Ramßel

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Seevdaal
Inwahners:	1.906 (2017-12-3131. Dezember 2017)
Postleettall:	21220
Vörwahl:	04185
Geograafsche Laag:	Koordinaten:53° 21′ N, 10° 1′ O53° 21′ N, 10° 1′ O

Ramßel (hoochdüütsch Ramelsloh) is en Dörp in de Gemeen Seevdaal in’n Landkreis Horborg, Neddersassen.

Ramßel liggt an’n Noordrand von de Lümbörger Heid en poor hunnert Meter in’n Oosten von dat rechte Över von de Seev.

De Naveröörd sünd Maschen un Host in’n Noorden, Ohlendörp in’n Oosten, Thieshoop un Braackel in’n Süüdoosten, Marxen in’n Süüdwesten, Bendsdörp un Harmsdörp in’n Westen un Helmsdörp un Lindhost in’n Noordwesten.

Ramßel kummt för dat Johr 845 toeerst in de Oorkunnen vör. In dat Johr hebbt de Wikingers de Hammaborg (ut de later dat hüdige Hamborg worrn is) överfullen. De Arzbischop von Hamborg, Ansgar, is flücht un hett de Reliquien ut Hamborg mitnahmen. He hett denn in Ramsolan, wat em en Fro mit’n Naam Ikia schenkt harr, dat Klooster Ramßel stift un de Reliquien von Sixtus un Sinnitius dor verwohrt. Disse Bericht stammt aver eerst ut de Gesta Hammaburgensis ecclesiae pontificum von Adam von Bremen, de eerst över 200 Johr later schreven worrn sünd.

Dat nächste Maal keem dat Klooster Ramßel denn 937 in de Oorkunnen vör.

Dat Klooster in Ramßel weer keen riek Klooster. De Innahmen hebbt jüst reckt, de Stiftsherrn un de Kark to ünnerholen. 1596 is dat Karkenschipp tohoopfullen. Eerst 1601 kunn dör Spennen en ne’e Kark boot warrn. Disse Kark is denn 1887 bet 1889 afreten un deelwies nee boot worrn.

De Kloosterbuurn müssen elk Johr to’n 1. September den Koorntins bi dat Klooster aflevern. Mit de Tied hett sik dat inbörgert, dat bi disse Gelegenheit gliektiedig Markt is. De Markt is Ägidiusmarkt nöömt worrn (na’n Hilligen Ägidius, den sien Gedenkdag de 1. September is). Nadem in’n November 1831 dat Aflösegesett in dat Königriek Hannover in Kraft gahn is, harrn de Buurn dat Recht, sik von de olen Afgaven freetoköpen. Mit de Tied geev dat jümmer weniger Buurn, de noch Koorn bi dat Klooster aflevern müssen, un so is de Markt 1846 dat letzte Maal fiert worrn.^[1]

Dat Stift hett bet 1863 bestahn. In dat Johr is dat Stift in’n Besitt von de Kloosterkamer Hannover övergahn.^[2]

An’n 29. April 1865 hett dat in Ramßel en groten Brand geven, bi den 29 Hüüs afbrennt sünd.^[2]

1892 is de Spoor- un Dorlehnskass Ramßel grünnt worrn.^[2] De Bank hett bet 1970 bestahn, as se mit de Volksbank Noordheid tohoopgahn is. Siet 2011 is de Bank Deel von de Volksbank Lümborger Heid.

In’n Eersten Weltkrieg sünd 32 Soldaten ut Ramßel fullen oder vermisst un in’n Tweten Weltkrieg 72.^[3]

De twete Weltkrieg weer in Ramßel toenn, as an’n 20. April 1945 brietsche Truppen von Harmsdörp ut dat Dörp innahmen hebbt.^[4]

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen. 1932 is dat Deel von’n Landkreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Seevdaal worrn. Vondaag billt de Oort binnen de Gemeen Seevdaal tohoop mit Holtörp un Ohlendörp de Oortschop Ramßel/Ohlendörp/Holtörp mit egen Oortsraad un Oortsbörgermeester.

Ramßel is evangeelsch-luthersch präägt un billt mit de Sixtus-un-Sinnitius-Kark en egen Kaspel. Bet 1684 hebbt de Lüüd ut dat Dörp noch to dat Kaspel von de Gertrud-Kark in Parrns höört, de Kark in Ramßel weer vörher blots för de Kloosterlüüd.

För de Kathoolschen is de Goden-Hirt-Kark in Winsen tostännig.

Dat Wapen von Ramßel wiest baven op blauen Grund en sülvern Bischopsmütz mit gollen Ränner un ünnen op swarten Grund en sülvern Hahn von de Raaß Ramßler Blaubeen mit roden Kamm un blauen Snavel un blaue Fööt.

De Gemeenraad von Ramßel hett dat Wapen 1956 beslaten. Utklamüsert harr dat Rolf Sander ut Jesborg.

En Denkmaal för de Fullenen ut de twee Weltkrieg’ steiht in Ramßel vör de Kark. Dat Denkmaal lett ok an de Fullenen ut Oost- un Westprüßen denken, de ehr Familien in Ramßel ünnerkamen sünd.

Dat Denkmaal för de Fullenen ut’n Eersten Weltkrieg is an’n 15. Mai 1927 inwieht worrn.

In Ramßel gifft dat en Schüttenvereen, de an’n 18. März 1950 grünnt worrn is. Vörgänger von’n Schüttenvereen weer de Kriegervereen, de an’n 22. März 1898 grünnt worrn is. De Sportvereen MTV Ramßel is von 1914.

In Ramßel warrt Faslam fiert.

Ramßel hett en egene freewillige Füürwehr, de an’n 11. November 1920 grünnt worrn is. Vörher hett dat en Plichtfüürwehr geven.

Dat Dörp hett en Filiaal von de Volksbank Lümborger Heid un von de Spoorkass Horborg-Buxthu.

Dat Ramßler Blaubeen is en ole Tuchtform von dat Huushohn, de ut Ramßel stammt.

Elektrischen Stroom hett de Oort 1911 kregen, nadem an de Seev en Elektrizitätswark boot worrn is.^[4]

Dat 15,9 Hektar grote Gewarvrebeed Ramßel-Noord is in de Johren 1990 opstellt worrn.

Siet 2013 löppt de Eerdgas-Pieplien NEL in’n Westen twüschen Ramßel un Harmsdörp langs.

Dör Ramßel löppt de Kreisstraat 9, de in’n Westen na Harmsdörp an de Landsstraat 213 ran geiht un in’n Oosten na Ohlendörp un in’n Noorden von Holtörp an de K 22 ran. Tosätzlich föhrt de K 10 dör dat Dörp, de in’n Noorden na Maschen geiht un in’n Süden na Marxen un Smafelln.

De nächste Autobahn is de Autobahn 7 (Afsnidd Hamborg–Hannover). De Opfohrt 38 Ramßel liggt direkt an’n Oostrand von Ramßel an de K 9.

De nächsten Bahnhööv sünd so bi negen Kilometer wied weg in’n Noordoosten de Bahnhoff Stell an de Bahnlien Hamborg–Hannover un negen Kilometer in’n Noordwesten de Bahnhoff Hittfeld an de Bahnlien Hamborg–Bremen. Von 1874 bet 1981 hett dat ok Personenverkehr op de Bahnlien Wittenbarg–Bookholt geven. De nächste Bahnhoff weer veer Kilometer in’n Süden in Marxen.

Siet 1977 löppt an’n Westrand von Ramßel tosätzlich de Bahnlien von de Bahnlien Bookholt–Wittenbarg in Jesborg na’n Rangeerbahnhoff Maschen langs. Dat is en reine Göderbahn (Göderümgehungsbahn Hamborg).

Dat Dörp hett mit de Grundschool Ramßel en egen School. Disse School is 1964 as Middelpunktschool inricht worrn un liggt direkt an de Autobahn. Na de Grundschool mööt de Kinner ut Ramßel in Hittfeld na School.

• 1150 Jahre Ramelsloh 845–1995. 1995

1. ↑ http://www.sv-ramelsloh.de/ramsolan/ramskop/aegidius.html
2. ↑ ^{a b c} http://www.sv-ramelsloh.de/ramsolan/ort/chronik2.html
3. ↑ http://www.denkmalprojekt.org/2013/ramelsloh_gde-seevetal_lk-harburg_ns.html
4. ↑ ^{a b} http://www.sv-ramelsloh.de/ramsolan/ort/chronik3.html
5. ↑ Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 186: https://books.google.de/books?id=jN5QAAAAcAAJ&pg=PA186
6. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62: http://books.google.de/books?id=Q 5OAAAAcAAJ&pg=PA62
7. ↑ C. H. Jansen: Statistisches Handbuch des Königreichs Hannover. 1824, Sied 498: http://books.google.de/books?id=tG0AAAAAcAAJ&pg=PA498
8. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 104: http://books.google.de/books?id=eOI-AAAAcAAJ&pg=PA104
9. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134: https://books.google.de/books?id=qTZDAQAAMAAJ&pg=RA2-PA134
10. ↑ http://www.gemeindeverzeichnis.de/gem1900/gem1900.htm?hannover/winsen.htm
11. ↑ ^{a b c} http://www.verwaltungsgeschichte.de/harburg.html
12. ↑ https://www.seevetal.de/portal/seiten/einwohner_der_gemeinde%20seevetal-10000755-20200.html

Ramßel. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von’n Schüttenvereen Ramßel mit Infos över dat Dörp (hoochdüütsch)

Öörd in de Gemeen Seevdaal

Bääkdörp | Bullenhuus | Emmelndörp | Fleest | Glüsen | Groot-Moor | Helmstörp | Hittfeld mit Eddels un Karoxbossel | Holtörp | Host | Hössen | Lütt-Moor | Lindhost | Maschen | Mäkelfeld | Metzendörp mit Wooxdörp | Ohlendörp | Over | Ramßel