Emocion

Emocion ta un experencia interno y subhetivo cu ta responde riba eventonan interno of externo cu ta particularmente significante pa un persona. Un evento por ta significante den e grado di placer of disgusto. E respons riba un evento lo por aparece den forma verbal, fisiologico, den su conducta, y funcion neural.^[1]

Un investigacion di percepcion di felicidad y satisfaccion cu bida na Aruba pa Aruba Tourism Authority (ATA) na 2016 a difini tres indicador: perspectiva positivo of negativo (grado di placer of disgusto) di pasado, presente, y futuro (evento interno), optimismo (evento interno), y comparacion social (evento externo) cual hunto ta splica 59% di felicidad (emocion) y 71% di satisfaccion cu bida (emocion) na Aruba.^[2]

E definicion di emocion no tin consenso den literatura. Normalmente emocion ta wordo considera como obvio, y mayoria di biaha, emocion ta ser defini pa e manifestacionnan comun, por ehempel: rabia, orguyo, miedo, tristesa of sorpresa.^[3] Aunke no tin un acuerdo general tocante e definicion, tin un distincion util entre emocion, sentimento, gemoed, y afecto.^[1]

Emocion ta referi na un estado afecto cu ta cortico y intenso, en comparacion cu estado di animo (of gemoed) cual ta mas difuso y ta dura, generalmente, mas largo. Un sentimento ta considera como e representacion subhetivo di emocion. Den otro palabra, mientras emocion ta un expression expresivo y publico, e sentimentonan ta priva pa e persona cu ta experencie.^[1] Antonio Damasio ta argumenta cu consciencia ta necesario pa experencia of sinti emocion.^[4]