Externsteine

Do Externsteine sunt ne besunnere Fälsformation fon Soundsteene in dät Teutoborger Woold, appe Naite fon ju Stääd Detmold in dän Kring Lippe. Disse Sjoonswöidegaid in Noudrhien-Wäästfoalen is n Natuurtoankmoal, un wäd alle Jiere fon fuul Touristen besoacht. An ju noudaastelke Siede fon do Externsteine lait n litjen Deech.

Do Externsteine in dät Teutoborger Woold sunt natüürelke Soundsteen-Fälse. Die grootste Fäls lait 47,7 m hooch buppe dän „Wiembecketeich“, un sträkt sik uur moorere Hunnert Meter uut in n Gebiet weer Fälse nit oafte foarkuume. Do Fälse sunt in do fergeene Jierhunnerte fuulmoals bewierked wuuden fon Moanskene. Ju geologiske Formation äntstuude foar uungefeer 120 Millione Jiere, man do lainen noch horisontoal. Foar uungefeer 70 Millione Jiere sunt do Steene fertikoal uumeknikt, truch do Ienfloude fon dät Weeder kriegen do Externsteine hiere hüütige Form.

Alle Jiere rakt et uungefeer n hoolwe bit een Million Besäikere bie do Externsteine. N poor Steene konnen bestiegen wäide fon Klatterer, man buuten do foarskreeuwen Klatterweege is dät Betreeden fon do Fälse ferbooden. Truch ferskeedene Trappen, do sloain sunt in do Fälse, kon me bie do Spitsen kuume. Fon deer uut kon me gans fier ätter dät Noudaaste kiekje, in do uur Heemelsgjuchtengen sjucht me bloot do Bierige un Boome, do direkt an do Externsteine stounde.

Uum do Externsteine tou bekiekjen mout me deeges Ientreedjäild betoalje, buuten do Eepengenstiede sunt do Externsteine kostenloos tougongelk.

Däälich hääbe do Externsteine ne besunnere Betjuudenge foar keltiske Religionsmeenskuppe un germaniske Näiheedenen, uk foar Ljuude uut ju New Age Beweegenge sunt do Externsteine wichtich. Däälich wäide noch altied Midsuumerfäste un uur heedenske Fäste bie do Externsteine fierd fon heedenske Gruppen of New Age Gruppen.

Fröier interessierten do nationoalsozialisten sik foar do Steene; jo wüülden ju Externsteine bruuke as n Bewies foar ju Existenz fon ne oolde Hoochkultuur in et Noude, juust as do oolde fier äntwikkelde Sivilisationen an dät Middelmeer. Däälich rakt et noch altied Interesse fon nationoal-orientierde Ljuude, man bie do heedenske Fäste sunt do nit of min fertreeden.

 Commons: Externsteine – Mediendoatäie

• Externstein.de