(617) Patroclus

(617) Patroclus is en Asteroid, de an’n 17. Oktober 1906 vun den düütschen Astronom August Kopff in Heidelbarg opdeckt worrn is. He tellt to de Grupp vun de Jupiter-Trojaner. Dat sünd Asteroiden, de ruchweg op de Bahn vun Jupiter lopen doot. (617) Patroclus weer de tweete Trojaner, de opdeckt worrn is. Sien Naam is vun den Krieger Patroklos ut de greekschen Mythologie afleidt^[1].

(617) Patroclus löpt ruchweg 60° achter Jupiter ran op den so nöömten Lagrange-Punkt L₅. All Trojaners, de op dissen Lagrange-Punkt loopt, sünd na trojaansche Helden nöömt. In de Oppositschoon kann (617) Patroclus en schienbore Helligkeit vun bit to 16,2 mag hebben, womit he en bannig lichtswack Objekt is.

Ünnersöken mit dat Keck-II-Teleskop op Mauna Kea in Hawaii hebbt nawiest, dat sik dat hier üm en Dubbelsystem hannelt. Blangen den Hööftasteroiden mit en Dörmeter vun 122 km gifft dat noch en tweet Objekt, dat ünner de Beteken S/2001 (617) 1 lopen de un intwüschen den Naam Menoetius kregen hett. Den sien Dörmeter warrt op 113 km schätzt. Dormit is dat en Dubbelasteroid, den sien Kumponenten mit en Afstand vun ruchweg 680 km üm dat gemeensome Baryzentrum kreist.

De NASA plaant en Misschoon, bi de de Ruumsond Lucy mehrere Asteroiden besöken schall. De Start is för dat Johr 2021 vörsehn. Toeerst schall de Sond annere L₄-Trojaners besöken un dorna dör en Swing-by-Manöver op (617) Patroclus tostüert warrn, woneem Lucy in’n März 2033 ankamen schall.

List vun de Asteroiden

1. ↑ Dictionary of Minor Planet Names, Springer; afropen an’n 4. Juni 2019