Fiteny sôgdiana

Ny fiteny sôgdiana dia fiteny iraniana izay ampiasain' ny Sôgdiana tamin' ny Andro Antenatenany, olona mpivarotra nipetraka tao Sôgdia, faritra ara-tantara manodidina an' i Samarkand sy Bukhara ary mandrakotra an' i Ozbekistana sy an' i Tajikistana ary ny tapany avaratr' i Afganistana ankehitriny. Amin' ny teny sôgdiana soratana amin' ny abidy latina ity fiteny ity dia atao hoe swγδyʼw. Anisan' ny sampana atsinanana amin' ny fiteny iraniana izy io ary nampiasaina ho lingua franca tany Azia Afovoany nanomboka tamin' ny taonjato faha-6 ka hatramin' ny faha-9. Ny abidy sôgdiana, izay avy amin' ny abidy arameana-siriaka, dia nampitain' ny Oigoro sy nampifanarahin' izy ireo amin' ny filany, ary izy ireo indray dia nampita izany tamin' ny Môngôly sy tamin' ny Mantso. Voavakin' i Robert Gauthiot tamin' ny fiandohan' ny taonjato faha-20 ny fiteny sôgdiana.