Sjrieve

Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.

Sjrieve is de waergaaf van 'n spraok in e tekstueel middel gebroekens 'n vergaoring van teikes of symboale ('t sjrif). Sjrieve wuèrtj óngersjeie van illustratie, wie 't sjiljere van grotteikeninge, en neet-symbolische menere veur 'n spraok te beware gebroekens neet-tekstueel middele, wie 'ne magneetbandj.

Sjrieve is 'n oetbreijing van de miensjelike spraok in d'n tied en de ruumdje. Sjrieve is wersjienlik begós in aoj culture es e bieproduk van politische expansie. Dees aoj culture hawwe e betroewbaar middel nuèdig veur 't euverbringe van infermaasje van de periferie nao 't centrum. Me heelj 'n (financieel) bookhaojing bie en sjreef historische gegaeves op. Rónjelóm 't veerdje millenium veur Christus óntgreudje de complexiteit van d'n hanjel en administraasje de meugelikheje van 't miensjelik ónthawd en woort sjrieve 'n betroewbaarder methood veur 't registrere en prizzentere van transaksjes in permanente vorm. Zowaal in Middel-Amerika es in 't Awd-Egypte zów 't sjrieve zich kónne höbbe óntwikkeldj oet 't biehaje van klenders en de politische noadzaak veur 't registrere van historische en netuurlike gebeurtenisse.