Polandball

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Polandball (Polonia-bala), endemas yamado en lingua inglesa countryball (payis-bala), es un mem de internet kriado por un usador de la oja web alemana Krautchan.net en la sigunda parte de la anyada de 2009. El meme es uzado en munchos comics de internet, en los kualos los payis son amostrados komo balas ke avlan, djeneralmente en una lingua inglesa mal eskrita i las kualas se burlan ansina de los stereotips nasyonalos i de las liasiones internasyonalas entre eyos. El estil de comic es djeneralmente yamado Polandball (anke Polonia no este apresentada enel) o Countryball.

Orijin

Polandball tiene el su orijin en la gerra elektronika entre los uzadores polyakos de internet kon el resto del 'olam en drawball.com echa en Ogusto de 2009. Esta oja web, la kuala ofra a los uzadores azer desenos en una oja virtuala de kualunke tema dezeyado i endemas da lesensia para azer desenos enriva de los desenes echos por otros uzadores. Entre los uzadores polonezos, nasio la idea de desenar la bandera poloneza en una bala i diskues miles de polonezos endjuntos tomaron la bala con un desen blanko enriva i kolorado embasho, kon el biervo "POLSKA" eskrito entre las dos bandas. Diskues de akodrar kon el imageboard 4chan, este desen fue kuvijado kon una grande svastika. ^[1]^[2]

Krautchan.net es un imageboard en lingua almana, ke tiene un tablon /int/ uzado por munchos avlantes de la lingua inglesa. El orijin del meme es dado al uzador britaniko Falco, el kualo en Sietembre de 2009 krio el meme uzando Paint kon el buto de entrollar a Voyak, un uzador polonezo enel mismo forum ke ajusta uzando mal la lingua inglesa, lo kualo fue uzado por munchos usadores rusos para desenar comics de polandball.^[3]^[4]

Temas

Una Polandball ke apresenta a Espanya, liasionada kon la krisa de la Eurozona mientres ke ainda puede pagar djugadores de futbol karos.

Las polandballs se izieron mas konosidas diskues del aksidente aereo en Smolensk enel kualo fue amortado el presidente de Polonia Leh Kachinskiy, deke arepresenta a Polonia i la su istorya, la su liasion kon otros payises, stereotips i kompleksos nasyonalos.^[5] Lo avlado entre los payises-bala es jeneralmente eskrito uzando mal la lingua inglesa i munchos lashones de internet, ansina komo el mem Lolcat i ala fin, el desen de Polonia, el kualo es apresentado kon kolorado enriva del blanko (al kontrario de la bandiera poloneza), aparese yorando munchas vezes.

Alkunos comics de polandball son kriados basho el tema de ke la Rusia puede azer viajes verso el espasyo, mientres ke Polonia no. Una de las mas konosidas tiene el su empesijo kon la kreyensia de ke la Tierra va ser aharvada por un meteoro grande, lo kualo aze le los payises kon tekonolojia espasiala deshan la Tierra i tornan alderedor del planeta komo un satelit. Ala fin del comic, Polonia, ainda en la Tierra, esta yorando, i en lingua inglesa mal eskrita, dize "Poland cannot into space" (sic). Ansi, los rusos paran kualunke diskusyon kon los polonezos kuando yega el tema de kual payis es amijor. En otro comic de polandball, Polonia es vista avlando i avlando asta enfasyar a las otras payises-balas diziendo "kuando destruyímos Rossia i los turkos (sic) mozotros eramos el payis mas grande del 'olam...i..." aziendo ke los otros payises riyan. Antonses Polonia, fishugada, dize kurwa (lit. puta) i amostra un aviso ke dize "Internet serious business" ("Internet es un lavoro serio"), aviso ke es un slogan de internet uzado kon el buto de kavzar sehorá a kenes tratan temas sin dar atansion, ma komo siempre, eskapa yorando. ^[6]

Otros payises-balas

Un polandball puede ser un comic de otros payises, ma son todos jeneralmente yamados polandball, anke endemas se dize countryball. Asigun Lurkmore.to, Bavaria tiene la su bala apropiada, i otras balas se tienen kriadas para estados de los Estados Unidos, Katalunya i Siberya, entre otros. Singapur toma la forma de un triangulo o una trigona; Israel toma la forma de un iperkuvo (aziendo referensia a los fisikos famozos de orijin djudio); Kazahstan toma la forma de un bloko i el Reyno Unido aparese kon chapeyo i monokulo.^[7]

Estados Unidos uza lunetas, Eslovenia i Serbia yevan un parcho enel ojo (el kualo es el su eskudo) i Nepal tiene boka i facha de arrraviado. Otros payises-balas famozos son Dinamarka, Isola de Natal i la Isola del Koko.

Kuriositades

Polandball es paresida ala pokebala de Pokemon. A vezes la djente kreye ke una es la otra, deke la kolor kolorado kon blanko i tiene dos ojos.
Polandball da el su apoyo ala independensia de Katalunya, el Payis Basko, Kurdistan, Groenlandia, Tibet i otros.