Linux (Kernel)

De Adiggl is iwwa dä Betriebssyschdemkern Linux. Fir waidere Bedaidunge guggsch do

Linux (Kernel)
Bildschirmfoto
Startenda Süsdämkern (Version 3.0.0) in Debian
Basisdaten
Brogrammiera	Linus Torvalds u. v. m.
Schbrooch(e)	Englisch
Aktuelli Version	3.8.4 (20. März 2013)
Arschitekture	IA-32, AMD64, Alpha AXP, Sun SPARC, Motorola 68000, PowerPC, ARM, Hitachi SuperH, IBM S/390, MIPS, HP PA-RISC, IA-64, AXIS CRIS, Atmel AVR32, Renesas H8/300, Blackfin und weitere
Lizenz	GPLv2 (only)[1][2], enthält verschiedene Closed Source BLOBs[3]
Indanedduffdridd	www.kernel.org

Linux is änn Betriebssüsdämkern (Kernel), wo 1991 vum Linus Torvalds unna der GPL va'effentlischt worre is.

De Begriff Linux setzt sisch ausm Vornõme vum Entwickler 'Linus' unn dääm X von UNIX zamme. Damit wädd a glai offesischtlich dass Linux unoxid is. Im Schbraachgebraach wädd da Begriff 'Linux' awa ned uhbedingt nur för de Kernel benutzt sunnan offd a als Sünonüüm fir GNU/Linux-Süsdäme.

Die Uffgaab vun äm Kernel generell is die Aschdrakdion vun da Maschin, des heeßd, dass der Kernel de Programme wo uff ihm laafe ä oihoitlischi Schnittstell (API) zor Verfiichung stellt. Diese API is vun der Reschnaarschitektur u'abhängig, des heeßd der Brogrammierer schäärt sischn faischda keerisch uff was fir na Reschnaarschitektur soin Brogramm speeda laafe soll, wail a weeß, dassa imma die selb API benutze konn.

Linux is als modularer monolithischer Betriebssüsdämkern fir die Spaischa-, Traiba- unn Brozessvawaldung zuschdändisch.

Linux is wie die maischde moderne Betriebssüdämkerne faschd nua in C gschriwwä ^[4]. Ausnahme sinn arschitekturabhängige Daile vum Kernel, wo ma in Assembler schraiwe muss.

Linux is n monolitischer Kernel. Des heeßd, dass Traiba imma, egal ob se jetzad feschd oigebaud oda als Modul gelade sinn, im privilegierde Kernelmodus (bai x86: Ring 0) laafe, des heeßd, dass se vollen Zugriff uff die Maschin henn unn alles selwa mache kenne.

Die maischde Traiba müsse ned feschd in de Kernel oigebaut wärre sonnann kenne zur Laufzaid dynamisch nochgelade wärre. Ausnahme sinn essentielle Traiba die ma baim Hochfahre vum Süsdäm braacht, wie zum Baischbiel de Traiba fir die Feschdbladd unn's Dataisüsdäm. Alladings konn ma des umgehe in dem ma de Kernel beim Hochfahre imma zu alla ärschd ä Initframs-Dateisüsdäm lade lässt wo die needische Traibamodule firs Laade vom aigentlische Dateisüsdäm drin sinn. Den Drigg nutze vor allem GNU/Linux-Dischdributione, weil se dodemid änn schään kompakta Linuxkernel benutze kenne unn beim hochfahre nur die needische Draiwa laade misse. Dadursch is die Dischdri flexibler, als wie wenn se fir jedi Feschdbladd unn Dadaisüsdem, wos gäwwe duud, die Traiba feschd in de Kernel oibaue missde.

Die Brogramme (Dienschde unn Õwendungsprogramme laafe im u'priviligierde Benutzermodus (bei x86: Ring 3). Des heeßd die dirffe nix mache, wenn sie uff ä Kombonend vun da Maschin zugraife wolle misse se des dem Kernel saache. Des is n Aschbekt der Sischahait, wail ma dodemid korrupte Zugriffe vermaide konn die's gsamde Süsdäm gfährde kennde, nur wail ään Brogramm rumschbinnd. Außadääm misse sisch die Brogramme ned im Geringschde drum kimmere wie du Kombonende vun da Maschin funtioniere, wail des die Ufgaab vum Traiba is.

1. ↑ COPYING. Abgerufen am 30. Oktober 2012. 
2. ↑ Linus Torvalds kritisiert den zweiten GPLv3-Entwurf. Heise Online, 28. Juli 2006, abgerufen am 30. Oktober 2012. 
3. ↑ GNU Linux-libre. Abgerufen am 30. Oktober 2012. 
4. ↑ http://de.wikipedia.org/wiki/C_(Programmiersprache)#Verwendung