Bulafa ewala (suterot)

Bulafa ewala tir stuvaf berpot ke Jules Verne sanegayan bak 1875, tis tana karba ke Yona zultafa koyara nevatum.

Ba 24/03/1865 vipka ilburena gan cankacek mo megotuna domega ke Pacifika welfa baliewer. Vas aluboy korik robiskaf ruldar : i vas Cyrus Smith dritik do Nah sagafe ebeltafe zanisikye is Top vakol, is Gedeon Spilett ciafe gejafelusikye, is Pencroft sintaafe birelikye dositane gu jotafe gadiskikye yoltkirafe gu Herbert Brown. Sin va Wideytageja neyon gu lenteka al paked. Gan geekaf neyik koe Richmond zo stoleyed aze dubieson va vipka al lajukosongad. Voxen cankacek tolke kaik abdiwiyino xo al ilburer. Isen sinafa debala nutubemuapar kiren Cyrus Smith tis tel logrupeaf is lodikiaf nutir griawiyis bal skaya. ( 1^-eaf ik 3^-eaf luz ).

Wori kaliapon sin moblitison grustad, trasison va brava tcabaneson is yestason, lajupaskison va tey. Va dritik tis bulon vawelaf koe arula poke domega dace katrasid. ( 4^-eaf ik 8^-eaf luz ).

Tuke Cyrus Smith, kotcoba loon tufakawer. Lokiewon malsaveson va kota coba firvina gan tuwava, in nover da doda va jontik is keskotaf mergil adre urlicker nume va ind boniar. Miledje vestara cugeke zo star : bat siday enwe tir letackafa ewala nutisa megrupena gan tawavopik. Sin gu « Lincoln ewala » yoltad. ( 9^-eaf ik 14^-eaf luz ).

Gradilik va loloon laofa is gedelafa bokara koaskid, va divroidaxa iad ise, tuomason va laveka ke lana uzda, va « Granite-House » levedafa vredapa lajusenud. Batkane va fentugal erodackon rotiskid. Wori konaka bifa evodad, tulon tigira ke digki koe cot ke lan govitaf bulol ikseyen. ( 15^-eaf ik 22^-eaf luz ).

Vegedura va guema va vestara loeke tufakar. Voxen lana bifa va blira ke bopelanikeem moekote di romplekur : kosmara va yult xeyeyes mo piluda is dogiskis vas xeka is vage is neva is ervo is jontika gedrafa nela. Xanta ke bata jwa me zo rodiver. Cyrus Smith is dositikeem banvielu gu lodeaftaf snavol va int roderojud nume koe ewala va int mekivason arpumad. Acum va empa ke ipka is inafi tciamafi tayi rovodimnarid. ( 1^-eaf ik 5^-eaf luz ).

Jidol zo lajutukwar. Dom ke Granite-House zo trumindar ; lavatralafo madasiko va vansara ravaldar isen ralpa bene dilk zo inked. Cyrus Smith tuke dimnariyina uldina rorabater da Lincoln ewala poke ar siday tigir, i poke Tabor ewala. Bam sin djuworad nume va tota toz vegedud. ( 6^-eaf ik 10^-eaf luz ).

Toleafa fentugalura ton lokiewafa gropa zo liker. Tota zo tenuker. Mali taneafa lwira, Bonadventure tota keldaskickir. Harbert va tirac dem staksa onar : bopelanik va grelera koe Tabor ewala co ker. Gradilikeem va tisikye dimon govitafe trasir nume poason malburer. Va kelda tuke anton tey turunkayan gan megrupena nuba katrasir. ( 11^-eaf ik 15^-eaf luz ).

Warzaf dositik tir savsaf tarlesik, i Ayrton gelusik jovleyen gan Glenarvan J^-ye koe Tabor ewala enide bantan va gomilara di vugdayar. Sidjepeson, Ayrton vanmiae giwasikeem va dimblira trasir. Voxen ruyer da me tir askisik va staksa ke tirac. Dem tanoy loplekuf bewik, seltomam va warzafa zultaca kotaskir : Cyrus Smith va tralafi sumesutesiki dace epur. Kadimion tota zo murobar. ( 16^-eaf ik 20^-eaf luz ).

Goxe ale tcordafa tota tir, i Speedy dirgani gan savsaf dofugik ke Ayrton, i gan krizaf Bob Harvey. Bali ke tevoy ewalik fu tir awalkedaf voxen tota ben riliza divroidawer. Toktan lev cewa al rundar ? Sin va yoncoba kou solbewayana saga dimnarid voxen Cyrus Smith pu nikeem nuer : mali inkera, lana rubafa tigira va sin aun dun kopomar. Isen bemuuca valey bata bula tir : tevoy tcordik wan pabud. Va kotcoba toz apkad. Bal lana doaliera, Harbert astirbon zo bakar. Fu awalker voxe bexe kan lana selaxa vanbureyena gan merowin nendasik zo giwar. Ban nendasik va arak ke tcordikeem dere al awalkoper ise va stoleyen Ayrton al tunuyar. ( 1^-eaf ik 3^-eaf luz ).

Vegedura va warzafa tota zo guzekar isen bareaf fentugal fu zo golureskar. Voxen Franklin tculk tice ewala ve divlanker. Megrupen vedgobesik tere va int nedir : to Nemo redakik tir ( koredik ke Vuntoye decitmetre koe mid berpot ), isen inafa Nautilus midtota koe midarula zo preyutar. ( 14^-eaf ik 15^-eaf luz ).

Bat cugunaykaf koredik va intafa izva kareizur. Lekeon tiyir Dakkar sersik tis indiaf nafalik, ise va Sepoy tarlera bak 1857 pakeyer. Zo ceneyer isen inaf yasikeem zo stakeyer, batdume in va eaftafa jaxadara kev Engla al abdumimar. Batenide va eroyafa midtota tueaftasa va bireem al envar. Voxen radimi griawira ke intaf detikeem, koe vask ke Lincoln ewala al gelber. Banlize gan gijafa ayafa duga ke bopelanik al zo konter nume al gorar da di kopomayar. Moi bata movura awalker, kaliskemason va duzafa tufapa pu Cyrus Smith is nikeem. Nautilus koe arula zo elekar aze va naboxa ke Nemo zanudar. ( 16^-eaf ik 18^-eaf luz ).

Soe sugda ke furefa vilawera ke ewala toz sokid. Gradilik ekeyur voxe va tugadiara zdarion me rovotenuker. Yazidafa vantraspura is ruftacek va grabomeem rawad. Fure sidayam alien gan ora anton wan tir. Sin gan Duncan tota stakseyen gan Glenarvan J^-ye ta dimgugara va Ayrton arti vugdasa santolda moe Tabor ewala galovon zo greled. Lana stragela iskeyena koe ewala gan Nemo al jupar da zo katrasiyid. ( 18^-eaf ik 20^-eaf luz ).

Bopelanik tid aluboy :

• Cyrus Smith : grupeafe dritikye grupaskise va tey is tawolda ik divroidaxa. Tir korik givuesten gan kottan ba kogorara.
• Gedeon Spilett : gejafelusikye
• Bonadventure Pencroff : birelikye deksafe gu asadara lidam intagabera. Azon vanpir midusik.
• Harbert Brown : gadiskikye vajulene gan Pencroff. Tir pegafe gu ravera ise va ruxopafa grupera pu seltom vanburer.
• Nab ( Nabuchodonosor ) : savsafe levetirikye tunuyayane gan Cyrus Smith. Zavzar sagafe nope muntuca is mafelara.

Toloy sulem dere tid koredik koe berpot :

• Top : vakol ke Cyrus Smith.
• Jup : jidol grigovitayan.

Isen toloy ar koredik awis bak berpot :

• Tom Ayrton : birelikye ireglieyese.
• Nemo redakik : gelbeyes koe Lincoln ewava, va bopelanikeem aun pomar.

Konaka yunkexa va berpot, koe piskura ke 1875

• Jules Verne : Francavaf suterotik ( 1828-1905 )
• (fr) Bulafa ewala, dene Wikisource ( xantokrent )