Río Ucayali

Die Río Ucayali is een fon do bee Wäl-Äien fon dän Amazonas in Suud-Amerikoa. Hie sälwen äntstoant truch dät Touhoopefljooten fon Río Urubamba un Río Tambo bie Atalaya. Die Río Ucayali fereeniget sik in't Noudaaste fon Pero tichte bie dän Äquator mäd dän kuuteren, man moor Woater fierenden Río Marañón toun Amazonas.

Die Río Ucayali bieldet touhoope mäd dän Río Hornillos, dän Río Apurímac, dän Río Ene un dän Río Tambo mäd een Loangte fon 2670 km dän loangsten Bupperloop fon dän Amazonas.

Do oankelde Deelstukke fon dän Touloop mäd hiere Sträkken sunt:

• Río Apurimac: 730,7 km
• Río Ene: 180,6 km
• Río Tambo 158,5 km
• Río Ucayali 1.600,1 km

Ju Bratte fon dän Ucayali in dän Unnerloop variierd twiske 400 un 1200 m, dät lait oun ju groote Masse Soundboanke un Ailounde. Ju Äi fljut hier mäd een Gauegaid fon 5 bit 7 km/h un wiest aaltied een Minst-Jüpte fon 1,50 m ap. Sien Woaterfierenge bedrächt, wier hie mäd dän Río Marañón touhoopefljut, in't Middel 13.500 m³/s

Hie fiert aan hoogen Oundeel Sedimente mäd sik (Sound, Leem un aal sowät), deeruum wäd hie tou do Mudde- of Wietwoater-Äien täld. Ieuwenske dän Rio Madeira is hie een fon do Äien, do ju maaste Sediment-Fracht in dän Amazonas späile. Wietwoater-Äien as die Río Ucayali lääwerje uut do geologisk junge Anden neerstofrieke Sedimente, do sik wilst do Hoochwoater-Perioden loangs do Ougere fon do Äien ouleegerje.

Foar dät Ucayali-Rebät wuude een Flakte fon 337.519 km² ärmiddeld, dät äntspräkt sowät 4,9 Prozent fon dät heele Amazonas-Bäkken mäd sowät 6.869.000 km².

Ätter dän Río Ucayali is ju peruoanske Region Ucayali benaamd.

• Düssen Artikkel stöänt sik haudseekelk ap ju düütsksproakige Wikipedia.