Her Town Too

«Her Town Too» er ein song skriven av James Taylor, J.D. Souther og Waddy Wachtel, først gjeven ut som ein duett mellom Taylor og Souther på Taylor-albumet Dad Loves His Work i 1981. «Her Town Too» vart sidan gjeven ut på samleplata Greatest Hits Volume 2 i 2002.^[1]

Temaet for «Her Town Too» er etterverknadene av eit brot i eit langvarig forhold.^[2][3] Taylor har kalla han «ein øm, velmeinande song om kor vanskeleg det var å vera venner» med begge partar etter brotet.^[2] Sidan ekteskapet til Taylor med Carly Simon var i oppløysing på den tida, var det spekulasjonar om at songen handla om deira forhold.^[2] Taylor har likevel uttalt at songen handla om «ekskona til ein felles venn.»^[2] Forfattaren Sheila Weller har skrive at motivet var Betsy Asher, som nyleg hadde skilt seg frå den mangeårige manageren og produsenten til Taylor, Peter Asher.^[4]

Taylor har sagt om songen at han «viste ein modnad i songstrukturen som hadde utvikla seg sidan eg skreiv 'Your Smiling Face' for JT.»^[5] «Your Smiling Face» og JT hadde vorte gitt ut fire år tidlegare, i 1977. Taylor hevda òg at songen hadde «ein miskunnlaus bolero-kvalitet».^[5] The Rolling Stone Album Guide kalla han ein «forsiktig skarp skilsmissesong» som var «blant dei finaste tekstane til Taylor».^[6] Rolling Stone-kritikaren Don Shewey noterer at trass i dei verdige ambisjonane til songen, når forteljinga aldri heilt fram til ei oppløysing, og dermed kjem songen «over som berre ei fengjande, tankelaus vise.»^[3] Montreal Gazette-kritikaren John Griffin rosa «melodiøse melodien i songen» og måten teksten som «she always figured that they were her friends but maybe they can live without her» gir gjenklang hos folk som har opplevd at vennskap med den eine eller andre partnaren går i oppløysing etter at eit forhold tek slutt.^[7]

Han vart òg gitt ut som singel i 1981, og nådde ein 11. plass på Billboard Hot 100.^[8] Songen hadde komme inn på Hot 100-lista på 38. plassen, noko som gjorde han til ein av dei få songane som kom inn på topp 40 utan å nå topp 10.^[9] Så langt er dette den siste singelen til Taylor som nådde topp 40 på Billboard Hot 100.^[10] «Her Town Too» nådde òg femteplassen på Billboards Adult Contemporary-lista og nr. 21 på Mainstream Rock-lista.^[8]