Partij voor de Vrijheid

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

---

Partij voor de Vrijheid (PVV) (Limburgs: Partie veur de Vrieheid) is ein politieke partie die is opgerich door de Venlonaer Geert Wilders. Hae haet de partie in 2005 opgerich ónder de naam "Vereniging Groep Wilders", nao 'n conflik mit de VVD. Saer 22 november 2006 is de partie bekind ónder de naam Partie veur de Vrieheid. Beej de lendelike verkezinge van 2006 deej de partie veur 't iers mei. Wilders beholde neuge zaetele. Saer 2009 is de PVV vertaegewoordig in 't Europees Parlement (saer 2015 beej Europe des nations et des libertés) en saer 2011 ouk in de Ierste Kamer en de Provinciale Staote.

Wilders is fractieveurzitter in de Twieëde Kamer, partieleijer en partieveurzitter. Ouk is hae 't insigs lid van de PVV.^[1] Marjolein Faber is fractieveurzitter in de Ierste Kamer. Marcel de Graaff waas toet 2022 fractieveurzitter veur de PVV in 't Europees Parlement. Ouk zien hae en de Franse leier van Front National, Marine Le Pen, partieleijers van de Europese partie van de PVV: Europe des nations et des libertés.

De partiekleure zien, as de Nederlandse vlag, roeëd, wit en blauw.

Bie de verkezinge van 22 november 2023 woort de PVV veur d'n ierste kier de groeëtste in de Twieëde Kamer.

De PVV is ein populistische partie, mer euver de persiese plaats in 't politiek spectrum besteit gein eindudigheid. Meistal weurt zeej geclassificeerd es rechse partie, smeis ouk extreem-rechs, vanwaege häör standpunte die dök es racistisch waere gezien. 't Geit dan mitname um de stellingname taegeneuver d'n islam en immigrante. De partie distantieert zich aevel heejvan.

Waal verschoef de partie van extreemrechs in 2006 nao 't midde in 2012. Det kump doordet de partie zoeëwaal zier rechse as zier linkse standpunte haet. Zoeë is zeej veur streng straofe en 'n kleinere euverheid, mer tegeliek is zeej ouk fervent veurstander van bieësterechte en 't idee van de verzörgingsstaot.

De ideologieë is ó.a. geclassificeerd as: Nederlands nationalisme, groeëtneerlandisme, nationaal-liberalisme, nationaal-conservatisme, rechs-populisme, islamofobie of anti-islam, anti-immigratie en euroscepticisme.

In 't verkezingsprogram van 2017-2021 kómme de volgende punte veur:

De-islamisering van Nederland;

De PVV haet vuul kritiek op d'n islam, dae volges de PVV gein religie, mer 'n ideologie is. Heejin ónderscheid zeej zich van de meiste ander partieë in 't parlement. De partie wilt veurkómme det mier luuj oet islamitische lande immigrere. Zeej wilt daorum de grenze toe. Ander punte zien beejveurbeeld 't intrekke van verbliefsvergönninge, 't verbeje van 't drage van houfdeuk en 't preventief opsloete van radicale imams.

Oet de Europese Unie gaon;

De partie steit bekind es hendig eurosceptisch. De PVV wilt oet de EU en de gölde herinveure.

Direkte democratie;

De PVV is veur 't inveure van 't bindend referendum, 'ne gekaoze minister-president en 'ne gekaozen Hoege Raod.

Zörg;

Kleinere zörginstellinge, mier zörgmitwerkers, minder raegels in de zörg, gein eige risico. De PVV is veur de verzörgingsstaot, mer wilt zeej allein beschikbaar stelle veur luuj mit de Nederlandse nationaliteit.

Bieësterechte;

De PVV wilt bieësterechte opneme in de Gróndwet, 'n bieëstepliesie handhave. De partie is ouk taege bio-industrie. Zeej wilt 't zelf neet actief aanpakke, mer via de consument.

Minder belasting;

't Geit veural um lieëgere inkómstebelastinge en hauvering van de motorrietuugbelasting.

Mier geld veur defensie en pliesie;

Concreet wilt de PVV beejveurbeeld 10.000 pliesie-agente d'rbeej, mer minder geld oetgaeve aan internationale militaire operaties.

Strenger straofe;

De PVV wilt fors hoeëgere straofe. Taakstraofe en TBS wilt zeej aafschaffe

Óntwikkelingshölp, kuns, windmeules (zoeëgenaamde "linkse hobby's");

De PVV is taege financiering van óntwikkelingshölp (behauve noeëdhölp), windmeules en kuns. Ouk wilt zeej enne kleineren umroop.

Boetelands beleid;

't Nederlands belang mót volges de PVV altied veurop staon. Zeej wilt det de Antille ónaafhenkelik waere, wilt steun veur christelike minderhede in Törkieë en Egypte, en steunt de boew van joedse nederzettinge in Palestina.

Infrastructuur;

Gein kilomaeterheffing, verlieëging van benzienacciens, mier geld nao infrastructuur en verhoeëging van de maximumnsnelheid op autosnelwaeg nao 140 km/u.

De oétsprake en ideeë van Wilders waere dök es racistisch gezien. Zoeë pleitde Wilders veur 'n houfdookbelasting, veur sloeting van alle moskeeë en brach hae in miert 2008 de zier controversiële film Fitna oet. Nao de lendelike verkezinge van 2010 waas de PVV ónderdeil van de gedoogcoalitie VVD, CDA en PVV. In 2012 leide 'n conflik tösse de PVV einerzieds en de CDA en VVD anderzieds tot de val van det kabinet. Ander kritiek geit euver 't óntbraeke van democratie binne de partie. Luuj kinne beejveurbeeld gein lid waere. 'n Bekind gezich in de roop nao democratisering van de PVV is Hero Brinkman. Hae stapde in 2012 oét de partie en richde de partie DPK op. Dees holde gein zaetels. In 2015 woort de Ondernemers Partij opgerich, mer dees waas ouk gein succes.

Verkezingsjaor	Aantal stumme	% van de stummers	Aantal beholde zaetels
2006	579.490	5,90%	9 / 150
2010	1.453.944	15,5%	24 / 150
2012	950.263	10,1%	15 / 150
2017	1.372.941	13,06%	20 / 150
2021			17 / 150
2023			37 / 150

In 2011 deej de PVV veur 't iers mit aan de Provinciale Staoteverkezinge. De partie deej geliek mei in alle twelf provincies. Zie holde in totaal 66 zaetels. In 2007 waore d'r ouk verkezinge veur de Provinciale Staote, mer kós de PVV nog gein kandidatelies samestelle.

Provincie	% 2011	zaetels	% 2015	zaetels
, Limburg	20,6%	10/47	17,8%	9/47
, Flevoland	15,0%	6/39	14,4%	6/41
, Zuud-Holland	14,5%	8/55	14,3%	8/55
, Noord-Braobant	14%	8/55	12,8%	7/55
, Noord-Holland	11,8%	6/55	11,0%	6/55
, Drenthe	9,8%	4/41	10,9%	5/41
, Zieëland	11,8%	5/39	10,3%	4/39
, Gelderland	10,4%	6/55	9,7%	5/55
, Euveriessel	8,9%	4/47	9,4%	5/47
, Utrech	10,6%	5/47	9,0%	4/49
, Friesland	8,5%	4/43	8,7%	4/43
, Groninge	7,7%	3/43	8,0%	3/43
Totaal	12,4%	69	11,8%	66

De PVV deej in 2010 veur 't iers mei aan de gemeinteraodsverkezinge van Den Haag en Almere. Zeej deej beej de gemeinteraodsverkezinge van 2018 in daartig gemeintes mei^[2], waorónder in Mestreech, Venlo en Zittert-Gelaen. In totaal beholde zeej neuge zaetels.^[3]

Verkezingsjaor	Aantal stumme	% van de stummers	Aantal beholde zetels
Europese Parlementsverkezinge 2009	769.125	17,0%	post-Nice: 4 (25) post-Lissabon: 5 (26) (inveuring oetgesteld)
Europese Parlementsverkezinge 2014	633.114	13,3%	4 (26)
Europese Parlementsverkezinge 2019			0 (26) 1 (29)
Europese Parlementsverkezinge 2024			6 (31)

De PVV is in Limburg ein van de groeëtste partieë. De lendelike verkezinge van 2010 waor 't hoeëgtepunt, wie beej de Provinciale Staoteverkezinge van 2011. In 2010 waas zeej in bekans gans Limburg de groeëtste. In 2012 waas det de VVD. Allein in de gemeintes Ech-Zöstere, Stein en de Óngerbenk waas zeej de groeëtste. In 2017 waas de PVV de groeëtste in gemeintes wie Kèrkraoj, Haerle, Mestreech, Venlo. De partie waas opniej de groeëtste in vuul gemeintes, mer neet zoeëvuul es in 2010. Tiedes de gemeintesraodsverkezinge van 2018 beholde de PVV in Venlo veer zaetels.^[4]

• Geert Wilders, oet Den Haag (Twieëde Kamer)
• Lilian Helder, oet Venlo (Twieëde Kamer)
• Teun van Dijck, oet Venlo (Twieëde Kamer)
• Dion Graus, oet Haerle (Twieëde Kamer)
• Gabriëlle Popken, oet Gelaen (Twieëde Kamer)
• Gom van Strien, woeënechtig te Árse (Ierste Kamer)

• Website van de PVV
• Partij voor de Vrijheid (PVV), Parlement.com

Dit artikel baseert zich op d'n inhald van de Nederlandse zösterpazjena.

1. ↑ Parlement & Politiek - Partij voor de Vrijheid (PVV)
2. ↑ NOS - PVV wil in 30 gemeenten meedoen met verkiezingen
3. ↑ 1limburg - Lokale partijen grote winnaars raadsverkiezingen
4. ↑ 1limburg - PVV sleept 4 zetels binnen in Venlo

Politieke partieë in Nederlandj

50+ (50PLUS) — BBB (BoerBurgerBeweging) — BIJ1 — CDA (Christen-Democratisch Appèl) — CU (ChristenUnie) — D66 (Democraten 66) — DENK — FVD (Forum voor Democratie) — GL (GroenLinks) — JA21 (Juiste Antwoord 21) — NSC (Nieuw Sociaal Contract) — OPNL (Onafhankelijke Politiek Nederland) — PvdA (Partij van de Arbeid) — PvdD (Partij voor de Dieren) — PVV (Partij voor de Vrijheid) — SGP (Staatkundig Gereformeerde Partij) — SP (Socialistische Partij) — Volt (Volt Nederland) — VVD (Volkspartij voor Vrijheid en Democratie)