Tunis (lidn)

Tunis
تونس‎ (Tunis)

Valdkund	Tunis
Eläjiden lugu (2023)	599,368 ristitud
Pind	104 km²
Pämez'	Suad Abderrahim (heinku 2018—, Souad Abderrahim)
Telefonkod	+216−71
Aigvö	UTC+1

Sil sanal voib olda toižid znamoičendoid; miše nähta niid, tulgat tänna.

Tunis (arab.: تونس‎, [ˈtuːnis], berber.: ⵜⵓⵏⴻⵙ) om Tunis-valdkundan pälidn da kaikiš suremb lidn. Se om Tunisan agjan administrativine keskuz mugažo, mülüb sihe.

Eländpunkt mainitase ezmäižen kerdan 9. voz'sadal EME. Araban sodaväged elänzoittiba lidnad 7. voz'sadal meiden erad, i se oli znamasižeks sodameribazaks alusenpanendan aigaspäi. Tunis-lidn om ühtennimižen valdkundan pälidnaks vspäi 1159. Datiruidas kaikiš vanhembid kaičenus sauvusid 13.-15. voz'sadal. Kaik 18 verajad oli saudud lidnuses.

Tunis-lidn sen ezilidnoidenke šingotase turizmal, himižel tegimištol i sauvondmaterialiden sarakol, om tekstilin edheotandoiden i sömtegimiden keskuseks.

Lidn sijadase Keskmeren Tunisan lahten da Tunis-järven randoil, 4..41 metrad ü.m.t. korktusil.

Klimat om Keskmeren päivoikaz, kezal eriližešti. Kezal om räk, kuivan polhe, tal'vaig om vihmakaz. Voden keskmäine lämuz om +19,2 C°, heinkun-elokun +29,1..+29,3 C°, semendkun-kezakun i elokun-sügüz'kun +20,5..+24,2 C°, tal'vkun-uhokun +10,7..+12,1 C°. Ekstremumad oma −5,3 C° (viluku) i +49,0 C° (heinku, eloku). Il'man lämuz ei voi olda madalamb mi +10 C° kezaaigan, voib ületada +25 C° miččel taht kul. Paneb sadegid 555 mm vodes, enamba kül'mkus-keväz'kus (71..85 mm kus), vähemba kezakus-elokus (13 mm pordos). Kun keskmäine relätivine nepsuz vajehtase 62..68 % röunoiš semendkus-sügüz'kus, 74..77 % kül'mkus-uhokus.

Tunisan municipalitet jagase 15 nimitadud rajonaks.

Edeline lidnan pamez' om Seifalla Lasram (Seifallah Lasram, sulaku 2011—).

Kaik 550 404 eläjad oli lidnan municipalitetan röunoiš vl 1975, sil-žo aigal lidnan ristitišt ezilidnoidenke oli 873 tuhad eläjid.

Vl 2023 läz 2,7 mln ristituid elädas ezilidnoidenke 2668 km² pindal. Vl 2014 lidnaglomeracijan ristitišt oli 2 mln, se oti valdkundan videndest.

Avtobusad, kiruhtramvaid (vspäi 1985), ezilidnelektrojonused, maršruttaksid (luaž:ad) da taksid oma kundaližeks transportaks lidnas. Ühtenzoitase valdkundan meriportoidenke raudtel.

Rahvahidenkeskeine soda- da civiline Tunis-Karfagen-lendimport (TUN / DTTA, 6,6 mln passažiroid vl 2023) sijadase kahesas kilometras pohjoižpäivnouzmha lidnan keskuzpalaspäi. Tehtas reisid Keskmeren regionan maihe, Päivlaskmaižen Evropan i Päivlaskmaižen Afrikan lidnoihe, Arabijan pol'saren järedoihe lidnoihe, Monrealihe.

• 
  Lidnankundan tobmuden sauvuz Kasbah-torgul (2009)
• 
  Lidnan nägu Man kaimdajaspäi (2011)
• 
  Ibn Hal'dunan muštnik Ripmatomuden torgul (2007)
• 
  Vanhan lidnan terrasad, vn 2003 nägu
• 
  Islaman Az-Zaituna-puhapertin minaret, vn 2008 nägu
• 
  Tunisan fondbirž vl 2017
• 
  Tunis-lidnan municipaline teatr (2008)
• 
  Tunisia moll vl 2019
• 
  Tunis-Karfagen-lendimportan terminal vl 2015
• 
  Tunisan päraudtestancii vl 2009

• Lidnankundan tobmuden sait (commune-tunis.gov.tn). (fr.) (arab.)

Tunis (lidn) Vikiaitas