Mr. T

Mr. T
akteur
persoanlike bysûnderheden
echte namme	Laurence Tureaud
nasjonaliteit	Amerikaansk
berne	21 maaie 1952
berteplak	Chicago (Illinois)
etnisiteit	Afro-Amerikaansk
jierren aktyf	1980 – no
offisjele webside
Mr. T op Twitter

Mr. T (útspr. ['mɪstəɹ ti:], likernôch: "mister tii"; wiere namme: Laurence Tureaud; Chicago, 21 maaie 1952) is in Amerikaansk akteur en presintator fan Afro-Amerikaansk etnysk komôf. Hy waard ferneamd yn 'e rollen fan hierling B.A. Baracus yn 'e tillefyzjesearje The A-Team en as bokser Clubber Lang yn 'e film Rocky III. Dêrnjonken hat er ek aktyf west as Amerikaansk wrakselder en as presintator fan û.m. de realityshow I Pity the Fool. Hy stiet fral bekend om syn Mandinka-krigerskapsel, syn gouden juwiellen en syn imago as stoere keardel.

Mr. T waard yn 1952 berne yn Chicago, yn 'e Amerikaanske steat Illinois, as de jongste soan yn in gesin mei tolve bern. Syn heit, Nathaniel Tureaud sr., wie in predikant. Mr. T groeide op mei syn fjouwer susters en sân bruorren yn in trijekeamerappartemint yn in min boud en ûnderholden flatgebou yn in tige earme buert, de Robert Taylor Homes, dêr't in soad miljeufersmoarging wie. As bern, en letter as tiner, wied er geregeldwei tsjûge fan moard, ferkrêfting en oare misdriuwen. Nei eigen sizzen tanket er syn oerlibjen en syn lettere súkses oan 'e wisberettens fan syn heit om it goede te dwaan en oan 'e leafde fan syn mem.

Yn syn tinerjierren gie Mr. T nei de Dunbar Vocational High School, dêr't er lid wie fan it Amerikaansk fuotbaltiim en fan it wrakseltiim, en dêr't him boppedat de begjinsels fan 'e fjochtsport bybrocht waarden. Yn dy tiid wied er twa jier efterinoar yn syn leeftydskategory de kampioen wrakseljen fan hiel Chicago. Dêrmei wûn Mr. T in stúdzjebeurs foar de Prairie View A&M Universiteit yn Prairie View (Teksas), dêr't er wiskunde studearre, mar al nei ien jier fan skoalle stjoerd waard.

Dêrop naam Mr. T tsjinst yn it Amerikaanske Leger, dêr't er yndield waard by it Korps Militêre Plysje. Yn novimber 1975 krige er in brief fan oanrikkemandaasje fan syn sersjant-ynstrukteur om't er as bêste rekrút nei foarren kommen wie út in syklus fan 6.000 man. Mei waard er ta lieder fan syn seksje beneamd. Yn july 1976, doe't er wat misdien hie, bestrafte de sersjant fan syn peloton Mr. T troch him de opdracht te jaan om beammen om te kapjen. Hy hie der lykwols net by sein hoefolle, dat Mr. T kappe tusken healwei sânen en tsien oere moarns mear as santich beammen om, oant in skokte majoar him fertelde dat it sa wol ta koe.

Nei't er ôfswaaid wie út it leger, besocht Mr. T en wurdt profesjoneel spiler fan Amerikaansk fuotbal. Hy die audysje foar de Green Bay Packers, in tiim út Green Bay (Wiskonsin) dat yn 'e National Football League (NFL) útkaam, mar waard ôfwiisd fanwegen in blessearre knibbel. Dêrop naam Mr. T in baan oan as útsmiter by in nachtklub. It wie yn dy tiid dat er it personaazje fan Mr. T kreëarre dêr't er letter ferneamd mei wurde soe, troch syn burd groeie te litten en syn hier yn it kapsel fan in Westafrikaanske Mandinka-kriger te dragen, mei de sydkanten fan syn holle kealskeard en in rjochtopsteande kaam fan hier yn 'e midden dy't fan syn foarholle oant syn efterholle rûn. Hy hie dy hierstyl foar it earst sjoen yn it tydskrift National Geographic, en it liek him in moai earbetoan oan syn Afrikaanske foarâlden.

Syn dragen fan in protte juwiellen kaam fuort út it feit dat nachtklubbesikers geregeldwei spul ferlearen of efterlieten nei in gefjocht, dat hy dan yn beslach naam en de rest fan 'e jûn droech. It idee dêrefter wie dat immen dy't derút set wie, gjin reden hawwe soe om wer nei binnen ta as Mr. T, dy't foar de bûtendoar stie, syn eigendommen by him hie. As sa'n persoan der om kaam, koed er der de útsmiter gewoan om syn spul freegje en dan koed er it weromkrije sûnder dat der fierder noch geweld oan te pas hoegde te kommen. It dragen fan juwiellen befoel lykwols sa goed, dat Mr. T al rillegau syn eigen begûn oan te skaffen. Behalven om dronken rûzjesikers derút te setten, wie it doedestiden benammen de taak fan Mr. T om drugdealers en drugsferslaafden út 'e nachtklub te hâlden. Yn syn tiid as útsmiter wied er belutsen by mear as twahûndert slaanderijen en dêrfoar waard er ferskate kearen oanklage, mar hy wûn eltse rjochtsaak.

Nei ferrin fan tiid wist Mr. T syn baan as útsmiter om te setten yn in karriêre as liifwacht, dy't hast tsien jier duorre. Yn dy snuorje beskerme er û.o. 16 prostituees, 10 leararen, 9 útkearingsberjochtigen, 5 predikanten en 4 winkellju. Neigeraden dat syn reputaasje oanwoeks, krige er in almar better beteljende kliïntêle, wêrûnder 8 bankiers, 7 moadeûnwerpers, 7 rjochters, 6 topsporters, 5 modellen, 3 politisy en, úteinlik, 42 miljonêrs. Bekende klanten fan sines wiene boksers Muhammad Ali en Joe Frazier, sjongers Diana Ross en Michael Jackson en akteur Steve McQueen. Foar sokke klanten rekkene er $3.000 oant maksimaal $7.000 deis, ôfhinklik fan it risiko dat er rûn en de lokaasje dêr't er hinne reizgje moast. In protte fan dat jild gie op oan 'e oankeap fan nije juwiellen, en tsjin it begjin fan 'e jierren tachtich rûn Mr. T om mei halskeatlings, earmbannen, ringen en earbellen ter wearde fan $300.000, dêr't er moarns in oere mei oan 'e gong wie om it om te dwaan, en de measte jûnen noch langer om it skjin te meitsjen en op te poetsen.

Behalven it 'normale' befeiligingswurk waard Mr. T ek ferskate kearen frege foar aparte putsjes, lykas it opspoaren fan bern dy't fan hûs fuortrûn wiene en oare fermiste persoanen en it ynjen fan skulden, sa nedich mei geweld. Ien kear waard him frege yn ruil foar $75.000 immen te fermoardzjen. Dat wegere er, en nei eigen sizzen besocht er it doelwyt fan 'e hiermoard te warskôgjen, mar de man kaam om by in ferkearsûngemak ear't er him opspoare koe.

Ein jierren santich wûn Mr. T fierders twa jier efterinoar de krêftsportkompetysje America's Toughest Bouncer ("Amerika's Hurdste Utsmiter"), by de twadde wêrfan't ek in bokswedstryd ynbegrepen wie. Doe't er ynterviewd waard troch de bekende Amerikaanske sportferslachjouwer Bryant Gumbel, seid er: "It muoit my slim foar de fint dy't tsjin my bokse moat. It spyt my wier foar him." Dy útspraak (I just feel real sorry for him) soe letter weromkomme yn 'e film Rocky III as I pity the fool (letterlik: "Ik haw begrutsjen mei de suffert"), dat min ofte mear Mr. T syn motto waard. Hy fersloech syn tsjinstanner nammentlik yn minder as 54 sekonden, en doe't akteur Sylvester Stallone it programma yn 1980 op 'e tillefyzje seach, wist er dat er Mr. T hawwe woe foar syn film.

Hoewol't Mr. T syn rol yn Rocky III oarspronklik mar in pear regels tekst omfetsje soe, waard er úteinlik cast yn 'e rol fan Clubber Lang, de wichtichste antagonist, dy't it as bokser opnimt tsjin 'e haadpersoan Rocky Balboa (spile troch Sylvester Stallone). Neitiid die Mr. T audysje foar de rol fan 'e mentor fan 'e haadpersoan yn 'e fantasyfilm The Beastmaster, dy't er lykwols net krige om't dy nei John Amos gie. Wol hied er in rol yn in twadde boksfilm, Penitentiary 2, en yn in ôflevering fan 'e Kanadeeske sketchkomeedzjesearje Bizarre, wêryn't er it opnaam tsjin Super Dave Osborne, dy't er fersloech en doe opiet.

Yn 1983 akseptearre Mr. T de rol fan sersjant B.A. Baracus, in geniale monteur mei fleaneangst, yn 'e aksjesearje The A-Team. Dy searje gie oer in groepke âld-kommando's út it Amerikaanske Leger dy't falsk beskuldige wiene fan ûndúdlike misdieden en sûnt op 'e flecht wiene foar de autoriteiten. Om de kost te fertsjinjen, wurken se as hierlingen, wêrby't se it stiiffêst opnamen foar de swakkeren yn 'e maatskippij. Mr. T syn fêste tsjinspilers yn 'e searje wiene George Peppard, Dirk Benedict en Dwight Schultz. B.A. Baracus wie de bekendste rol fan Mr. T, mei't The A-Team in ûnbidich populêre searje wie, dy't rûn oant en mei 1987. Tsjin 'e ein fan dy perioade soed er wyks $80.000 oan salaris foar aktearwurk en $15.000 oan bykommende ynkomsten fertsjinne hawwe.

Troch de rom dy't The A-Team him joech, waard Mr. T frege foar in gastrol yn 'e komeedzjesearje Diff'rent Strokes, en teffens late it ta de opname fan 'e tekenfilmsearje Mister T, wêryn't er syn stim liende oan syn eigen personaazje, de eigner fan in sportskoalle dy't syn learlingen helpt by it oplossen fan misdieden. De film DC Cab (1983), mei û.o. Gary Busey, waard hielendal om Mr. T hinne gearstald en gie oer in krap by kas sittend taksybedriuw yn Washington, D.C. Yn 1984 naam Mr. T in motivaasjefideo op mei de titel Be Somebody... or Be Somebody's Fool! Dêryn joech er advizen oan bern, lykas hoe't se har modieus klaaie koene sûnder dat se djoere merkklean hoegden te keapjen en hoe't se har lulkens behearskje moasten, wylst er ferskate ferskes song en rapte. De raps wiene skreaun troch Ice-T.

Yn 1985 begûn Mr. T yn it ferlingde fan syn aktearwurk oan in karriêre yn it Amerikaansk wrakseljen. Dêrby naam er as partner fan 'e bekende Hulk Hogan diel oan it earste WrestleMania-evenemint fan 'e World Wrestling Federation (WWF), dy't sy wûnen. Neffens Hogan syn autobiografy wegere de befeiliging by dy gelegenheid om Mr T. syn entoeraazje yn it gebou te litten. Dêrop woe Mr. T sels ek wer nei hûs oant Hogan him oerhelle om dochs oan it evenemint mei te dwaan. Roddy Piper, better bekend ûnder syn artystenamme Rowdy, ien fan 'e tsjinstanners fan Mr. T en Hulk Hogan op WrestleMania I, ferklearre letter dat hy en oare Amerikaansk wrakselders Mr. T net lije mochten om't er in akteur wie en gjin echte wrakselder. Dat wie wol wat in aparte útspraak, yn oanmerking nommen dat Amerikaansk wrakseljen gjin echte sport is, mar in kabareteske foarstelling fan goreografearre gefjochten. Mr. T bleau oant 1986 by de WWF belutsen. Letter joech er him by it World Class Championship Wrestling (WCW), dêr't er û.m. skiedsrjochter wie by de wedstryd fan Hogan tsjin Ric Flair yn 1994.

Yn 1988, nei't The A-Team stopset wie, spile Mr. T mei aktrise Alex Amini yn 'e Kanadeeske searje T. and T. Letter spile er noch yn ferskate oare searjes en tillefyzjefilms, benammen yn gastrollen en kameo's. Der waard him ek in kameoroltsje oanbean yn 'e filmadaptaasje fan The A-Team, mar dat oanbod sloech er ôf, hoewol't Dirk Benedict en Dwight Schultz der wol op yngiene (George Peppard wie yn 1994 stoarn). Tsjin 'e ein fan 'e jierren njoggentich ferskynde Mr. T lykwols inkeld noch út en troch ris yn reklamespotsjes, wat te witen wie oan sûnensswierrichheden. Nei 2000 wied er benammen aktyf as stimakteur, en yn 2006 presintearre er de realityshow I Pity the Fool, wêrfan't de titel basearre wie op syn útspraak as Clubber Lang. Yn juny 2011 died er fierders de presintaasje fan it tillefyzjeprogramma World's Craziest Fools, op 'e BBC, dêr't er humoristysk kommentaar joech by home video's en filmkes fan bewekkingskamera's fan misrûne dingen.

Yn 1984 brocht Mr. T in album út mei as titel Mr. T's Commandments, mei ferskes wêryn't er bern oanrette om fan drugs ôf te bliuwen. Datselde jiers ferskynde noch in twadde album, Mr. T's Be Somebody... or Be Somebody's Fool!, mei muzyk út syn film mei deselde namme. Yn 2002 wurke Mr. T mei oan 'e fideoklip fan it nûmer Pas the Courvoisier, Part II fan Busta Rhymes mei P. Diddy en Pharell Williams, wêryn't er in barkeeper spile.

Mr. T is in werberne kristen. Yn 1987 ûntstie der in lyts skandaal doe't er de oare ynwenners fan Lake Forest, in foarstêd fan Chicago, tsjin him yn it harnas jage om't er mear as hûndert ikebeammen op syn hiem omseage hie. Dat ynsidint wurdt no it Lake Forest Chain Saw Massacre neamd. Yn 1995 waard by Mr. T T-cellymfoom fêststeld, in foarm fan kanker oan 'e lymfeklieren. Nei't er yn 2005 nei New Orleans west hie om 'e slachtoffers fan 'e orkaan Katrina te helpen, hold er op mei it dragen fan al syn goud, mei't er it gekoanstekkerich en dekadint fûn nei't er mei minsken omgien wie dy't alles kwytrekke wiene.

• (in) Mr. T op Twitter
• (in) Folsleine filmografy fan Mr. T yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons  Ofbylden dy't by dit ûnderwerp hearre, binne te finen yn de kategory Mr. T fan Wikimedia Commons.