Morchella

Cogomelos de coresma (xénero Morchella)
Clasificación científica
Reino: Fungi División: Ascomycota Subdivisión: Pezizomycotina Clase: Pezizomycetes Orde: Pezizales Familia: Morchellaceae Xénero: Morchella
Especies
Morchella angusticeps Morchella conica Morchella costata Morchella crassipes Morchella elata Morchella esculenta Morchella gigas Morchella semilibera Morchella spongiola Morchella spongiola var. dunensis Morchella vulgaris Morchella sp. MA4SSI73 Morchella sp. UC 1475091

Morchella é un xénero de fungos ascomicetos comestíbeis, caracterizados por posuír ascocarpos de aspecto reticulado. Son moi apreciados polos cociñeiros franceses e españois. O nome culinario en francés é morille; en galego coñécense como cogomelos de coresma^[1], especialmente a especie Morchella esculenta, ou pantorras.^[2]

Formadas por un esteo abrancazado que sostén un chapeu en forma esférica, arredondada ou ovoide, de 6 a 10 cm de largo, da cor da palla rosada ou do mel, cunha forma característica semellante a un avespeiro. O pé, que tamén está baleiro, é abrancazado. A carne é feble e moi escasa e practicamente inodora.

O cogomelo de coresma é unha das especies comestíbeis de fungos que medran na Patagonia andina. O fungo en xeral é de cor dourada-marrón con chapeu alongado, semellante á árbores, con consistencia esponxosa.

Estes cogomelos son moi difíciles de atoparen, pois áchanse de xeito illado e é moi difícil distinguilos a simple vista. Só coa vista aguda e experta dun bo apañador de cogomelos se logra achalos.

Estes cogomelos non se poden consumir crus pola súa toxicidade (conteñen hemolisinas termolábiles (TLH), proteínas que creban as membranas celulares de eritrocitos, leucocitos e plaquetas, e que se alteran ou descompoñen por acción da calor), segundo os expertos cómpre combinar o enxugado e a coza, así que se son frescos, primeiro deben enxugarse, despois rehidratarse (desbotando a auga) e a seguir cociñárense uns 30 minutos a unha temperatura entre 70 e 90 °C.

Deste xeito constitúen un excelente alimento polo seu delicado sabor e recendo exquisito, especial para mollos e saborizar comidas.

Wikimedia Commons ten máis contidos multimedia na categoría:  Morchella

• Cogomelo de coresma

• Como cultivar cogomelos de coresma (Morchela angusticeps) pola empresa galega Hifas da Terra. (en castelán)