Nom personal
Un nom personal es un nom propre cual identifia un person individua. Lo es cuasi universal ce persones ave un nom. La esetas rara inclui casos de enfantes de jenitores demente o enfantes ci developa solitar. Un nom personal es en la plu casos donada a la enfante a nase or a un eda joven. La Conveni per la Diretos de Enfantes dise ce un nom personal es un direto de cada umana. (Vide Text of the Convention on the Rights of the Child per plu.)
La partes de nomes personal inclui la seguente:
- Nom individual: Universal.
- Nom padral (o patronim): Un nom fundida a la nom individual de la padre.
- Nom madral (o matronim): Un nom fundida a la nom individual de la madre.
- Nom familial: Un nom usada par tota membros de un familia.
- Nom (o nomes) media: La min comun.
En Europa, pos la perde de la sistem de nomes roman, la nomes familial ia es reintroduida comensante en Er en 916 e en England en 1086. La usa de nomes familial ia comensa en Frans en la sentenio 13 e Deutxland en la sentenio 16. En paises cual ia usa nomes padral, como Scandinavia, Cimri, etc, la usa de nomes familial ia comensa plu tarda. La usa de nomes familial obligada per lege ia comensa sirca 1539 en Frans, cuando la pretes ia es obligada recorda los en la arcivos de batisme. Ma usa obligada no ia comensa en Scandinavia asta la sentenio 20, e no es obligada en Island oji. Ante la usa de nomes familial, persones ia es clamada con un parola descrivente, la loca de la nase o abita de un person, sua ocupa, o la nom de un jenitor. Multe nomes familial moderna veni de un de estas.
En familias de la aristocratia, multe nomes media per onora asendentes, parentes, o alias political ia es comun. En familias comun, un nom media ia pote es simple un otra nom, o un nom ce onora un asendente o un parente. Femas sposida ia pote ave sua nom familial de ante sposi como un nom media. Multe familias catolica eleje un nom de un santa a la nase de un enfante, o plu tarde, a la rituo de serti. En alga paises la nom media es simple per difere persones con la mesma nomes prima.
En sosias de la este (Asia e la plu de Africa), los usa "la costum de la este:" La nom familial es prima, e la nom individual es final. En sosias de la ueste – America Norde, America Sude, Australia, e Europa (eseta Magiar) – la nom individual es prima, e la nom familial (o la nom padral en Island) es final. Esta es clamada "la costum de ueste." Ma, en listas o catalogos, los usa la costum de la este ance en la ueste, con un virgula entre la nomes. On ave ancora sosias en la mundo cual usa sola la nom individual. En elefen, on pote usa ambos la costum este o ueste.