Vörarlbarg

Vörarlbarg (hoochdüütsch Vorarlberg) is en Bundsland vun Öösterriek. Vörarlbarg hett 367.048 Inwahners (Stand 31. März 2008) op 2.601,48 km². De Hööftstadt is Bregenz, de gröttste Stadt aver Dornbirn.

Vörarlbarg liggt in de Alpen. Dat Land reckt vun 395,23 m över’n Adria-Pegel an’n Bodensee bet 3.312 m ö. A. op’n Piz Buin.

Vörarlbarg grenzt in’n Noorden an dat düütsche Bundsland Bayern. In’n Oosten liggt dat öösterrieksche Bundsland Tirol, in’n Süden de Swiezer Kanton Graubünden un in’n Westen dat Förstendom Liechtensteen un de Swiezer Kanton St. Gallen.

As Bundsland grünnt worrn is Vörarlbarg 1918. Dat dee in disse Form al siet 1861 bestahn. An’n 11. Mai 1919 hebbt se in Vörarlbarg afstimmt, wat se mit de Swiez verhanneln wullen, dat Vörarlbarg sik de Swiez ansluten dee. 80 % vun de Wählers hebbt seggt, dat se verhanneln schullen. 1938 hebbt de Natschonalsozialisten na’n Ansluss vun Öösterriek Vörarlbarg tohoopleggt mit Tirol un dor den Gau Tirol-Vörarlbarg vun maakt. De is 1945 na dat Enn vun’n Natschonalsozialismus wedder oplööst worrn un Vörarlbarg is wedder sülvstännig worrn.

Landeshauptmann is siet 1997 Herbert Sausgruber vun de ÖVP. De 36 Sitten in’n Landdag verdeelt sik siet de Wahl vun 2004 so:

• ÖVP 21
• SPÖ 6
• FPÖ 5
• Gröne 4

Vörarlbarg deelt sik op in veer Bezirke:

• Bezirk Bregenz
• Bezirk Dornbirn
• Bezirk Feldkirch
• Bezirk Bludenz

Amtsspraak is jüst as överall in Öösterriek Hoochdüütsch. Vun’n Dialekt her warrt ans Vörarlbargsch snackt, wat en Deel vun de alemannsche Dialektgrupp is. Dormit grenzt sik dat Bundsland vun’n Rest vun Öösterriek af, de baiersche Mundoorden snackt.

Vörarlbarg. Mehr Biller, Videos oder Audiodateien to’t Thema gifft dat bi Wikimedia Commons.

• Websteed vun Vörarlbarg (hoochdüütsch)

Bundslänner in Öösterriek

Borgenland • Böveröösterriek • Kärnten • Nedderöösterriek • Salzburg • Stiermark • Tirol • Vörarlbarg • Wien