Republik Gersau

D Republik Gersau isch vom spoote Middelalter bis zur Restauration e chliini Republik im Gebiet vom hütige Kanton Schwyz gsi.

D Gersauer si de Äidgenosse immer nooch gstande und hai 1386 an ihrer Site bi dr Schlacht vo Sämpach gege d Habsburger kämpft. 1390 het sich d Gmäind Gersau vo dr Vogteigwalt, wo in de Händ vo de Luzärner Johann, Peter and Agnes von Moos gsi isch, und dr habsburgische Verpfändig für 650 Pfund in Pfennig freikauft. D Vogtei, d Rächtssprächig und d Stüürgwalt si an d Gersauer gange. 1433 het Gersau z Basel d Riichsummiddelbaarkäit vom Kaiser Sigismund, wo alli alte Freihäite, Rächt und Brivilegie bestätigt het, überchoo. Es isch so die chliinsti riichsfreiji Republik – s Gmäindigebiet isch nume 24 km² grooss gsi – worde. Es het sich mit dr Äidgenosseschaft verbündet und wird as Schutzort zu de Zuegwandte Ort zelt.

1798 isch Gersau e Bezirk im Kanton Waldstette in dr Helvetische Republik worde. Wo die zämmebrochen isch, het d Mediationsakte us Gersau e Bezirk vom Kanton Schwyz gmacht. Denn isch d Gersauer Republik vo 1814 aa non e baar Joor sälbständig gsi. 1817 het denn d Daagsatzig, gstützt uf d Beschlüss vom Wiener Kongräss und uf e Bundesverdraag vo 1815, gegen e Wille vo de Gersauer beschlosse, ass d Republik vom 1. Januar 1818 aa dr säggst Bezirk vom Kanton Schwyz wurd. D Gmäind het so ihri Sälbständikeit verloore, aber e Sonderstellig im Kanton Schwyz überchoo, wil si en eigene Bezirk bildet het.

Vo 1722 bis 1817 het z Gersau jedes Joor d Feckerchilbi stattgfunde, wo sich die Jenische z Gersau droffe hai. Die het mä jüngst, wo mä 650 Joor Republik Gersau gfiirt het, wiiderbeläbt.^[1]

• Albert Müller: Gersau. In: Historisches Lexikon vo dr Schwiiz.
• Mirjam Breu: Gersau feiert die freie Republik Artikel uf srf.ch vom 2. Februar 2014
• Adi Kälin: Eine freie Republik inmitten der Eidgenossenschaft Artikel uf nzz.ch vom 19. April 2013

1. ↑ Feckerchilbi (Memento vom 19. März 2018 im Internet Archive) d Website vo de Veraastaltig (feckerchilbi.ch)