Sima Qian

Sīmǎ Qiān (cinês tradizionâl: 司馬遷, cinês semplificât: 司马迁, Wade-Giles: Ssŭma Ch'ien; nassût intor al 145 p.d.C.; † intor il 90 p.d.C.) al fo un scritôr e un storic cinês.

Al vivè sot il ream dal imperadôr Hàn Wǔdì (141 p.d.C.-87 p.d.C.), inte dinastie Hàn, e so pari, Sīmǎ Tán (司馬談 / 司马谈) al ere scritôr dai anuaris de cort, incjarie a mieze vie enfri chê di un strolic e chê di un cronist, che a compuartave il cjapâ note dai fats dal cîl, e de lôr influence, tantche dai fats dai oms. La famee di Sīmǎ Qiān a cjapà cjase a Maoling, dongje la capitâl Cháng'ān.

Sīmǎ Qiān al veve une grande inteligjence e zà a dîs agns al ere bon di lei libris antîcs. A vincj agns, al completà la sô istruzion viazant par plui provinciis, tantche chês di Jiangsu, Anhui, Zhejiang, Hunan e Henan. Plui tart, al lavorà par il guvier, fasint in particolâr une mission d'ispezion inte regjon di chê che indidivuê e jè la citât di (te province dal Yúnnán), concuistade da pôc des fuarcis imperiâls. Las sôs funzions i permeterin ancje di fâ altris viaçs un tic in dutis lis bandis dal imperi, gjavant cualchi regjon che in chê volte e jerin cunsideradis inmò barbarichis, tantche lis provinciis di Fujian e di Guangdong.

Il tal 107 p.d.C., daspò três agns di corot pe muart di so pari, Sīmǎ Qiān a i sucedè tal so puest di anuarist, e chest a i permetè di jentrâ intai archivis imperiâi, podint cussì realizâ il lavôr ambizionôs di bielzà scomençât da so pari: un libri che al contàs dute le storie de Cine.

Sīmǎ Qiān al començà a scrivi tal 104 p.d.C. Ma tal 99 p.d.C. al colà in disgracie tai vôi dal'imperadôr Wǔdì. La sô colpe al ere di vê difindût Lǐ Líng, un gjenerâl incolpât di tradiment (che Sīmǎ Qiān lu stimave, ancje se nol ere so amî). L'imperadôr al condanà Sīmǎ Qiān a sielzi tra jessi cjastrât o jessi justiziât. Claramenti, di chei timps jessi cjastrâts al voleve dî l'infamie e cetancj Cinês a varessin volût inant murî pluitost che vivi tal disonôr. Sīmǎ Qiān, invecit, al sielzè la vite, par finî la sô opare e mantegni la promesse fate a so pari. In tal 104 p.d.C. al finì il so lavôr; vot agn daspò, tal 96 p.d.C., l'imperadôr i dè l'amnistie, cjapantlu a lavorâ tantche segretari privât, puest riservât ai cjastrâts.

Il lavôr di Sīmǎ Qiān al à non Shǐjì (史記, memoriis storichis), e al cjape dentri oltri doimil agns di storie cinese, scomençant de liende dal Imperadôr Zâl (Huáng Dì) fintremai al imperadôr Hàn Wǔdì de dinastie dinastie Han. Chest test al è cunsiderât il fondament de storiografie cinese.

Siben che la forme de scriture storiche, intal timp, e je mudade cetant, i storics daspò di lui, no dome cinês, ma ancje coreans e gjaponês ai àn simpri tignût cont dal so esempli, fintremai dai timps di Bān Gù (班固), che a lu sielzè tantche model tal scrivi il sô libri Hàn Shū (漢書, Libri dai Hàn di prime). Ma il so esempli al si slargjà, plui in gjenerâl, su dute la scriture in prose cinese, e ancjemò vuê si lu lei in dut il mont no dome tantche storic, ma ancje come "libri di test" pe lenghe cinese antighe.

Il so libri nol va daûr al ordin dai fats, ma al è organizât par materie. Il test al si slargje su 130 cjapitui organizâts par sogjets tantche i anuâi, lis cronichis, i tratâts di musiche, ceremoniis, lunaris, religjon, economie, e soredut, biografiis. Il so stîl al è caraterizât da la serietât de informazion storiche, il doprament dai discors direts, il lengaç semplis, informâl, plen di spirt e di variazions, lant ae sostance cence pierdi timp in descrizions.

Sīmǎ Qiān al à vût scrit ancje vot rapsodiis (Fù, 賦), cuantche al stave te provincie di Hanshu, mostrant i siei patiments in tal timp de sô orende condane e la sô voe di no rindisi in tal scrivi la sô grande storie.

• Records of the grand historian, CUP, Hongkong 1993, ISBN 0-231-08167-7
• Vies de Chinois illustres, Picquier, Arles 2002, ISBN 2-87730-611-9

• Sepolture e templi dai antenâts di Sīmǎ Qiān