HMS Argus (I49)
Lo HMS Argus es un pòrta-avions britanic que foguèt en servici dins la Royal Navy de 1918 a 1944. Es lo premier pòrta-avions de l'istòria construch amb un pònt continü per permetre l'enaurament e l'aterratge deis avions e a donat sa forma generala a totei lei pòrta-avions seguents.
Foguèt inicialament construch en 1914 a Glasgow coma paquebòt transatlantic destinat a Itàlia. Pasmens, avans l'acabament dei trabalhs, foguèt crompat per la marina britanica en vista de lo transformar en pòrta-avions dotat d'un pònt unic. Lei trabalhs principaus foguèron acabats lo 2 de decembre de 1917 e, après d'assais, lo naviri foguèt integrat dins la flòta lo 6 de setembre de 1918. Tròp pichon (14 000 tonas) e tròp lent, foguèt pas utilizat coma vaissèu de combat mai coma naviri d'entraïnament e de desvolopament dei tecnicas de combat aeronavau.
A la fin deis ans 1920, vengut totalament obsolèt, foguèt retirat de la flòta de premiera linha e utilizat unicament per l'entraïnament. Pasmens, en causa dei pèrdas importantas de la Royal Navy entre 1939 e 1941, foguèt tornarmai plaçat dins la flòta activa. En 1941-1942, participèt ansin a la proteccion de convòis a destinacion de Malta, de Gibartar o de basas situadas dins l'Ocean Artic. En 1942, sostenguèt lo desbarcament aliat en Africa dau Nòrd. Tornèt venir un naviri d'entraïnament en 1943 e foguèt definitivament transferit a la flòta de resèrva en 1944. Puei, foguèt retirat dau servici e destruch en 1946.