Poesia
Poesia es un forma de espresa imajinosa cual influe la spirito par la sona e imajes de sua parolas. Poesia es un de la artes la plu estendeda e antica. Orijinal fusada con musica en canta, poesia ia deveni autonom. Lo usa de ritmo es la prima cualia cual distingui poesia de prosa.
La metre es la nom per la ritmo cual asentua diferente la silabas de parolas. En alga linguas, ritmos poesial depende xef a longia de linia. Longia es determinada par la numero de silabas en un linia, par la numero de silabas asentuada en un linia, o par alga combina de numero e asentua. La plu de poesia en engles es iambic, cual es fada de divides o pedes cual alterna entre un silaba asentuada e nonasentuada en un ritmo levante. Poesistes usa ance otra modos, como asona (la repete de vocales) e aletera (repete de consonantes). En poesia, la sona contribui a la sinifia multe plu ca en prosa. La loca de un parola en la linia, un cambia de metre, e la usa de rima e otra varias sonal per distingui parolas xef es metodos no comun usada par scrivores de prosa (con alga esetas!).
Esemplos de ritmos (de du o tre silabas):
- iambo – nonasentuada - asentuada ("alo!")
- troceo – asentuada - nonasentuada ("cara")
- spondeo – asentuada - asentuada ("no, no!")
- piricio – nonasentuada - nonasentuada ("oce")
- datilo – asentuada - nonasentuada - nonasentuada ("bonia")
- anapesto – nonasentuada - nonasentuada - asentuada ("a la sol")
- amfibraco - nonasentuada - asentuada - nonasentuada ("a via")
Poesia es dividable entre lirica, naral (epica, balada, romanses metral, recontas poesial), e poesia dramosa (en situas spesifada). Poesistes, en la mundo intera, influe lunlotra, an en linguas diferente. Poesia resente de America Norde ia es ricida par la tecnicas surealiste e revoluinte par poesistes latina-american; la poesia franses ia impresa la poesia engles pos la concista normande en 1066; poesia xines ia influe la poesia japanes tra la sentenios; e la poesia elinica ia influe la poesia latina en la sentenio tre aec. Enscrives ieroglifo egiptian de 2600 aec ave tipos de poesia ancora reconosable aora: lamentas, odes, e imnos.
Poesias naral e lirica ia ave sua orijinas probable en emosias relijiosa. La plu antica de cantas o epicas reconta mitos de crea e de dios; epicas plu tarda reconta sur eroes cuasi divin; ancora plu tarda, los reconta de eroes istorial. En la SUA, revistas peti numerosa e dedicada per publici la poesias nova, multe universias ave poesiste-abitante, e leje de poesia par scrivores famosa o nova es videda como un sinia de la vive cultural en e estra la universia.
Vide alga formas diferente de poesias en la mundo.