Joudu

Joudu (lat. Iodum) on alguaineh, kuudai hiimiellizien elementoin sistiemas kuuluu seiččemendehtostu joukkoh da sijaiččou viijendes rivis. Joudan merki on I, sen atommassu on 126,90447. Joudu ei ole metallu, se kuuluu galogenoin joukkoh. Joudu on muzavu aineh, kuduas on fiolietovoidu väriigi. Joudal on omaluaduine duuhu. Enzimäzenny Joudan löydi francielaine hiimiekku Bernar Kurtua (Barnard Courtois) vuonnu 1811 meriheinän tuhkas. Pidämäh joudua hiimiellizenny elementannu rubei Gei-Lussak (Gay-Lussac) vuonnu 1815. Häigi andoi joudal oman nimen. Sen pohjannu on muinasgriekkalaine ἰο-ειδής-sana, kuduadu karjalakse sanotah fiolietovoikse. Tämänväristy höyryy nägi Bernar Kurtua (Barnard Courtois), konzu lämmitti meriheinän tuhkua rikkihappamehenke.