Virginia Woolf

Virginia Woolf
	; (1927)
Biografía
Nacemento	(en) Adeline Virginia Stephen ; 25 de xaneiro de 1882 ; Londres, Reino Unido
Morte	28 de marzo de 1941 (59 anos); Lewes (Reino Unido)
Causa da morte	suicidio
Lugar de sepultura	Monk's House (en)
Residencia	Monk's House (en)
Relixión	Ateísmo
Educación	King's College de Londres
Actividade
Campo de traballo	Ensaio
Ocupación	novelista, crítica literaria, editora, escritora, activista polos dereitos das mulleres, autora de diarios, autobiógrafa, escritora de contos, ensaísta, autora
Período de actividade	1904 - 1941
Xénero artístico	Drama e Prosa
Movemento	Círculo de Bloomsbury
Profesores	Ernest de Sélincourt (pt) , Janet Elizabeth Case (pt) e Clara Pater (en)
Influencias	Jane Ellen Harrison e George Eliot
Obra
	Obras destacables (1925) A señora Dalloway; (1927) Cara ó faro; (1928) Orlando; (1929) Un cuarto de seu; (1931) The Waves (pt) ;
Arquivos en	Smith College [ MRBC-MS-00001]; University of Sussex Library (en) , fundo (pt) [ SxMs18]; E.J. Pratt Library (en) 65; Coleccións Especiais e Arquivos Universitarios da Universidade de Victoria, item (en) → correspondência (pt) SC100; Coleccións Especiais e Arquivos Universitarios da Universidade de Victoria, item (en) → correspondência (pt) SC015; Coleccións Especiais e Arquivos Universitarios da Universidade de Victoria, item (en) SC043; British Library ; McMaster University Library (en) ; New York Public Library Main Branch (en) Berg Coll MSS Woolf; Centro Harry Ransom ; King's College de Londres ;
Familia
Cónxuxe	Leonard Woolf (1912–1941)
Parella	Vita Sackville-West
Pais	Leslie Stephen e Julia Prinsep Stephen
Irmáns	Vanessa Bell; Thoby Stephen; Adrian Stephen; George Herbert Duckworth; Stella Duckworth; Gerald Duckworth; Laura Stephen
	Sinatura
	Voz: Virginia Woolf
Descrito pola fonte	Grande Enciclopedia Soviética 1969-1978, (sec:Вулф Вирджиния); Biblioteca dixital BEIC; Obálky knih,

Adeline Virginia Stephen, coñecida como Virginia Woolf, nada en Londres o 25 de xaneiro de 1882^[1] e finada en Rodemell o 28 de marzo de 1941, foi unha escritora e ensaísta británicaautora de novelas, contos, obras teatrais e demáis obras literarias; considerada unha das más salientables figuras do vanguardista modernismo anglosaxón do século XX e do feminismo internacional.^[2]

Traxectoria

Vida persoal

Filla de sir Leslie Stephen, distinguido crítico e historiador,^[1] Virginia Woolf creceu nun ambiente frecuentado por literatos, artistas e intelectuais. Tralo falecemento do seu pai, en 1905, estableceuse coa súa irmá Vanessa (pintora que casaría co crítico Clive Bell) e os seus dous irmáns no barrio londiniense de Bloomsbury, que se converteu en centro de reunión de antigos compañeiros universitarios do seu irmán máis vello, entre os que figuraban intelectuais do talle do escritor E. M. Forster, o economista John Maynard Keynes e os filósofos Bertrand Russell e Ludwig Wittgenstein, e que sería coñecido como o grupo ou círculo de Bloomsbury. En 1912, cando contaba trinta anos, casou con Leonard Woolf, economista e membro tamén do grupo, con quen fundou en 1917 a soada editorial Hogarth Press, que editou a obra da propia Virginia e a doutros relevantes escritores, como Katherine Mansfield, T. S. Eliot ou Sigmund Freud.

Novelística

As súas primeiras novelas, Viaxe de ida e Noite e día, poñen xa de manifesto a intención da escritora de romper os moldes narrativos herdados da novelística inglesa anterior, en especial a subordinación de personaxes e accións ao argumento xeral da novela, así como as descricións de ambientes e personaxes tradicionais; con todo, estes primeiros títulos apenas mereceron consideración por parte da crítica. Só trala publicación de A señora de Dalloway e Ao faro os críticos comezaron a eloxiar a súa orixinalidade literaria. Nestas obras chaman xa a atención a mestría técnica e o afán experimental da autora, quen introducía ademais na prosa novelística un estilo e unhas imaxes ata entón máis propios da poesía. Desaparecidas a acción e a intriga, as súas narracións esfórzanse por captar a vida cambiante e inasible da conciencia. Influída pola filosofía de Henri Bergson, Woolf experimentou con especial interese co tempo narrativo, tanto no seu aspecto individual, no fluxo de variacións na conciencia do personaxe, como na súa relación co tempo histórico e colectivo. Así, Orlando constitúe unha fantasía libre, baseada nalgunhas pasaxes da vida de Vita Sackville-West, amiga e tamén escritora, en que a protagonista vive cinco séculos da historia inglesa. En As ondas presenta o «fluxo de conciencia» de seis personaxes distintos, é dicir, a corrente preconsciente de ideas tal como aparece na mente, a diferenza do lóxico e ben trabado monólogo tradicional. Escribiu así mesmo unha serie de ensaios que viraban en torno da condición da muller, nos que destacou a construción social da identidade feminina e reivindicou o papel da muller escritora, como n'Un cuarto de seu. Destacou á súa vez como crítica literaria, e foi autora de dúas biografías: unha divertida recreación da vida dos Browning a través dos ollos do seu can (Flush) e outra sobre o crítico R. Fry (Fry). Nun dos accesos dunha enfermidade mental que obrigara a ingresala en varias ocasións ao longo da súa vida, o 28 de marzo de 1941 desapareceu da súa casa de campo, ata que días despois o seu corpo foi achado no río Ouse, no que se supón foi un suicidio, xa que se guindara ao río cun abrigo cargado de pedras.

Obra

Varias das obras de Virginia Woolf foron xa traducidas ao galego.

The Voyage Out (1915).
Night and Day (1919).
Jacob's Room (1922).
A señora Dalloway (Mrs Dalloway, 1925). Tradución de Celia Recarey Rendo (Irmás Cartoné: 2018).
Cara ó faro (To the Lighthouse, 1927). Limiar, tradución e notas de Manuela Palacios e Xavier Castro (Sotelo Blanco Edicións: 1993).
Orlando. Unha biografía (1928). Tradución de Celia Recarey Rendo (Irmás Cartoné: 2014).
Un cuarto de seu (A Room of One's Own, 1929) Tradución de Iria Sobrino, con prólogo de Manuela Palacios (Sotelo Blanco Edicións: 2005).
As ondas (The Waves, 1931). Tradución de María Cuquejo (Editorial Galaxia: 2004).
Flush: A Biography (1933).
The Years (1937).
Three Guineas (1938).
Roger Fry: A Biography (1940).
Entre os actos (Between the Acts, 1941). Tradución de Elisa Alfaya (Editorial Urutau, 2022)
Ruar: unha aventura londiniense (The London Scene, 1975), Tradución de Celia Recarey Rendo (Irmás Cartoné: 2015).

Ademais, foron traducidos ao galego os relatos Retrato dunha londiniense (Portrait of a Londoner), A marca na parede (The Mark on the Wall), Kew Gardens, Unha novela non escrita (An Unwritten Novel) e A muller no espello: un reflexo (The Lady in the Looking-Glass), publicadas en De espellos, trens e outros velenos, traducidos, prologados e anotados por Begoña R. Outeiro (Ir Indo: 2006)^[3].

Obras da crítica galega

Doce ensaios arredor de Virginia Woolf. Coordinado por Belén Fortes. (Sotelo Blanco, 2003).

Filmografía

The Hours, 2002. Director: Stephen Daldry. Tres historias de tres mulleres en diferentes épocas entramadas a partir da novela do mesmo nome do autor Michael Cunningham, inspirada na obra de Woolf Mrs Dalloway.