Juliusz Słowacki

Juliusz Słowacki
Portread o Juliusz Słowacki gan James Hopwood yr Ieuaf
Ganwyd	4 Medi 1809  Kremenets
Bu farw	3 Ebrill 1849  Paris
Dinasyddiaeth	Ymerodraeth Rwsia, Brenhiniaeth Gorffennaf, yr Ail Weriniaeth Ffrengig, Gwlad Pwyl
Alma mater	Prifysgol Vilnius
Galwedigaeth	bardd, diplomydd, cyfieithydd, dramodydd, llenor, athronydd
Cyflogwr	Prifysgol Vilnius
Adnabyddus am	Kordian, Balladyna
Prif ddylanwad	Andrzej Towiański, Adam Mickiewicz, Jakub Wujek
Tad	Euzebiusz Słowacki
Mam	Salomea Slowacka
Llinach	Q63531221
llofnod

Bardd a dramodydd o Wlad Pwyl oedd Juliusz Słowacki (4 Medi 1809 – 3 Ebrill 1849). Gyda Adam Mickiewicz a Zygmunt Krasiński, fe'i adnabyddir yn un o'r Tri Bardd (Pwyleg: Trzej Wieszcze) gwychaf yn y cyfnod Rhamantaidd yn llên Gwlad Pwyl.

Ganed ef yn Kremenets yn Llywodraethiaeth Volyn, Ymerodraeth Rwsia. Penodwyd ei dad, Euzebiusz Słowacki, yn athro rhethreg a barddoniaeth ym Mhrifysgol Ymerodrol Vilnius ym 1811. Astudiodd Juliusz y gyfraith ym Mhrifysgol Ymerodorol Vilnius o 1825 i 1828. Aeth i Warsaw, prifddinas Gwlad Pwyl y Gyngres, ym 1829 ac yno cafodd swydd yn y trysorlys. Yn sgil Gwrthryfel Tachwedd 1830, ymunodd â'r corfflu diplomyddol yn y llywodraeth chwyldroadol dan yr Arlywydd Adam Jerzy Czartoryski. Aeth i Dresden (Teyrnas Sachsen), Paris (Teyrnas Ffrainc), a Llundain (Teyrnas Prydain Fawr ac Iwerddon), fel negesydd ar ran Czartoryski mae'n debyg, cyn i'r gwrthryfel fethu yn Hydref 1831.

Treuliodd Słowacki y cyfnod 1833–35 yn y Swistir, ac ym 1836, pan oedd yn yr Eidal, cyfansoddodd ei gerdd eidylaidd W Szwajcarii ("Yn y Swistir", cyhoeddwyd 1839). Teithiodd i'r Dwyrain Canol ym 1837–38, ac ysgrifennai cerdd draethiadol yn disgrifio'i brofiadau, a gyhoeddwyd wedi ei farwolaeth dan y teitl Podróż do ziemi świętej z Neapolu ("Taith i'r Wlad Sanctaidd o Napoli", 1866).^[1] Wedi hynny, treuliodd Słowacki y rhan fwyaf o'i alltudiaeth ym Mharis, ac yno y bu farw o'r ddarfodedigaeth yn 39 oed.

Ymhlith ei weithiau eraill mae'r gerdd brôs Anhelli (1838) a'r gerdd athronyddol Król-Duch (1847) a ysbrydolwyd gan Ddwyfol Gân Dante. Mae nifer o'i ddramâu yn tynnu ar hanes Gwlad Pwyl neu hen chwedlau, ac yn ymwneud â'r gwrthdaro rhwng y drwg a'r da. Maent yn cynnwys Balladina (1834), Hotsztynski (1835), Lilla Weneda (1840), Sen srebrny Salomei (1844), a Fantazy (1843). Gwerthfawrogir Słowacki hefyd am ei lythyrau at ei fam o'i gyfnod ym Mharis, a ystyrir yn esiamplau gwych o ryddiaith Bwyleg.