Pepino

Pepino (Cucumber)
Mga pepino kamang sa daga
Mga saradit na pepino
Sayantipiko na klasipikasyon
Kahadean:	Plantae
Klado:	Angiosperms
Klado:	Eudicots
Klado:	Core eudicots
Klado:	Rosids
Orden:	Cucurbitales
Pamilya:	Cucurbitaceae
Genus:	Cucumis
Espesyes:	C. sativus
Ngaran binomyal
Cucumis sativus L.

An pepino (Cucumis sativus) sarong tinanom na nagbabalagon asin kamang sa daga o nakurapot pataas kun may sala-salang sakatan. Napipisan ini sa pamilya Cucurbitaceae. An bunga kan pepino inuusar sa pagluto komo pamberdura sa may mga sinabawan o ginigiris ginigibong ensalada o atsara. An bunga kaini hitsura nin patola, matilaba alagad talidong an kahawakan. Totoo may klase na an bunga garo bola-bola. An laba pwede mag'abot 60 sentimetro asin mga 10 sentimetro an diametro. Berdehon siya asin mahalnas an kaubakan. Nagpoon magtubo an tinanom na ini sa Habagatan Asya alagad ngonyan lakop na sa gabos na kontinente. An pepino 95% kaini tubig mansana.^[1]

May mga patamboon kaini (cultivar) na dai bagay mag'agi sa polinisasyon ta naroro lugod an tinanom sa kalidad. Tinatanom ini sa mga greenhouse na dai makalaog an mga alimbubuyog o sa kaomahan na sigurado mayong mga layog-layog na mga alimbubuyog. Kadaklan kan patamboon nangangaipo nin polinisasyon, kaya dinadara igdi an mga alimbubuyog ngani an mga burak mapolinisar pagtiyempong maburu'kad. Mga sintomas kan tinanom na dai toltol an pagkapolinisar iyo an mga bunga kaini sa may harani sa takogong berde alagad an ibong na poro mapusaw na giyaw asin kurupos.^[2]

An mga patamboon na tradisyonal parati naprodyusir mga burak na lalake dangan mga babae naman. Totoo igwa nang mga cultivar na napapabu'kad sana mga burak na babae.

Tolong klaseng cultivar an pinapalakop ngonyan na pangkomersyo: inaapod na slicing, pickling asin Gherkin. An slicing inapod ta tuyong gigirison sana siya na

Mga pepinong slicing pinapatubo ta kakanon na hilaw asin ta an hinog kaini na kolor giyaw mapait asin matorotigsom sa namit. An grupong ini haros para sa merkado sa Norte Amerika asin an mga ini heneralmente mga haralaba, mahahalnas asin haros pararehas sa kolor saka mas makunot an ubak. May mga saro-saradit man kaini totoo sa ibang lugar asin pwede man gibohon atsara.

Inapod ining pickling ta ensaladahon an mga klaseng ini. An mga pepino ini-ensalada sa asin, asukar, suka asin mga sinalakan pang iba-ibang rekado. Manlaenlaen na produkto pambihirang mga namit an pinoprodyusir para sa mahiwas na merkado sa bilog na kinaban. An mga bunga kaini pili na gayo sa saiyang mga sukol pag'abot sa laba-asin-diametro asin dapat mayong mga guang sa laog. An mga inapod na picklers natubo poon 7 sundo 10 sm (3-4 pul) sa laba, asin 2.5 sm (1 pul) sa diametro. An ubak man pati kaini gurudol-gudol, asin an tinanom mismo bakong halawig an pagkamang. An kolor kaini pwedeng gatason na dulaw, malungsi o mairom na berde. An proseso nin pag'ensalda nagamit nin paraffin na taro sa pagsara kan mga binote ngane magtagal sa pagkapreserbar. Inuusar man mga botelyang mahihibog ngane makalaban sa haralangkaw na temperatura. An likido sa pag'ensalada inaapod sabaw kan ensalada.

An mga Gherkin, inapod man na cornichons, o baby dill o baby pickle ta garo mga moro' sa pagkatamanyo kaini, may saro (2.5 sm) abot 5 pulgada (13 sm) sa laba asin parati gurudol-gudol an ubak, asin ini-ensalada sa iba-ibang proporsyon nin asin, adsukar, suka asin mga rekado. Sa Reyno Unido, mas dinadakul an suka kaya mas maalsom; tabang sa pagpasiram kan mayor na kakanon.

Ini pinapatubo sa laog nin mga greenhouse o sa kahiwasan nin oma dangan pinu-proseso lokalmente asin ini-impake sa mga bote. Kadakulan kaini dinadara sa Kanada, Estados Unidos, asin Indya. An mga taga-propdyuser kaini iyo an Indya, Turkey, Ukraine asin Mehiko pero an nangengenot sa pagprodusir iyo an Tsina. Kan 2014, an Tsina nagprodusir nin 56.9 milyon na tonelada kan pepino. An sunod na ikaduwa sa produksyon iyo an Turkey asin Rusya na pareho nakaprodusir nin 1.8 milyon na tonelada kan 2014, bagay na harayong marhay sa produksyon kan Tsina. An mga darakulang importador iyo an European Union, Estados Unidos, Kanada, asin Israel.

An pepino gikan sa Indya, kun saen yaon manlaenlaen na variety makukua. Ini kinukultibar na nin dai mababa sa 3,000 taon asin naintrodusir sa Europa kan mga Griyego o Romano. May rekord kan pagtatanom kan pepino sa Pranses poon pa ika-9 na siglo, sa Inglatierra kan ika-14 siglo, asin sa Norte Amerika, kan katangaan nin ika-16 na siglo.

• 
  Pangurapot nagtutunga sa pagkapot sa mga kamangan
• 
  Lubid na pasakatan ginibo para sa pagbabalagon kan pepino

Sarong tamboan an artikulong ini. Makakatabang ka sa Wikipedia sa pagpoon kaining pahina.