斯薛佛斯

斯薛佛斯si1 sit3 fat6 si1（Sisyphus；古希臘文：Σίσυφος，羅馬拼音：Sísyphos）係希臘神話一個角色，相傳佢受到天神嘅懲罰，焗住要永無休止噉運一嚿大石上山^[1][2]。

後世嘅人有對斯薛佛斯嘅故仔作出詮釋，有啲仲將斯薛佛斯當咗做「冇意義嘅勞動」嘅象徵。

話說斯薛佛斯個故仔係噉嘅^[1]：

斯薛佛斯本來係個國王，佢出嗮名份人詭計多端。有一日，斯薛佛斯係時候要死。死亡（死亡呢個概念嘅人格化）嚟咗佢度，想帶佢走。斯薛佛斯當然係唔想死，就出詭計將死亡鎖住唔畀死亡郁。

過咗冇耐，戰爭之神阿雷斯^{[歐 1]}嚟咗，想幫死亡手，要扚斯薛佛斯上路。呢個時候，斯薛佛斯又諗到條計仔：佢嗌佢老婆美露^{[歐 2]}過嚟，叫美露喺佢死咗之後唔好安葬佢，由得佢條屍就噉擺喺度^{[註 1]}；斯薛佛斯跟住死亡落到冥界之後，就同冥界女王普西芬妮^{[歐 3]}講，話佢發現美露冇好好哋跟規矩安葬佢，叫普西芬妮快啲畀佢返上人間，等佢可以去話吓美露。普西芬妮聽咗斯薛佛斯講，就畀佢返上去人間，而斯薛佛斯一返到人間，就自然唔會乖乖哋落返去冥界。斯薛佛斯打後仲喺人間生存到好老先至死^[3]。

斯薛佛斯死後落到冥界，面對掌管死亡嘅天神－冥界之王哈帝斯^{[歐 4]}。哈帝斯知道斯薛佛斯出埋嗮啲古惑招避開死亡，因而勃然大怒，決定要重罰斯薛佛斯。哈帝斯嘅決定係要斯薛佛斯喺冥界做苦工：斯薛佛斯要㧬ung2住一嚿大石頭，將嚿大石頭㧬上山坡^{[註 2]}；同時嚿大石同個山坡施咗法，每次斯薛佛斯成功將嚿大石㧬上山坡最高點嗰陣，嚿大石會即刻轆返落去山坡底。

於是斯薛佛斯就焗住要永恆噉做

• 㧬嚿大石上山坡、
• 嚿大石轆返落去山坡底，
• 㧬嚿大石上山坡、
• 嚿大石轆返落去山坡底，
• 㧬嚿大石上山坡、
• 嚿大石轆返落去山坡底...

－呢一樣毫無意義嘅工作。

斯薛佛斯嘅故仔廣為流傳，係希臘神話當中最出名嘅故仔之一，成日畀後世嘅人攞嚟做「係噉做啲毫無意義嘅嘢」嘅象徵。

《伊利亞德》^{[歐 5]}同《奧德修記》^{[歐 6]}等史詩都有提到斯薛佛斯。

斯薛佛斯嘅形象，就算係21世紀初嘅文化產物都有提起。例如2020年出嘅Roguelike型視像遊戲《哈帝斯》就有提起斯薛佛斯呢個角色^[4]。

• 自大：有啲版本提到斯薛佛斯犯咗 hubris 嘅錯誤，諗住自己聰明過眾神^[5]。
• 吳剛
• 愚公移山