Platon
Platon (437–347 aec) ia es la studiante la plu importante de Socrate. De un familia rica e potiosa, ua nom real ia es Aristocle. Platon es un nometa cual refere a sua spalas larga. Cuando el ia ave sirca dudes anios, el ia es encantada par Socrate e ia deside dedica se a la filosofia. Cuando Socrates ia mori, el ia es ruinada, e ia comensa vaga sirca Elas e la Mediteraneo, e ia es caturada par piratas. Sua amis ia colie mone per salva el de sclavia, ma el ia es librida sin la mone. Donce sua amis ia compra un imobila peti per comensa un scola – La Academia, fundida en 386 aec.
La Academia ia es simil a la comunia de Pitagora – un tipo de frateria parente relijiosa, do omes joven e rica studia la matematica, la astronomia, la lege, e la filosofia. La Academia no ia esije paias, ma ia depende intera de donadas. Longo sua ideales, Platon ia permete ance ce femes partisipa. La Academia ia deveni la sentro de aprende elinica per cuasi un milenio.
Lo es clar ce Platon ia es un idealiste e un razoniste, multe como Pitagoras, ma multe min mistica. El divide la realia en du partes: a un lado, nos ave ontos onta (ideas o la ideal). Esta es la realia esensal, eternal, spirital. A la otra lado, nos ave fenomena, cual es la realis de la ideal. Fenomenos es la pares, la cosas como los apare a nos, e es asosiada con la materia, la tempo e la spasio.
Fenomenos es alusinas cual putri e mori. Ideales es noncambiante, perfeta. Fenomenos es vera inferior ca ideales. La idea de un triangulo — la matematica de lo, la forma o la esense de lo — es eterna. Cualce triangulos individua, la triangulos de la mundo de la esperia dial, es nunca vera perfeta: los pote es alga curva, o la linias es alga spesa, o la angulos es no esata… Los pote sola prosimi acel triangulo perfeta e ideal.
Ideas es otenable sola par pensa; fenomenos es otenable par nosa sensas. Donce, per Platon, la pensa es multe superior per oteni la veria. Per esta razona, Platon es un razoniste, e no un empiriciste, en la epistemolojia.
La sensas pote sola dona a nos informas sur la mundo de fenomenos nonperfeta e eterna cambiante, e donce sola la sujestas de la realia ultima, e no la realia mesma. La razona vade direta a la idea. Nos pote "recorda" o reconose la veria par nosa intui, como Socrate dise en la conversa Menon.
Longo Platon, la mundo fenomenal labora per deveni ideal, perfeta, completa. Ideales es, en esta modo, fortias motivante. En fato, Platon dise ce la ideal es la mesma como la Dio e la bonia perfeta. La Dio crea la mundo de materia e formi la mundo en acorda con sua desinia – la ideas o la ideal. Si la mundo no es perfeta, esta no es par causa de la Dio o la ideales, ma car la materia cru no es perfeta. On pote vide perce la eglesa crististe prima ia deside ce Platon deveni un cristianiste onoral, an si el ia mori a tre e un dui de sentenios ante Cristo!
Platon aplica esta mesma dualisme a la umanas: la corpo es material, mortal e moveda (un vitima de causa); la spirito es ideal, nonmortal e nonmoveda (capas de vole libre).
La spirito inclui la razona, serta, e ance la consensia de se e un sensa moral. Platon dise ce la spirito cambia sempre per es bon, si lo reconose la bonia. Esta conseta de bonia e malia es simil a lo de la budistes: La malia no es un peca, ma un problem de iniora o nonconsensia. Donce, on nesesa instrui, e no puni, un person ci fa mal.
La spirito es atraeda a la bonia, la ideal, e en esta modo es atraeda a la Dio. Nos move en grados sempre plu prosima a la Dio par nosa vives individua e par reincarne. Nosa gol moral en la vive es deveni plu simil a la Dio, deveni plu prosima a la mundo pur de ideas e ideales, librinte nos de la materia, la tempo e la spasio. Nos gola es, en otra parolas, autoreali.