Parrns

Wapen/Flagg	Koort
Basisdaten
Bundsland: Neddersassen Landkreis: Horborg Gemeen: Winsen
Inwahners:	1.917 (2014-06-3030. Juni 2014)
Hööchd:	33 m över NN
Postleettall:	21423
Vörwahl:	04173
Geograafsche Laag:	Koordinaten:53° 19′ N, 10° 9′ O53° 19′ N, 10° 9′ O

Parrns (hoochdüütsch Pattensen) is en Dörp in de Gemeen Winsen in’n Landkreis Horborg, Neddersassen. De Oort billt binnen de Gemeen Winsen en Oortschop mit egen Oortsvörsteiher.

De Oort liggt op de Geest. De Rand na de Masch von de Elv un de Luh liggt so üm un bi een Kilometer in’n Noordoosten. Dat Water ut’n Süüdwesten von Parrns flütt över den Wulfser Beek na’n Aubeek hen af. De gröttere Deel flütt aver na Noordoosten över den Parrnser Graven af un münnt in Winsen in de Luh.

De Naveröörd sünd Scharmbääk in’n Noorden, Grevelau, Winsen, Reidörp un Luhdörp in’n Noordoosten, Beborg in’n Süüdoosten, Wulfsen in’n Süden, Tangendörp in’n Süüdwesten, Thieshoop in’n Westen un Holtörp, Ohlendörp un Büllhorn in’n Noordwesten.

To de öllsten Funnen ut Parrns höört 31 Hünengräver ut de Jungsteentied un Bronztied.

Parrns kummt 867 as Pathihusen toeerst in en Verteeknis von dat Klooster Corvey vör. Villicht weer disse Oorkunn aver fälscht. De nächste sekere Nawies is denn von 1196, as Pattenhusen in de Oorkunn vörkeem, mit de dat Ole Klooster bi Buxthu grünnt worrn is.

De Vaagdie Parrns is üm 1300 rüm inricht worrn. De Richtsteed von de Vaagdie leeg op’n Garlsbarg ut dat Dörp rut hen na Luhdörp. Eerst 1866 is de Amtsvaagdie denn oplööst worrn.

In’n Dörtigjohrigen Krieg sünd an’n 21. Juni 1627 däänsche Truppen dör den Oort tagen un hebbt dat Dörp in Brand steken. Meist de kumplette Oord mit de Kark un de Amtsvaagdie is dorbi afbrennt.

Huusnummern gifft dat in Parrns siet 1858, Stratennaams siet 1969.

1880 hett dat en groten Brand in Parrns geven, bi den 11 Wahnhüüs un 20 annere Gebüüd afbrennt sünd. En Buckmöhl hett von 1880 bet 1911 an de Straat na Luhdörp stahn. 1911 is an de Hauptstraat en ne’e Möhl boot worrn, de mit en Dieselmotoor lopen is. Disse Möhl hett denn ok de eersten Hüüs in Parrns mit Stroom versorgt.

In’n Eersten Weltkrieg sünd 26 Soldaten ut Parrns fullen oder vermisst.^[1]

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer Parrns in’n Kreis Winsen. 1932 is dat Dörp Deel von’n Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Winsen worrn.

Parrns is evangeelsch-luthersch präägt un billt mit de Gertrud-Kark en egen Kaspel.

För de Kathoolschen is de Goden-Hirt-Kark in Winsen tostännig.

De Parrnser Karkhoff is 1842 an de Straat na Beborg anleggt worrn. Vörher sünd de Lüüd rund üm de Kark begraven worrn. De Kapell op’n Karkhoff is 1914 boot worrn.

Dat Wapen wiest vörn op swarten Grund en gollen Hamer un achtern teihn waagrechte Stripen ümschichtig gröön un gollen. Dat Wapen is 1937 beslaten worrn.

• opstunns (Stand 2015): Regina Schaefer

Denkmaals för de Fullenen ut de twee Weltkrieg’ staht in Parrns bi de Kark un op’n Karkhoff.

In Parrns warrt jümmer an dat drüdde Wekenenn in’n Advent bi de Kark Wiehnachtsmarkt fiert. Den eersten Wiehnachtsmarkt in Parrns hett dat 1999 geven.

En Harvstmarkt an de Gertrud-Kark is toeerst för dat 18. Johrhunnert nawiest. Nadem dat Marktdrieven jümmer mehr toslapen is, hebbt de Börgers un Verenen von Parrns dor 1992 wedder ne’en Swung rinbrocht un den Harvstmarkt ok mit en Vehmarkt verbunnen. Fiert warrt de Markt jümmer an’t eerste Wekenenn in’n Oktober.

De Schüttenvereen Parrns un Ümgegend is 1888 as Kriegervereen grünnt worrn. Eerst as de Vereen 1950 na’n Tweten Weltkrieg wedder nee grünnt worrn is, is dor en Schüttenvereen von worrn. De Sportvereen MTV Parrns hett sik 1909 grünnt.

Parrns hett en egene freewillige Füürwehr, de an’n 8. Mai 1878 grünnt worrn is.

De eerste Telefonansluss keem 1885 na Parrns un de elektrische Stroom mit de Dieselmöhl von 1911. 1965 is de Oort för fleten Water an’n Waterverband Hittfeld anslaten worrn.

1896 is in dat Dörp en Dorlehnsvereen grünnt worrn, de 1918 to en Spoor- un Dorlehnsvereen worrn is un siet 1936 Spoor- un Dorlehnskass eGmbH heten hett. 1968 is de Bank mit de Spoor- un Dorlehnskass Wulfsen tohoopgahn un hett de Volksbank Wulfsen eG billt.

In’n Westen von Parrns liggt en Windpark mit fiev Windrääd, de in de Tied 1998 bet 2004 boot worrn sünd.

Siet 2013 löppt de Eerdgas-Pieplien NEL in’n Noorden in en Bagen üm dat Dörp rüm.

Dör Parrns löppt de Landsstraat 215, de in’n Süüdwesten över Thieshoop un Braackel na Hanstää geiht un in’n Oosten bi Luhdörp an de L 234 ran. Ok de Kreisstraat 37 in’n Süüdoosten löppt na de L 234 un denn wieder na Beborg, Veerhöben un Westergellsen. De L 234 geiht in’n Noordoosten na Winsen un in’n Süden över Gastää na Solzhusen. In’n Noorden föhrt de K 8 na Scharmbääk un Ashusen un in’n Süden de K 7 na Wulfsen. En lüttjere Straat gifft dat ans noch na Holtörp.

De nächste Autobahn is de Autobahn 39 (Afsnidd Hamborg–Lümborg). De Opfohrt 3 Winsen-West liggt knapp veer Kilometer in’n Noorden von Parrns an de K 8. Aver ok de Autobahn 7 (Afsnidd Hamborg–Hannover) is nich veel wieder weg. De Opfohrt 39 Thieshoop liggt so fiev Kilometer in’n Westen an de L 215.

De nächste Bahnhoff is so bi söss Kilometer wied weg in’n Noorden de Bahnhoff Ashusen an de Bahnlien Hamborg–Hannover. Fröher harr de Oort ok en egen Bahnhoff an de Bahnlien Winsen–Hützel, op de dat von 1906 bet 1970 Personenverkehr geven hett. Von 1874 bet 1981 hett dat ok Personenverkehr op de Bahnlien Wittenbarg–Bookholt geven. De nächste Bahnhoff an disse Bahnlien weer in Wulfsen, wat dree Kilometer in’n Süden weer.

Dat Dörp hett en Kinnergoorn un mit de Grundschool Parrns en egen School.

De Theoloog Ludwig Flügge is 1808 in Parrns boren.

• Peter Dederke: Pattensen. Die Geschichte eines Dorfes am Rande der Geest. Ehsdörp 2005, ISBN 3-935096-16-X

1. ↑ http://www.denkmalprojekt.org/dkm_deutschland/pattensen.htm
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 181
3. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 62
4. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 482
5. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 104
6. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 140
8. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 184
9. ↑ Inwahnertallen op gemeindeverzeichnis.de
10. ↑ ^{a b c} Inwahnertallen op verwaltungsgeschichte.de
11. ↑ Statporträt Winsen, Oortsdeel Parrns op winsen.de

Parrns. Mehr Biller, Videos oder Audiodateien to’t Thema gifft dat bi Wikimedia Commons.

• Websteed över dat Dörp (hoochdüütsch)

Öörd in de Gemeen Winsen

Beborg | Bossel | Gehrden | Hoopt | Lassrönn | Luhdörp | Parrns | Rottörp | Reidörp | Sangenstää | Scharmbääk | Stöckt | Tönnhusen | Winsen