Sui Wendi
Sui Wendi (21 de julhet de 541 - 13 d'aost de 604) es un emperaire de China de la dinastia Sui que reinèt dau 4 de març de 581 au 13 d'aost de 604. Fondator de la dinastia, foguèt remplaçat per son fiu Sui Yangdi (604-618). Ocupa una plaça importanta dins l'istòria chinesa car sei reformas inicièron la transicion entre leis institucions chinesas anticas e medievalas.
Fiu d'un generau, venguèt tanben un cap militar famós au servici de la dinastia Zhu dau Nòrd. En particular, en 577, someteguèt la dinastia Qi dau Nòrd. Quatre ans pus tard, reversèt son sobeiran e prenguèt lo poder. De 581 a 589, conquistèt lei principats dau sud de China, çò que li permetèt de tornar unificar lo país qu'èra devesit dempuei l'afondrament de la dinastia Han au començament dau sègle III apC. Sobeiran sòbri e pragmatic, restaurèt leis institucions imperialas en luchant còntra la corrupcion e favorizant lo meriti coma critèri principau de promoccion. Ansin, donèt una amplor novèla ai concors imperiaus destinats au recrutament dei foncionaris. Organizèt tanben de trabalhs importants per facilitar lei comunicacions e renforçar l'unitat nacionala. Adoptèt tanben lo bodisme coma religion car, dempuei la fin dei Han, la religion indiana èra venguda un autre factor d'unitat. Enfin, adoptèt una politica economica que permetèt lo desvolopament de la produccion agricòla. Pasmens, sa volontat de restablir la senhoriá chinesa sus lei regions perifericas tradicionalament vassalas de l'Empèri menèt a una desfacha saunosa còntra Corèa en 598.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (fr) Arthur F. Wright, The Cambridge History of China, Volume 3 : Sui and T'ang China, 589–906, Part 1, Cambridge, Denis Twitchett pour Cambridge University Press, 1979.