Resurs

Resurs é unha familia de satélites de observación da Terra soviéticos e rusos.^[1]

Os satélites Resurs comezaron sendo satélites derivados dos satélites de recoñecemento Zenit para fins civís. O seu obxectivo era a busca e investigación de recursos naturais de interese para a Unión Soviética e como forma de cooperación internacional. O primeiro satélite Resurs foi lanzado en 1979. Os primeiros Resurs usaban cápsulas para devolver a película fotográfica a terra para ser revelada e examinada. Versións máis avanzadas xa enviaban as imaxes por radiocomunicacións.^[1]

Os primeiros satélites Resurs usaban a denominación F1, da que houbo tres series, cada unha cun índice GRAU distinto (17F40, 17F41 e 17F43). A diferenza entre as tres series non está clara. Os Resurs-F1 17F40 foron os primeiros satélites Resurs e, ao igual que os Zenit, usaban o método de devolver a terra a película fotográfica despois de tomar imaxes das zonas de interese. Funcionaban usando unha batería en vez de paneis solares, o que lles daba unha autonomía de 14 días aínda que podían aguantar dez días adicionais en modo de baixo consumo. Usaban o sistema fotográfico Priroda-4, que consistía nun sistema con tres canais multiespectrais usando dúas cámaras KFA-1000 e tres KATE-200. A resolución máxima conseguida era de 5 metros. Lanzáronse 53 Resurs-F1 entre 1979 e 1993, con só dous fallos.^[2][3][4]

Os Resurs-F1M eran unha versión mellorada dos Resurs-F1M. Seguían usando o método de retorno mediante cápsula e só se lanzaron dúas unidades, en 1997 e 1999.^[5]

Os Resurs-F2 estaban baseados nos Resurs-F1 e usaban paneis solars como fonte de enerxía, o que lles permitía permanecer ata 30 días en órbita. Usaban o sistema de imaxe SA-M, consistente en catro cámaras MK-4 cunha resolución de ata 5 metros e cunha capacidade de xeolocalización superior ao relacionarse co sistema de indización estelar SA-3R de a bordo. Lanzáronse dez Resurs-F2, todos a bordo de foguetes Soiuz U, entre 1987 e 1995.^[6]

Resurs-OE foi un prototipo para dos satélites Resurs-OE. Foi lanzado o 24 de xullo de 1983 mediante un foguete Vostok 2M. Usaba o mesmo bus que os satélites meteorolóxicos Meteor 2 en lugar de basearse nos satélites Zenit. Reentrou na atmosfera terrestre o 28 de xaneiro de 2013.^[7]

Os Resurs-O1 foron os primeiros Resurs en usar un bus diferente ao dos satélites Zenit, usando o mesmo bus que os Meteor 2. Transmitían as imaxes directamente a terra en lugar de usar unha cápsula co material fotográfico. Como instrumentos levaban a bordo dous exploradores multiespectrais de alta resolución e dous de media resolución (só un no Resurs-O1 número 2). Lanzáronse tres Resurs-O1, os dous primeiros mediante foguetes Vostok 2M e o terceiro mediante un Zenit 2, en 1985, 1988 e 1994.^[8][9]

Resurs-O1 4 estaba baseado no bus dos satélites Meteor-3. Levaba máis instrumentación que os seus antecesores: un explorador multiespectral de alta resolución, un de media resolución, unha cámara de televisión para estudar a luz reflectida pola superficie e atmosfera terrestres, un medidor de radiación, un medidor de irradiación solar, un telescopio de partículas cargadas e un radiómetro. Foi lanzado o 10 de xullo de 1998 mediante un foguete Zenit 2.^[10]

Resurs-DK ou Resurs-DK 1 foi un satélite da familia Resurs lanzado para a busca de recursos naturais, facer estudos ecolóxicos, servir de baliza para emerxencias mariñas, estudar a superficie do mar e do xeo, as condicións meteorolóxicas nas zonas polares e para servir de ligazón entre estacións terrestres. Estaba baseado nos satélites Yantar-4KS1M e levaba unha cámara pancromática de barrido cunha resolución de 0,9 m. Levaba acaroado o experimento rusoitaliano PAMELA para o estudo dos raios cósmicos e o experimento ARINA para a investigación de electróns e protóns de alta enerxía. Cunha masa de 6570 kg, foi lanzado o 15 de xuño de 2006 mediante un foguete Soiuz U. Deixou de funcionar en 2016.^[11]

Os satélites Resurs-P están baseados no Resurs-DK 1 e usan un sistema de cámaras cunha resolución de 1 m. A bordo levan tamén o sistema AIS de seguimento e recepción de sinais de buques.^[12]

• Soiuz U
• Vostok 2M
• Zenit 2
• Soiuz 2-1b