Malaizii

Malaizii
Malaysia

Flag	Valdkundznam
Pälidn	Kuala Lumpur
Eläjiden lugu (2018)	31,809,660[1] ristitud
Pind	329,750 km²
Kel'	malain
Valdkundan pämez'	Abdulla II
Päministr	Ismail Sabri Jaakob
Religii	islam
Valüt	malaizijan ringgit (RM) (MYR)
Internet-domen	.my
Telefonkod	+60
Aigvö	UTC+8

Malaizii (mal.: Malaysia), nece om täuz' oficialine nimi, om kaks'palaine valdkund Azijan suves. Pälidn da kaikiš suremb lidn om Kuala Lumpur. Vspäi 1999 federaline ohjastuz ištub 20 km suvhe sišpäi — Putradžai-lidnas (federaline territorii).

Vn 1957 31. päiväl elokud Malaizii tedištoiti ripmatomudes Sures Britanijaspäi. Malaizijan kaik palad saihe ripmatomut da ühtniba federacijha vn 1963 16. päiväl sügüz'kud.

Valdkundan üks'jäine Konstitucii^[2][3] (mal.: Perlembagaan Malaysia) tuli väghe ripmatomuden päiväl (31.08.1957). Se om väges nügüd'-ki, voziden 1963, 1977, 1993 da 2002 znamasižidenke vajehtusidenke. Läz kaikuttušt vot toihe penid vajehtusid, sen satuseks Konstitucii mülütab 60 tuhad vaihid.

Malaizijan kaks' palad oma jagadud Kitain suvimerel: Malakkan pol'saren suvipala da Kalimantan-saren lodehpala.

Malaizii om mavaldkundröunoiš Tailandanke (röunan piduz — 595 km) da Bruneinke (266 km) pohjoižes, Indonezijanke suves (1881 km). Ühthine röunoiden piduz — 2742 km. Sen ližaks, om meriröunoid Singapuranke, Indonezijanke da Filippinoidenke. Ühthine randanpird — 4675 km, sidä kesken pol'sarhine Malaizii om 2068 km, päivnouzmaine (Sabah da Saravak) — 2607 km. Sabahan päivnouzmpol'žed randad lainištab Sulumeri. Valdkundan pind om 329 750 km².

Klimat om tropine mussonine.

Londuseližed pävarad oma tin, kivivoi, londuseline gaz, raudkivend, vas'k, boksitad, toižed varad — mec, kala.

Ohjandusen form om federativine parlamentine konstitucine monarhii. Valdkundan pämez' (kunigaz) om Abdulla II vs 2019 vilukun 31. päiväspäi. Kaikuččel videl vodel štatoiden ühesa monarhad valitas kunigast (mal.: Yang di-Pertuan Agong «ülembaižel ižandal pandud») da varakunigast videks vodeks štatoiden järgendusen mödhe. Hö vahvištadas kaikid käskusid. Kunigahan ak om kahtenz' ristit valdkundas, Konstitucii kel'dab händast valdkundan radnikusen otmaspäi. Parlamentan partijan-vägestajan lider kändase päministraks (mal.: Perdana Menteri Malaysia) — federaližen ohjastusen pämeheks. Kaik ministrad oma parlamentan ühtnijad.

Parlament om kaks'kodine 292 ezitajanke. Üläkodi om Nacionaline Kodi vai Senat (mal.: Dewan Negara) 70 ühtnijanke (kaksin kaikuččes 13 štataspäi da völ kunigaz paneb radsijha 44). Alakodi om Rahvahaline Kodi (mal.: Dewan Rakyat) 222 ezitajanke, kaik rahvaz valičeb heid videks vodeks. Kunigaz-ki om parlamentan ühtnijaks.

Federaline ohjastuz ohjandab federaližil territorijoil, se-žo paneb rasijha nellän štatan gubernatoroid.

Parlamentan alakodin ühtnijoiden järgenduseližed valičendad oliba vn 2018 9. päiväl semendkud. Nügüdläine päministr om Ismail Sabri Jaakob vn 2021 elokun 20. päiväspäi.

   Kacu kirjutuz: Malaizijan administrativiž-territorialine jagand.

Malaizii jagase 16 federacijan subjektaks: 13 štataks (mal.: Negeri, niišpäi 7 oma sultankundad, 1 radžankund, 1 monarhan Yang Dipertuan Besar-arvnimenke, 4 gubernatorkundad) da 3 federaližeks territorijaks (mal.: Wilayah Persekutuan).

Malaizijas elädas malaizijalaižed. Vl 2005 eläjiden lugu oli 25 720 000 ristitud. Kaikiš suremb ristitišt om nügüd'. Valdkundan ristitišton nell' videndest elädas Malakkan pol'sarel, toine videndez — Kalimantan-sarel.

Rahvahad (2017): bumiputera (malajalaižed da toižed igähižed rahvahad) — 61,7%, kitajalaižed — 20,8%, indijalaižed — 6,2%, toižed rahvahad — 0,9%, ristitud rahvahanikuseta — 10,4%.

Uskondan mödhe (2010): islamanuskojad (sunnitad päpaloin, oficialine religii) — 61,3%, buddistad — 19,8%, hristanuskojad — 9,2%, induistad — 6,3%, konfucijanizm, daoizm da toižed Kitain veroližed uskondad — 1,3%, toižed uskojad — 0,4%, religijatomad — 0,8%, märhapanendata — 0,9%.

Toižed järedad lidnad (enamba 700 tuh. ristituid vn 2010 rahvahanlugemižen mödhe, surembaspäi penembha): Džordžtaun, Džohor Baru, Klang, Subang Džai. Seičeme ristitud ühesaspäi elädas lidnoiš (2020).

Šingotadud industrialiž-agrarine valdkund. Radnikoiden 11% oma ottud maižandushe, 36% ratas industrijas, toižed oma holitišiden sferas (53%, 2012). Znamasižed sarakod oma elektrotehnine, kivivoin da londuseližen gazan samine, turizm.

Malaizijan päeksport om radio-, digitaline ladimišt da sen palad (läz 40%), elektromašiništ (6%), nozoltadud londuseline gaz (6%), kivivoi (6%), pal'mvoi (6%); toine eksport — himižed produktad (2%), palad meblän täht (1%). Koume valdkundad oma pätorguindpartnörikš, eksportan i importan nell' ühesandest: AÜV, Japonii, Singapur.

1. ↑ Malaizijan ristitišton endustuz vn 2018 heinkus // Mail'man faktoiden kirj. — Cia.gov. (angl.)
2. ↑ Malaizijan Konstitucijan tekst vl 2009. — Jac.gov.my. (angl.)
3. ↑ Malaizijan Konstitucijan tekst constituteproject.org-saital. (angl.)

• Malaizijan parlamentan oficialine portal (parlimen.gov.my). (malain) (angl.)
• Malaizijan päministran oficialine sait (pmo.gov.my). (malain) (angl.)
• Malaizijan ohjastusen oficialine sait (malaysia.gov.my). (malain) (angl.)

Malaizii Vikiaitas

	Azijan valdkundad
	Afganistan | Araban Ühtenzoittud Emiratad (AÜE) | Armenii | Azerbaidžan1 | Bahrein | Bangladeš | Brunei | Butan | Egipt2 | Filippinad | Gruzii1 | Indii | Indonezii3 | Irak | Iran | Izrail' | Japonii | Jemen2 | Jordanii | Kambodž | Kazahstan1 | Katar | Kipr1 | Kirgizstan | Kitai | Korejan Rahvahaliž-Demokratine Tazovaldkund | Korejan Tazovaldkund | Kuveit | Laos | Livan | Malaizii | Mal'divan Sared | Mjanmar | Mongolii | Nepal | Oman | Pakistan | Päivnouzmaine Timor | Saudan Arabii | Singapur | Sirii | Šrilank | Tadžikistan | Tailand | Turkanma1 | Turkmenistan | Uzbekistan | Venäma1 | Vjetnam
	1 Om Evropas mugažo. 2 Om Afrikas mugažo. 3 Om Valdmerimaiš mugažo.