Mal Tawava kal Tael (suterot)

Mal Tawava kal Tael tir opasordaf berpot ke Jules Verne sanegayan bak 1865, tis tana karba ke Yona zultafa koyara nevatum.

Va rupa ke Gun-Club boxo vegeduso va gulafi buli stakstetesi va djobal kal Tael kareizur. Berpot va stuva ke bewik ke Gun-Club bak sinafa koyara rem dark suzdar ise va opaf is brubef askoaks ke bata koyara vestar. Mal Tawava kal Tael berpot dene opasordaf suteroteem turestapayar ise va tusanegara va rietara va darkafa koyara webeyer.

Baltimore Gun-Club tir viltasikafo boxo djukuvegeduso va lani buli djukalkabusi va mimadjo kal Tael. Abdumimaks gan Aronnax tavesikye is Nicholl redakik is Michel Ardan felusik tis toloye nikye zo star.

Berpot va stuva ke bat baroy koredik is dositik korundanyas va weka tori lerdkafa koyara kal Tael suzdar. Bak koyara sin jontikote budud, va tulon griraxivara is remblira koe dark is lidawickaf ludavaf gropeem moe taelafa welma.

Koyasik va divulafa is plabafa tamava kotrafa gu buga is yazidafa meftava kosmad vielu moe Tael tigid. Va yona amidafa gola ke Tael vestad ise va opafa dizvera malskud abdida van Tawava dimlapid.

Koyara dimlapisa van Tawava dere tir kotrafa gu iyela is regala, voxen koyasik gu Florida va int lajumosidad lize wetce gradilik zo kalemuded.

• Atoera va dalafa rieta ke berpot : vegedura va buli staksetesi va mimadjo kal Tael
• Atoera va dalaf koredik : Arronax tavesik is Nicholl redakik is Michel Ardan felusik.

• Atoera va Baltimore Gun-Club boxo is inafa danda ta bokara va bat abdumimaks
• Pimtara va vegedura va buli is brubefa budura
• Atoera va kabuna weka is inaf kireem.

• Pimtara va vankabura is taneaf bartivtum ke koyara
• Ralentara va zvak ke griraxivawera is remblira koe dark
• Artlapira va Tael is kosmara va divulaf patectoy.

• Pimtara va amidaf goleem ke Tael is opafa dizvera skuna gan koyasik
• Kakevera va vakor is wupe moe taelafa welma..

• Mallapira va Tael az dimlapira van Tawava
• Ralentara va brubef is sazaf zvak bak dimlapira
• Mosidara koe Florida az xultafa emudera va koyasiktum.

• Laotara va kosmakseem is sega askuteyena gan bewik ke Baltimore Gun-Club boxo
• Undera va askoara ke bat kosmakseem tori direkefa darkafa vestara.

Berpot va jontika watsa isu vefaki kan izva ke Arronax tavesik is Nicholl redakik is Michel Ardan felusik bal koyara van Tael vestar. Ke bat watseem, va opa is brubeopa voxis gotuskuca is nuca voxis vestara is kosmara is ralentara va megrupene is keveluca romiwat.

Abdumimaks ke Baltimore Gun-Club boxo va djumerapa va kosmara is abduxoa ordafa gu bane sare tcazedar. Koyara van Tael banugale torigina gu rietunaca va erava ke ayikeem van warzafa zida is kaikfira va kima lecar.

Gluyaxa tanasa va koredikeem ke berpot va po ke nuca is gotuskuca dere yunker. Nekev amidaca is solpakera, ta geltrara va dofa klokara is pomara va artan, bat korik va kotcoba djuprogarpumad.

Dulapon rostragat da Mal Tawava kal Tael berpot isti XIX^-eafa decemda zo suteyer voxe abdi skura va taneafa darkafa talara zo sanegayar. Nekevon Jules Verne va koyara van Tael katcalon rapalafa gu geltruca lajugestayar, malsaveson va opa is brube banugale rodadine.

Acum berpot nope opafa elimuca is corara va darkafa vestara zo kiavayar. Va jontikara neva koswayar ise va rietara va koyara van Tael webeson tusaneayar. Tire Jules Verne va lanyona budura is opafa tuwarzara grupabditrakuyur, i va ra titisa adrafa ta skura va mana koyara dum tulon vegedura va rembureso darkero is bralkara va uum icde griraxivara is remblira koe dark.

Ison, Mal Tawava kal Tael berpot ton lecaf is ikasugdalaf grabom dere zo remzawayar, i ton grabom abduplekus va jugemera ke ayikeem va vanmadawera is tukulawera tuke opa is grupera. Koyara van Tael ton koaneyara va pesta is dwonuca zo robelir, i ton koaneyara ganesa va undera va minafa runda koe tame is minafi donafi bali.

Tere koyara van Tael is vestara va plabafa anameda va ikasugdala ke ralentara va megrupene is keveluca kaatoed. Artfitison va mukot, koyasik va jontika buda isu wupe golentegid voxe tuke takreluca is giuca tere xultud.

Sopron, Mal Tawava kal Tael tir berpot dem jonkafa belisa vwa dekson belcekasa va opa is stuva is kontega is undera. Batugale wan tir pulotaca ke suteroteem is opasorda ise wan droler ise va gesta ke jontik belisik wan nazbar.

Konaka yunkexa va berpot, koe piskura ke 1865

• Jules Verne : Francavaf suterotik ( 1828-1865 )
• (fr) Mal Tawava kal Tael, dene Wikisource ( xantokrent )