit ir Übersetzig vom Chlostername Fons beatae Mariae.

Dür Schänkige und Chöif isch z Chloster schnäu zu grossem Bsitz cho. Wo d Gugler 1375 z Chloster überfaue hei, isch o z Dorf säuber i Mitleideschaft zoge worde. Uf em Tafelefäud im Norde vom Dorf si de d Gugler aber vo de Bärner gschlage worde.

Nach em Ustärbe vo de Kyburger (1420) ischs Chloster unger d Hoheit vo Bärn cho. Nach dr Reformation ischs Chloster säkularisiert worde (1528) und d Ländereie vom Chloster si zur Landvogtei Froubrunne zämegfasst worde. Z Chloster isch zume Schloss umbout worde und het aus Sitz vom Landvogt dienet; während d Chiuche abbroche worde isch.

Nach em Imarsch vo de Franzose (1798) hets abermaus e Schlacht uf em Tafelefäud gäh: zwüsche de Truppe vom Napoléon und de Bärner. Ab 1803 isch Froubrunne Houptort gsi vom Oberamt Froubrunne, wo 1831 dr Status vome Amtsbezirk übercho het un uf Ändi 2009 ufglöst worde isch.

Dür d Entwässerig vom Sumpfgebiet im Froubrunnemoos het me 1848–49 u 1918–19 viu Kulturland gwunne.

Uf de 1. Jänner 2014 hei fougendi acht Gmeinde; Büüre, Etzukofe, Froubrunne, Graferied, Limpech, Möuchi, Schalune u Zouggeried fusioniert u Froubrunne aus neue Gmeindsname gwäut.

Weblink

Commons: Froubrunne – Sammlig vo Multimediadateie

Offizieui Website vor Gmeind Froubrunne

Fuessnote

↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023
↑ Bundesamt für Statistik: Eidgenössische Volkszählung 2000: Bevölkerungsentwicklung der Gemeinden 1850–2000. Bern 2005 (Online uf bfs.admin.ch (Site cha nüme abgrüeft wärde; Suche im Webarchiv)[1] [2] Vorlage:Toter Link/www.bfs.admin.ch, Date im Aahang (Site cha nüme abgrüeft wärde; Suche im Webarchiv)[3] [4] Vorlage:Toter Link/www.bfs.admin.ch)

Dä Artikel basiert uff ere fräie Übersetzig vu dere Version vum Artikel „Fraubrunnen“ vu de dütsche Wikipedia. E Liste vu de Autore un Versione isch do z finde.

[1] Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023

[2] Bundesamt für Statistik: Eidgenössische Volkszählung 2000: Bevölkerungsentwicklung der Gemeinden 1850–2000. Bern 2005 (Online uf bfs.admin.ch (Site cha nüme abgrüeft wärde; Suche im Webarchiv)[1] [2] Vorlage:Toter Link/www.bfs.admin.ch, Date im Aahang (Site cha nüme abgrüeft wärde; Suche im Webarchiv)[3] [4] Vorlage:Toter Link/www.bfs.admin.ch)

[1]

[2]