Pixar
| პიქსარიშ ანიმაციური სტუდია Pixar Animation Studios | |
|---|---|
| ტიპი: | The Walt Disney Company-იშ სქუალაფირი კომპანია |
| დირსხუ: | 1979 (გრაფიკოსეფიშ ბუნა) 1986 (პიქსარი) |
| დჷმარსხუაფალი: | ედვინ ქეთმული ელვი რეი სმითი სტივ ჯობსი |
| ორენი: | ემერივილი, კალიფორნია, ააშ |
| მაჸონაფალი: | ედვინ ქეთმული', Walt Disney Animation Studios-იშ დო პიქსარიშ ანიმაციური სრუდიაშ პრეზიდენტი ჯონ ლასეტერი, Walt Disney Animation Studios-იშ დო პიქსარიშ ანიმაციური სტუდიაშ მაქიმინალი დირექტორი ჯიმ მორისი, პიქსარიშ გენერალური მენეჯერი |
| დარგი: | კომპიუტერული ანიმაციური ფილმეფი |
| ვებ-ხასჷლა: | www.pixar.com |
პიქსარიშ ანიმაციური სტუდია — ამერიკული კომპიუტერული ანიმაციაშ კინოსტუდია, ნამუშ შტაბი აშაძჷ კალიფორნიაშ შტატის ნოღა ემერივილს. 2006 წანაშე თინა რე უოლტ დისნეის კომპანიაშ სქუალაფირი კომპანია. სტუდიაშ ფილმეფს დოინალაფირი აფუ ეჩდოოთხი ოსკარი, ამშვი ორქოშ გლობუსი დო სუმი გრემი შხვა ჯილდოეფწკჷმა ართო. მოსოფელიშ მასშტაბით თინეფიშ მიშნალუქ აკოძინელო $6.3 მილიარდის მიოჭირინუ. კინოსტუდია სახელგოლაფირი რე მუში კომპიუტერული ანიმაციური ფილმეფით, ნამუშ აკაქიმინალო ხვარენა PhotoRealistic RenderMan-ის.
პიქსარქ დირსხჷ 1979 წანას, მუჭოთ სპეც-ეფექტეფიშ კომპიუტერული ბუნა, ნამუთ Lucasfilm-ის ოკათუდჷ, სოიშა თინა 1986 წანას Apple-იშ ალმარსხუაფალქ სტივ ჯობსიქ იჸიდუნჷ. თიქ სტუდია 2006 წანას უოლტ დისნეიშ კომპანიას მეჸიდჷ.
პიქსარს უღჷ ვითოსუმი რსულმეტრაჟამი ფილმი, თინეფ შქას მაართა რე ოლაჸაფინიეფიშ ისტორია (1995). თის მაჸუნჷ ჭანდიშ რინა (1998), ოლაჸაფინიეფიშ ისტორია 2 (1999), მონსტრეფიშ კორპორაცია (2001), ნემოშ გილაგორუას (2003), The Incredibles (2004), მანქანეფი (2006), რატატუი (2007), WALL-E (2008), გილმაფურინე ჸუდე (2009), ოლაჸაფინიეფიშ ისტორია 3 (2010), მანქანეფი 2 (2011) დო გური კოჩი (2012). სტუდიაშ არძა ანიმაციური ფილმიქ მიოჭირინუ წჷმოძინას კომერციულო, ხოლო არძაქ თინეფშე, მანქანეფი 2–იშ მეტი, კინოკრიტიკოსეფიშ ჯგირი ფასება დეინალეს. ფილმეფიშ ოშქაშე მიშნალი რე $602 მილიონი, მუთ პიქსარს არძა შხვა კინოსტუდიაშე მაღალო გიორინუანს ათე კომპონენტის. სტუდიაშ არძა ანიმაციური ფილმი მიშულირი რე არძა ბორჯიშ ჟარნეჩდოვითი მაღალმიშნალუამი ანიმაციურ ფილმეფს შქას, ნამუეფიშ დუს ოლაჸაფინიეფიშ ისტორია 3 გერე. ოლაჸაფინიეფიშ ისტორია 3, ნემოშ გილაგორუას დო გილმაფურინე ჸუდე ხოლო მიშულა არძა ბორჯიშ არძაშე მაღალმიშნალუამი ფილმეფიშ ერკებულს.
თიშ უკული, მუთ დირსხჷ ნომინაცია „ოსკარი საუჯგუშო ანიმაციური ფილმიშო“, პიქსარიშ გიშაშქუმალირი ბრუო ფილმიქ მახერხჷ თისჷ ნომინაციაშ შიბა. ამშვიქ ჯილდო მეკურთხუა, თინეფ შქას რენა ნემოშ აკოგორუას, The Incredibles, რატატუი, WALL-E, გილმაფურინე ჸუდე დო ოლაჸაფინიეფიშ ისტორია 3. გილმაფურინე ჸუდე დო ოლაჸაფინიეფიშ ისტორია 3 თი სუმ ანიმაციურ ფილმეფ შქას რე, ნამუეფით ხოლო ნომინირაფილი რდეს ოსკარს საუჯგუშო სურათიშო.(მაართა ათეცალი რდჷ ზისნახე დო ნოტყელი)
2009 წანაშ 6 ეკენიას პიქსარიშ ხემანჯღვერეფი ჯონ ლასეტერი, ბრედ ბერდი, პიტ დოქტერი, ენდრუ სტენტონი დო ლი უნკრიხი ვენეციაშ კინოფესტივალს დაჯილდუეს ორქოშ ნჯილოთ კინემატოგრაფიას მიშაღალირი წილშენ. თინეფს ჯილდო გინოჩჷ Lucasfilm-იშ დჷმარსხუაფალქ ჯორჯ ლუკასიქ.
რესურსეფი ინტერნეტის
[რედაქტირაფა | წყუშ რედაქტირაფა]- პიქსარიშ ანიმაციური სტუდია - IMDb
- პიქსარი - Wikia