Eurovision Song Contest 2011 (ESC 2011) var den 56. gongen Eurovision Song Contest vart arrangert. Tevlinga vart halden i Düsseldorf Arena i Düsseldorf i Tyskland. Den fyrste semifinalen fann stad tysdag 10. mai, den andre semifinalen fann stad torsdag 12. mai og finalen fann stad laurdag 14. mai. Aserbajdsjan vann tevlinga med songen «Running Scared», sungen av Ell & Nikki.
Austerrike, som sist deltok i 2007, Ungarn, som sist deltok i 2009, San Marino, som sist deltok i 2008, og Italia, som sist deltok i 1997, kom attende til tevlinga.
Italia, som enda på andreplass, og Tyskland, som enda på tiandeplass, var dei einaste medlemmane av «Dei fem store» som vart mellom dei ti beste, med Storbritannia tett bak på ein ellevteplass. Resten av «Dei fem store», Frankrike og Spania, enda på høvesvis 15. og 23. plass.
12. oktober 2010 vart ESPRIT arena i Düsseldorf annonsert av den tyske kringkasteren Norddeutscher Rundfunk (NDR) som arena for Eurovision Song Contest 2011. Arenaen vart kalla Düsseldorf Arena under arrangementet. Det var den fyrste gongen Eurovision Song Contest vart arrangert i Tyskland sidan gjenforeininga mellom Vest-Tyskland, som arrangerte tevlinga i 1957 og 1983, og Aust-Tyskland, som aldri har delteke. Tyskland er òg den fyrste medlemen av «Dei fem store» som arrangerte tevlinga.
23 byar hadde gjort klår vilkåra for å arrangere tevlinga. Åtte av desse, Berlin, Hamburg, Hannover, Gelsenkirchen, Düsseldorf, Köln, Frankfurt am Main og München, fortsette å vise interesse som vertsby for arrangementet. 21. august 2010 offentleggjorde NDR at fire av desse hadde offisielt søkt om å få arrangere tevlinga i 2011: Berlin, Hamburg, Hannover og Düsseldorf.
Avisa Der Westen annonserte at bygging og demonteringsarbeid på ESPRIT arena ikkje måtte ta meir enn seks veker. Under Eurovision Song Contest hadde arenaen ein kapasitet på 24 000. Düsseldorf hadde 23 000 hotellsenger og 2 000 ekstra senger i områda rundt Düsseldorf og på skip på Rhinen. Düsseldorf internasjonale lufthamn ligg i nærleiken, og ein friidrettsarena nær EESPRIT Arena vart nytta som pressesenter for 1 500 journalistar. Annonsebanner vart fjerna frå arenaen, og personar som hadde sesongbillett til fotballkampar for Fortuna Düsseldorf vart kompensert. Opphavleg vart det rapportert at Paul-Janes-Stadion ville verte oppgradert til 2. Bundesliga-krav. I staden vart ein mobil arena bygd ved sidan av ESPRIT Arena for tre millionar euro, med ein kapasitet på rundt 20 000. Han vart nytta til tre andredivisjonskampar.
13. oktober 201, skisserte Thomas Schreiber, koordinator ved ARD, detaljane for arrangementkonseptet. ESPRIT Arena vart delt i to delar, åtskilt frå kvarandre. På den eine sida av stadion vart scena installert, medan den andre sida fungerte som garderobar for deltakarane. Ein friidrettsarena ved sidan av ESPRIT Arena fungerte som pressesenter for arrangementet. ESPRI Arena hadde komfortable sete relativt nær scena som skapte ein innandørsarrangement-atmosfære.
Billettsalet til finalen starta 12. desember 2010 klokka 12.12 lokal tid på nettstaden dticket.de, som var den einaste autoriserte seljaren av billettar til Eurovision Song Contest 2011. Dei 32 000 billettane vart selte ut i løpet av mindre enn seks timar. Billettar til semifinalane vart sett på sal i midten av januar, då det vart kjend kva for land som skulle deltake i kvar semifinale.
Finalen vart halden 14. mai 2011 i Düsseldorf Arena i Düsseldorf. Aserbajdsjan vann tevlinga for fyrste gong. Berre Tyskland, som òg var vertsland, Frankrike, Spania, Storbritannia og Italia, kjend som «Dei fem store», var automatisk kvalifisert til finalen. I tillegg til desse deltok dei ti beste landa frå kvar semifinale. Ell & Nikki fekk seinare prisen Peace and Friendship Award fordi Nigar Camal bar eit tyrkisk flagg på scena under vinnarframføringa. Aserbajdsjan og Tyskland prenta frimerke med Eldar Qasımov og Nigar Camal på.
Under er lista over landa som fekk 12 poeng i finalen. Heile 20 av dei 25 finalelanda fekk minst éin tolvar, noko som framleis er rekord per 2019. Blant dei fem som ikkje fekk nokon 12-poengar var Tyskland med fjorårsvinnaren Lena Meyer-Landrut.
Stefan Raab, som var programleiar for Eurovision Song Contest, representerte Tyskland i 2000 og har i tillegg vore bakgrunnssongar fleire gongar. Sophio Toroschelidse, vokalisten i Eldrine, var støttevokalist for Georgia i 2010. Vlatko Ilievski var støttevokalist for Makedonia i 2005. TWIINS var støttevokalist for Tsjekkia i 2008. Det var den andre gongen sidan tevlinga starta at to tidlegare vinnarar deltok same år. Den fyrste gongen var i 1958.
