Rabaul

Rabaul es una vila de Papoa-Nòva Guinèa situada a l'èst de l'illa de Nòva Bretanha. Fondada per leis Alemands en 1878 dins la caldera d'un volcan actiu, venguèt l'aglomeracion principala de l'illa durant lo periòde coloniau. Après la Premiera Guèrra Mondiala, passèt sota lo contraròtle d'Austràlia. En 1937, una erupcion dei monts Vulcan e Tavurvur entraïnèt de destruccions importantas e la capitala de l'illa foguèt transferida a Port-Moresby. Pasmens, l'endrech gardava una valor estrategica importanta. En 1942, durant la Segonda Guèrra Mondiala, lei Japonés ocupèron donc l'endrech per i crear una importanta basa navala. De combats importants aguèron donc luòc per neutralizar aquela basa que resistiguèt ais atacas aliadas fins a aost de 1945.

Rabaul foguèt integrada a Papoa-Nòva Guinèa a l'independéncia dau país en 1975. Venguèt cap-luòc de districte e, en despiech dau transferiment de la capitala a Port-Moresby, demorèt un centre important. En 1990, aviá una populacion de mai de 17 000 abitants. Pasmens, quatre ans pus tard, una violenta erupcion dei monts Vulcan e Tavurvur causèt tornarmai de destruccions importantas. En particular, foguèt necessari d'evacuar la vila. Plusors infrastructuras importantas, coma l'aeropòrt, foguèron totalament destruchas. Foguèt alora decidit de desplaçar la capitala provinciala a Kokopo. La màger part de la populacion seguiguèt lo movement e la populacion de Rabaul èra de mens de 4 000 abitants dins lo corrent deis ans 2010. Gràcias a son passat istoric, demòra un centre toristic.